ടിപി ചന്ദ്രശേഖരൻ വധക്കേസിൽ ശിക്ഷ അനുഭവിക്കുന്ന പ്രതികൾ ജയിലിനുള്ളിൽ മയക്കുമരുന്ന് ഇടപാടുകളിൽ പങ്കാളികളാണെന്ന് ജയിലധികാരിയുടെ അന്വേഷണ റിപ്പോർട്ട്. കേസിലെ പ്രധാന പ്രതികളായ കൊടി സുനിയുടെയും കിർമാണി മനോജിന്റെയും നേതൃത്വത്തിലാണ് ഈ മയക്കുമരുന്ന് ഇടപാടുകൾ നടക്കുന്നതെന്ന് റിപ്പോർട്ടിൽ പറയുന്നു. ജയിലിനുള്ളിൽ കോടി സുനി നിരന്തരം അച്ചടക്കലംഘനം നടത്തുന്നതായും റിപ്പോർട്ട് വ്യക്തമാക്കുന്നു. ജയിലിൽ പ്രതികൾ നടത്തിയ കുറ്റകൃത്യങ്ങളെ കുറിച്ചുള്ള വിശദമായ റിപ്പോർട്ടിന്റെ അടിസ്ഥാനത്തിലാണ് കൊടി സുനിയെ തവനൂർ ജയിലിലേക്കു മാറ്റിയത്.
അതേസമയം, ടിപി ചന്ദ്രശേഖരൻ വധക്കേസിലെ പ്രതികളുടെ മോചനവുമായി ബന്ധപ്പെട്ട് ജയിലുവകുപ്പ് അസാധാരണമായ നീക്കങ്ങൾ നടത്തുന്നുവെന്ന സൂചനകളുമുണ്ട്. ജയിൽ മേധാവിമാർക്ക് ജയിൽ വകുപ്പ് മേധാവി അയച്ച കത്തിൽ, ടിപി വധക്കേസിലെ പ്രതികളെ ‘വിടുതൽ’ ചെയ്യുന്നതുമായി ബന്ധപ്പെട്ട സുരക്ഷാ പ്രശ്നങ്ങളുണ്ടോ എന്ന് ആരാഞ്ഞിട്ടുണ്ട്. പ്രതികളെ സ്ഥിരമായി മോചിപ്പിക്കാനാണോ, അല്ലെങ്കിൽ പരോളിലൂടെയാണോ വിടുതൽ എന്നതിനെക്കുറിച്ച് കത്തിൽ വ്യക്തമാക്കിയിട്ടില്ല. ‘വിടുതൽ’ എന്ന പദമാണ് ഉപയോഗിച്ചിരിക്കുന്നത്. ശിക്ഷ 20 വർഷം കുറയ്ക്കരുതെന്ന ഹൈക്കോടതി വിധിയുണ്ടായിട്ടും സർക്കാരിന്റെ ഈ ഇടപെടൽ.
