ശരിയായ EPIC കാര്‍ഡ് നമ്പര്‍ ഉപയോഗിച്ച് തിരഞ്ഞാല്‍ മാത്രമേ പട്ടികയില്‍ പേര് കണ്ടെത്താന്‍ കഴിയൂ
തദ്ദേശഭരണ തിരഞ്ഞെടുപ്പ് ആസന്നമായിരിക്കെ, ഇരട്ട വോട്ടുമായി ബന്ധപ്പെട്ട് നിരവധി ആരോപണങ്ങളാണ് സംസ്ഥാനത്തിന്റെ വിവിധ ഭാഗങ്ങളില്‍നിന്ന് ഉയര്‍ന്നിരിക്കുന്നത്. ഈ സാഹചര്യത്തില്‍ വോട്ടര്‍ പട്ടികയില്‍ പേരുണ്ടോയെന്ന് ഉറപ്പുവരുത്താന്‍ അവസരമൊരുക്കുകയാണ് സംസ്ഥാന തിരഞ്ഞെടുപ്പ് കമ്മിഷന്‍. കമ്മിഷന്റെ വെബ്‌സൈറ്റ് മുഖേനെ സംസ്ഥാനം, തദ്ദേശസ്ഥാപനം. വാര്‍ഡ് എന്നിങ്ങനെ മൂന്നു തലങ്ങളില്‍ പേര് തിരയാന്‍ കഴിയും.
പരിശോധിക്കേണ്ടത് ഇങ്ങനെ:
സംസ്ഥാന തിരഞ്ഞെടുപ്പ് കമ്മിഷന്റെ www.sec.kerala.gov.in എന്ന വെബ്‌സൈറ്റിലെ വോട്ടര്‍ സെര്‍ച്ച് (Voter search) ഓപ്ഷനില്‍ ക്ലിക്ക് ചെയ്യുക. തുടര്‍ന്ന്, വോട്ടര്‍പട്ടികയില്‍ ഉള്‍പ്പെടാന്‍ അപേക്ഷിക്കുമ്പോള്‍ നല്‍കിയ പേര്, കേന്ദ്ര തിരഞ്ഞെടുപ്പ് കമ്മിഷന്‍ ലഭ്യമാക്കിയ വോട്ടര്‍ ഐഡി കാര്‍ഡ് നമ്പര്‍ (EPIC) എന്നിവ നല്‍കി പേര് തിരയാം.
EPIC കാര്‍ഡ് നമ്പര്‍ രണ്ട് തരത്തിലുണ്ട്, പഴയതും പുതിയതും. ഇവയില്‍, തദ്ദേശസ്ഥാപന വോട്ടര്‍ പട്ടികയില്‍ നല്‍കിയത് ഏതാണെന്ന് ഉറപ്പുവരുത്തണം. ആ നമ്പര്‍ ഉപയോഗിച്ച് തിരഞ്ഞാല്‍ മാത്രമേ പട്ടികയില്‍ പേര് കണ്ടെത്താന്‍ കഴിയൂ. ഇതുകൂടാതെ സംസ്ഥാന തിരഞ്ഞെടുപ്പ് കമ്മിഷന്‍ നല്‍കിയ പഴയ SEC ഐഡി നമ്പറോ പുതിയ SEC ഐഡി നമ്പറോ ഉപയോഗിച്ചും പേരുകള്‍ പരിശോധിക്കാം.
സംസ്ഥാനതലത്തില്‍ വോട്ടര്‍പട്ടികയില്‍ പേര് തിരയാന്‍ വെബ്‌സൈറ്റില്‍ വോട്ടര്‍ സര്‍വിസസ് (Voter services്) ഓപ്ഷനില്‍ ക്ലിക്ക് ചെയ്യണം. അപ്പോള്‍ Search Voter State wise, Search Voter Local body wise, Search Voter Ward wise എന്നീ മൂന്നു ഓപ്ഷനുകള്‍ ലഭ്യമാവും. സംസ്ഥാനതലത്തില്‍ പേര് തിരയാന്‍ Statewise ഓപ്ഷന്‍ ക്ലിക്ക് ചെയ്യണം. അപ്പോള്‍ Search by EPIC / Old SEC id , Search by new SEC Id എന്നീ രണ്ട് ഓപ്ഷനുകള്‍ മുകളില്‍ ഇടതുവശത്ത് കാണാം. ഇതില്‍ കേന്ദ്ര തിരഞ്ഞെടുപ്പ് കമ്മിഷന്റെ വോട്ടര്‍ ഐഡി കാര്‍ഡ് നമ്പര്‍, സംസ്ഥാന തിരഞ്ഞെടുപ്പ് കമ്മിഷന്റെ പഴയ SEC Id നമ്പര്‍, പുതിയ SECയും 9 അക്കങ്ങളും ചേര്‍ന്ന സവിശേഷ നമ്പര്‍ എന്നിവ ഉപയോഗിച്ച് പേര് തിരയാം.
Local body wise ഓപ്ഷന്‍ ക്ലിക്ക് ചെയ്ത് തദ്ദേശസ്ഥാപന തലത്തിലും പേര് തിരയാം. ഇവിടെ ജില്ലയുടെ പേരും തദ്ദേശസ്ഥാപനത്തിന്റെ പേരും നല്‍കിയശേഷം, വോട്ടറുടെ പേരോ വോട്ടര്‍ ഐഡി കാര്‍ഡ് നമ്പറോ (EPIC), എസ്ഇസിയുടെ പഴയതോ, പുതിയതോ നമ്പറോ നല്‍കി പേര് പരിശോധിക്കാം. അതുപോലെ ward wise ക്ലിക്ക് ചെയ്തും വോട്ടറുടെ പേര് തിരയാം.
അപേക്ഷിക്കുമ്പോള്‍ നല്‍കിയ പേരും വോട്ടര്‍ ഐഡി കാര്‍ഡ് നമ്പറും കൃത്യമായി നല്‍കിയാല്‍ മാത്രമേ പേര് കണ്ടെത്താന്‍ കഴിയൂയെന്ന് പ്രത്യേകം ശ്രദ്ധിക്കണം. ഇരട്ട വോട്ടുണ്ടെന്ന് പരാതിയുണ്ടെങ്കില്‍ ബന്ധപ്പെട്ട ഇലക്ടറല്‍ രജിസ്‌ട്രേഷന്‍ ഓഫീസറെ അറിയിക്കാമെന്നും കമ്മിഷന്‍ നിര്‍ദേശിച്ചു.
