മാസങ്ങൾ നീണ്ട ആശാ പ്രവർത്തകരുടെ സമരം അവസാനിപ്പിക്കുന്നു. സെക്രട്ടറിയേറ്റ് പടിക്കൽ നടത്തി വന്നിരുന്ന രാപ്പകൽ സമരം അവസാനിപ്പിച്ച് ജില്ലകളിലേക്ക് വ്യാപിപ്പിക്കാനാണ് തീരുമാനം. കേരളപ്പിറവി ദിനമായ നാളെ പ്രഖ്യാപനം നടത്തും. നാളെ 266-ാം ദിവസത്തിലേക്ക് എത്തുമ്പോഴാണ് സമരം അവസാനിപ്പിക്കുന്നത്. ആശാ പ്രവർത്തകരുടെ പ്രതിമാസ ഓണറേറിയം 1000 രൂപ വർദ്ധിപ്പിക്കുമെന്ന് ഇന്നലെ മുഖ്യമന്ത്രി പിണറായി വിജയൻ പ്രഖ്യാപിച്ചിരുന്നു. ആശാ പ്രവർത്തകർക്ക് ഇതുവരെയുള്ള കുടിശികയും നൽകും. 26,125 പേർക്ക് ഇതിൻറെ പ്രയോജനം ലഭിക്കും.
ഇതോടെ ആശാ പ്രവർത്തകരുടെ ഓണറേറിയം 7,000 രൂപയിൽ നിന്ന് 8000 രൂപയായി വർദ്ധിക്കും. ഓണറേറിയം 21,000 രൂപയാക്കണമെന്ന് ആവശ്യപ്പെട്ടായിരുന്നു സമരം. ആവശ്യപ്പട്ട വർദ്ധനവ് ഉണ്ടായില്ലെങ്കിലും പ്രഖ്യാപനം നേട്ടമായാണ് ആശന്മാർ വിലയിരുത്തുന്നത്. ഓണറേറിയം വർദ്ധനയുടെ ക്രെഡിറ്റ് നേടാൻ സിഐടിയു അടക്കം ശ്രമിക്കുമ്പോഴാണ് സമര സമിതിയുടെ നിർണായക നീക്കം. സമരത്തോട് പൊതുവെ തണുത്ത സമീപനം സ്വീകരിച്ചിരുന്ന സർക്കാരിന്റെ മനം മാറ്റത്തിന് കാരണം തങ്ങളുടെ നിശ്‌ചയദാർഢ്യമെന്ന വിലയിരുത്തലിലാണ് ആശമാർ.
അതേസമയം വർദ്ധനവ് തൃപ്തികരമല്ലെന്നും കുറഞ്ഞത് 3000 രൂപ എങ്കിലും വർദ്ധിപ്പിക്കണമെന്നും അവർ ആവശ്യപ്പെടുന്നു. ഈ വർദ്ധനവ് മൂലം ജീവിതത്തിന് ഒരു മാറ്റവും ഉണ്ടാകില്ലെന്നാണ് ആശന്മാരുടെ അഭിപ്രായം. ആയിരം രൂപ വർദ്ധിപ്പിക്കുമ്പോൾ പ്രതി ദിനം 33 രൂപയുടെ വർദ്ധനവ് മാത്രമേ ഉണ്ടാകുന്നുള്ളൂ. ഇത് സ്ത്രീകളെ അപമാനിക്കുന്നതിന് തുല്യമാണെന്ന ആക്ഷേപവും അവർക്കുണ്ട്.
പോരാട്ടങ്ങളിലൂടെ മാത്രമേ എല്ലാ അവകാശങ്ങളും നേടിയിട്ടുള്ളൂവെന്ന് ആശാ സമരസമിതി പ്രതിനിധി എം എ ബിന്ദു മാധ്യമങ്ങളോട് പറഞ്ഞു. സമരത്തെ അപഹസിക്കാൻ ശ്രമിച്ചവർ ഒട്ടേറെയുണ്ട്. പക്ഷേ സ്ത്രീ മുന്നേറ്റത്തിലൂടെയാണ് വിജയം ഉണ്ടായത്. പട്ടിണിക്ക് എതിരായ സമരമായിരുന്നു ആശമാരുടേത്. സമരത്തിന്റെ രൂപം മാറുന്നു എന്നേയുള്ളൂ. മിനിമം കൂലി എന്നാവശ്യം അംഗീകരിക്കും വരെ സമരം തുടരുമെന്നും അവർ കൂട്ടിച്ചേർത്തു.
നിലവിലെ തീരുമാനത്തിൽ തൃപ്തരല്ലാത്തതിനാൽ വരും ദിവസങ്ങളിലെ സമര രീതിയെക്കുറിച്ച് നാളെ യോഗം ചേർന്ന് തീരുമാനമെടുക്കും. ഓണറേറിയം വർദ്ധനവ് ആവശ്യപ്പെട്ട് കഴിഞ്ഞ ആഴ്ച ആശന്മാർ ക്ലിഫ് ഹൗസിലേക്ക് ശക്തമായ മാർച്ച് സംഘടിപ്പിച്ചിരുന്നു.
