തദ്ദേശഭരണ തിരഞ്ഞെടുപ്പ്: സംവരണ വാര്‍ഡുകള്‍ നിശ്ചയിക്കാന്‍ നറുക്കെടുപ്പ് തിയതിയായി

സ്ത്രീ, പട്ടികജാതി സ്ത്രീ, പട്ടികവര്‍ഗ സ്ത്രീ, പട്ടികജാതി, പട്ടികവര്‍ഗം എന്നീ വിഭാഗങ്ങള്‍ക്ക് സംവരണം ചെയ്ത വാര്‍ഡുകള്‍ തീരുമാനിക്കുന്നതിനാണ് നറുക്കെടുപ്പ് നടത്തുന്നത്.

തദ്ദേശഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റെ മുന്നോടിയായി സംവരണ വാര്‍ഡുകള്‍ തീരുമാനിക്കുന്നതിനുള്ള നറുക്കെടുപ്പിന്റെ തിയതിയും സമയവും സ്ഥലവും നിശ്ചയിച്ച് സംസ്ഥാന തിരഞ്ഞെടുപ്പ് കമ്മിഷന്‍. സ്ത്രീ, പട്ടികജാതി സ്ത്രീ, പട്ടികവര്‍ഗ സ്ത്രീ, പട്ടികജാതി, പട്ടികവര്‍ഗം എന്നീ വിഭാഗങ്ങള്‍ക്ക് സംവരണം ചെയ്ത വാര്‍ഡുകള്‍ തീരുമാനിക്കുന്നതിനാണ് നറുക്കെടുപ്പ് നടത്തുന്നത്.

ഗ്രാമ, ബ്ലോക്ക്, ജില്ലാ പഞ്ചായത്തുകളുടെ സംവരണം നിശ്ചയിക്കുന്നതിന് ജില്ലാ തിരഞ്ഞെടുപ്പ് ഉദ്യോഗസ്ഥരായ കലക്ടര്‍മാരെയും മുനിസിപ്പല്‍ കൗണ്‍സിലുകളിലേതിന് അതതു തദ്ദേശഭരണവകുപ്പ് ജില്ലാ ജോയിന്റ് ഡയറക്ടര്‍മാരെയും മുനിസിപ്പല്‍ കോര്‍പറേഷനുകളിലേതിന് തദ്ദേശഭരണവകുപ്പ് അര്‍ബന്‍ ഡയറക്ടറെയുമാണ് അധികാരപ്പെടുത്തിയിരിക്കുന്നത്. ഇതുസംബന്ധിച്ച വിജ്ഞാപനം സംസ്ഥാന തിരഞ്ഞെടുപ്പ് കമ്മിഷന്റെ വെബ്‌സൈറ്റില്‍ ലഭിക്കും.

941 ഗ്രാമപഞ്ചായത്തുകളിലേയ്ക്കു 13 മുതല്‍ 16 വരെയാണ് നറുക്കെടുപ്പ് തീയതി നിശ്ചയിച്ചിട്ടുള്ളത്. കണ്ണൂര്‍ ജില്ലയിലേതു രാവിലെ 10 ന് കലക്ടറേറ്റ് ഓഡിറ്റോറിയത്തിലും മറ്റു ജില്ലകളിലേതു അതാത് കലക്ടറേറ്റ് കോണ്‍ഫറന്‍സ് ഹാളിലും നറുക്കെടുപ്പ് നടക്കും. 152 ബ്‌ളോക്ക് പഞ്ചായത്തുകളിലെ നറുക്കെടുപ്പ് 18 ന് രാവിലെ 10 നാണ്. കണ്ണൂരില്‍ കലക്ടറേറ്റ് ഓഡിറ്റോറിയത്തിലും മറ്റ് ജില്ലകളില്‍ കലക്ടറേറ്റ് കോണ്‍ഫറന്‍സ് ഹാളിലുമാണ് നടത്തുക. ജില്ലാപഞ്ചായത്തുകളിലേയ്ക്കുള്ള നറുക്കെടുപ്പ് ഒക്ടോബര്‍ 21 ന് രാവിലെ 10 ന് അതതു കലക്ടറേറ്റ് കോണ്‍ഫറന്‍സ് ഹാളില്‍ നടക്കും.

തിരുവനന്തപുരം, കൊല്ലം മുനിസിപ്പല്‍ കോര്‍പറേഷനുകളിലെ നറുക്കെടുപ്പ് തിരുവനന്തപുരം സ്വരാജ് ഭവന്‍ കോണ്‍ഫറന്‍സ് ഹാളിലാണ് നിശ്ചയിച്ചിരിക്കുന്നത്. തിരുവനന്തപുരത്തേത് 17ന് രാവിലെ 10നും കൊല്ലത്തേത് ഉച്ചയ്ക്കു രണ്ടിനും നടത്തും. കൊച്ചി, തൃശൂര്‍ കോര്‍പറേഷനുകളിലെ നറുക്കപ്പെടുപ്പ് 18ന് കൊച്ചി കോര്‍പ്പറേഷന്‍ ടൗണ്‍ഹാളില്‍ നടക്കും. കൊച്ചിയിലെ നറുക്കെടുപ്പ് രാവിലെ 10നും തൃശൂരിലേത് 11.30 നുമാണ് നിശ്ചയിച്ചിരിക്കുന്നത്. കോഴിക്കോട്, കണ്ണൂര്‍ കോര്‍പറേഷനുകളിലെ നറുക്കെപ്പെടുപ്പ് 21 ന് കോഴിക്കോട് ടൗണ്‍ഹാളില്‍ നടക്കും. കോഴിക്കോട്ടേത് രാവിലെ 10 നും കണ്ണൂരിലേതു 11.30നുമാണ് നിശ്ചയിച്ചിരിക്കുന്നത്.

മട്ടന്നൂര്‍ ഒഴികെയുള്ള 86 മുനിസിപ്പല്‍ കൗണ്‍സിലുകളിലേയ്ക്കുള്ള സംവരണ നറുക്കെടുപ്പ് 16 ന് അതത് ജില്ലകളിലെ വിജ്ഞാപനം ചെയ്ത സ്ഥലങ്ങളില്‍ രാവിലെ 10 ന് നടക്കും.