കേരളം മദ്യ ഉത്പാദന ശേഷി വർദ്ധിപ്പിക്കുന്നതിലേക്ക് നീങ്ങണമെന്നും കയറ്റുമതിക്കുള്ള അവസരങ്ങൾ തേടണമെന്നും എക്സൈസ് മന്ത്രി എം.ബി. രാജേഷ്. ഇത്തരം നീക്കങ്ങൾക്കു നേരെ വരുന്ന പ്രാദേശികമായ എതിർപ്പുകളെ മറികടന്ന് മുന്നോട്ട് പോകണമെന്നും പാലക്കാട് നടന്ന ഒരു സ്വകാര്യ ചടങ്ങിൽ മന്ത്രി പറഞ്ഞു.
“കേരളത്തിൽ ലൈസൻസുള്ള ഒമ്പത് ഡിസ്റ്റിലറികളുണ്ട്, എന്നാൽ നിലവിൽ ഇവിടെ ഒരൊറ്റ തുള്ളി മദ്യം പോലും ഉത്പാദിപ്പിക്കുന്നില്ല. അടിസ്ഥാന സൗകര്യങ്ങളും വിഭവങ്ങളും വൈദഗ്ധ്യമുള്ള തൊഴിലാളികളും നമുക്കുണ്ട്. തദ്ദേശീയമായ ഉത്പാദനത്തെ തടയുന്ന സ്ഥാപിത താൽപ്പര്യങ്ങളെ മറികടക്കാനുള്ള ഇച്ഛാശക്തിയാണ് നമുക്കില്ലാത്തത്,” രാജേഷ് അഭിപ്രായപ്പെട്ടു.
തങ്ങളുടെ മദ്യ വ്യവസായങ്ങളെ പ്രധാന വരുമാന സ്രോതസ്സുകളാക്കി മാറ്റിയ അയൽ സംസ്ഥാനങ്ങളായ കർണാടകയെയും തമിഴ്‌നാടിനെയും പോലെ, കേരളം അതിന്റെ മദ്യ നിർമ്മാണ സംവിധാനം വിപൂലീകരിച്ചാൽ വലിയ വരുമാനവും തൊഴിലവസരങ്ങളും നേടാനാകുമെന്ന് അദ്ദേഹം പറഞ്ഞു.
ജലത്തിന്റെ ഉപയോഗം പോലുള്ള ആശങ്കകൾ ഉന്നയിക്കുന്ന പ്രാദേശിക എതിർപ്പുകളെ തള്ളികളഞ്ഞ മന്ത്രി, അത്തരം എതിർപ്പുകൾ അടിസ്ഥാനമില്ലാത്തതും രാഷ്ട്രീയ പ്രേരിതവുമാണെന്ന് പറഞ്ഞു. കർണാടകയ്ക്കും മറ്റ് ദക്ഷിണേന്ത്യൻ സംസ്ഥാനങ്ങൾക്കും ജലക്ഷാമമില്ലാതെ ഉത്പാദനം നിലനിർത്താൻ കഴിയുമ്പോൾ, കേരളത്തിനും അത് കഴിയും.
വർഷാവർഷം പുതുക്കുന്ന മദ്യനയത്തിന് പകരം അഞ്ചു വർഷത്തെക്ക് എക്സൈസ്, മദ്യനയം അവതരിപ്പിച്ചുകൊണ്ട് ഈ മേഖലയിൽ സ്ഥിരത കൊണ്ടുവരാൻ സർക്കാർ ഉദ്ദേശിക്കുന്നതായി രാജേഷ് സൂചന നൽകി. ഈ നീക്കം നിക്ഷേപകർക്കും, നിർമ്മാതാക്കൾക്കും വ്യക്തതയും ആത്മവിശ്വാസവും നൽകുമെന്ന് അദ്ദേഹം പറഞ്ഞു.
“വാർഷിക നയപരിഷ്കരണങ്ങളിലെ അനിശ്ചിതത്വം പുതിയ സംരംഭകരെയും ദീർഘകാല നിക്ഷേപങ്ങളെയും നിരുത്സാഹപ്പെടുത്തുന്നു. സ്ഥിരതയുള്ള അഞ്ച് വർഷത്തെ നയം വ്യവസായത്തിന് മികച്ച രീതിയിൽ ആസൂത്രണം ചെയ്യാൻ അവസരം നൽകുകയും സംസ്ഥാനത്തിന് സ്ഥിരമായ വരുമാനം ഉറപ്പാക്കുകയും നിയന്ത്രണപരമായ അച്ചടക്കം കൊണ്ടുവരാൻ സഹായിക്കുകയും ചെയ്യും,” അദ്ദേഹം വിശദീകരിച്ചു.
ടൂറിസത്തിനും സേവനങ്ങൾക്കും അപ്പുറത്തേക്ക് സംസ്ഥാന വരുമാനം വൈവിധ്യവത്കരിക്കാനുള്ള കേരളത്തിന്റെ വിപുലമായ സാമ്പത്തിക തന്ത്രവുമായി ഈ നിർദ്ദേശം യോജിച്ചു പോകുന്നു, അതോടൊപ്പം സുതാര്യവും സർക്കാർ നിയന്ത്രിതവുമായ ഉത്പാദനം പ്രോത്സാഹിപ്പിച്ചുകൊണ്ട് വ്യാജ മദ്യ വ്യാപാരം തടയാനും ഇത് സഹായിക്കും.
