മഴയും വിൽപ്പന കുറഞ്ഞതും മൂലം നീട്ടിവെച്ച നറുക്കെടുപ്പ് ഇന്ന് തിരുവനന്തപുരത്ത് നടക്കും
കേരളം ആകാംക്ഷയോടെ കാത്തിരിക്കുന്ന ആ കോടിപതി ആരെന്ന് അറിയാന്‍ ഇനി മണിക്കൂറുകള്‍ മാത്രം. 25 കോടി രൂപ ഒന്നാം സമ്മാനം ലഭിക്കുന്ന തിരുവോണം ബമ്പര്‍ ഭാഗ്യക്കുറി നറുക്കെടുപ്പ് ഇന്ന്. ഗോര്‍ഖി ഭവനിലെ നറുക്കെടുപ്പ് വേദിയില്‍ ഉച്ചയ്ക്ക് ഒന്നിനാണു നറുക്കെടുപ്പ്.
നേരത്തെ, സെപ്റ്റംബര്‍ 27 നറുക്കെടുപ്പ് തിയതിയായി പ്രഖ്യാപിച്ചുകൊണ്ടാണ് ടിക്കറ്റ് വില്‍പ്പന ആരംഭിച്ചത്. എന്നാല്‍ അച്ചടിച്ച ടിക്കറ്റ് മുഴുവന്‍, അപ്രതീക്ഷിതമായുണ്ടായ കനത്ത മഴ കാരണം വിറ്റുപോയില്ല. ഈ സാഹചര്യത്തില്‍ ഏജന്റുമാരുടെയും വില്പനക്കാരുടെയും അഭ്യര്‍ഥന പരിഗണിച്ചും ജിഎസ്ടി നിരക്ക് മാറ്റവുമായി ബന്ധപ്പെട്ടും നറുക്കെടുപ്പ് ഒക്‌ടോബര്‍ നാലിലേക്കു മാറ്റുകയായിരുന്നു.
സംസ്ഥാന ലോട്ടറി വകുപ്പിന്റെ ഏറ്റവും വലിയ സമ്മാനത്തുകയായ 25 കോടി രൂപ ലഭ്യമാകുന്ന തിരുവോണം ബമ്പറിനായി 75 ലക്ഷം ടിക്കറ്റുകളാണ് ഈ വര്‍ഷം അച്ചടിച്ചത്. ടിക്കറ്റ് മുഴുവന്‍ വിറ്റുതീര്‍ന്നു. 4,07,100 എണ്ണം ടിക്കറ്റുമായി പാലക്കാട് ജില്ലയാണ് വില്‍പ്പനയില്‍ ഒന്നാമത്. തൃശൂരാണ് രണ്ടാമത്, വിറ്റത് 9,37,400 ടിക്കറ്റ്. 8,75,900 ടിക്കറ്റ് വിറ്റ തിരുവനന്തപുരമാണ് മൂന്നാമത്.
രണ്ടാം സമ്മാനമായി ഒരു കോടി രൂപ വീതം 20 പേര്‍ക്ക് ലഭിക്കും. മൂന്നാം സമ്മാനമായി 50 ലക്ഷം വീതം 20 പേര്‍ക്കും നാലാം സമ്മാനമായി അഞ്ചുലക്ഷം വീതം 10 പരമ്പരകള്‍ക്കും അഞ്ചാം സമ്മാനമായി രണ്ടു ലക്ഷം വീതം 10 പരമ്പരകള്‍ക്കും ലഭിക്കും. ആറ് മുതലുള്ള സമ്മാനങ്ങളായി 5,000 മുതല്‍ 500 രൂപ വരെയും നല്‍കുന്നു.
ഓണം ബമ്പര്‍ നറുക്കെടുപ്പിനൊപ്പം പൂജാ ബമ്പര്‍ ടിക്കറ്റിന്റെ പ്രകാശനവും നാളെ നടക്കും. ധനമന്ത്രി കെ.എന്‍. ബാലഗോപാല്‍ പ്രകാശനം നിര്‍വഹിക്കും.
12 കോടി രൂപ ഒന്നാം സമ്മാനമായി നല്‍കുന്ന പൂജാ ബമ്പര്‍ ടിക്കറ്റിന്റെ വില 300 രൂപയാണ്. അഞ്ച് പരമ്പരകളിലായാണ് ടിക്കറ്റ് അച്ചടിച്ചിരിക്കുന്നത്.
രണ്ടാം സമ്മാനമായി ഒരു കോടി രൂപ വീതം ഓരോ പരമ്പരയിലും ലഭിക്കും. മൂന്നാം സമ്മാനമായി അഞ്ച് ലക്ഷം വീതം 10 പേര്‍ക്കും (ഓരോ പരമ്പരയിലും രണ്ട് വീതം). നാലാം സമ്മാനമായി മൂന്നു ലക്ഷം വീതവും അഞ്ചാം സമ്മാനമായി രണ്ടു ലക്ഷം വീതവും ലഭിക്കും. 5000, 1000, 500, 300 വീതം രൂപയാണ് മറ്റു സമ്മാനങ്ങള്‍.
