‘പീഠം കാണാതായെന്ന് സ്പോണ്സര് തന്നെ പരാതി നല്‍കുകയും പിന്നീട് അയാളുടെ ബന്ധുവീട്ടില്‍നിന്ന് കണ്ടെത്തുകയും ചെയ്തതില്‍ ദുരൂഹത’
ശബരിമല സന്നിധാനത്തെ ദ്വാരപാലക ശില്പത്തിന്റെ സ്വര്‍ണ പീഠം കാണാതായ സംഭവത്തില്‍ ദുരൂഹത നീങ്ങുന്നില്ല. സംഭവത്തിനു പിന്നില്‍ ഗൂഢാലോചന സംശയിക്കുന്നതായാണ് സര്‍ക്കാര്‍ ഭാഗത്തുനിന്ന് ഇപ്പോള്‍ ഉയര്‍ന്നിരിക്കുന്ന ആരോപണം. പീഠം കാണാതായ സംഭവത്തില്‍ അന്വേഷണം ആവശ്യപ്പെട്ട സ്പോണ്സര് ഉണ്ണികൃഷ്ണന്‍ പോറ്റിയുടെ സഹോദരിയുടെ വീട്ടില്‍നിന്ന് തിരുവിതാംകൂര്‍ ദേവസ്വം ബോര്‍ഡ് വിജിലന്‍സ് വിഭാഗമാണ് കഴിഞ്ഞദിവസം സ്വര്‍ണം പൂശിയ പീഠം കണ്ടെത്തിയത്.
സംഭവത്തിനു പിന്നില്‍ ഗൂഢാലോചന സംശയിക്കുന്നതായി ദേവസ്വം മന്ത്രി വിഎന്‍ വാസവന്‍ പറഞ്ഞു. പീഠം കാണാതായെന്ന് സ്പോണ്സര് തന്നെ പരാതി നല്‍കുകയും പിന്നീട് അയാളുടെ ബന്ധുവീട്ടില്‍നിന്ന് തന്നെ അത് കണ്ടെത്തുകയും ചെയ്തതില്‍ ദുരൂഹതയുണ്ട്. ഉണ്ണികൃഷ്ണന്‍ ജനങ്ങളെ വിഡ്ഢികളാക്കുകയാണ്. പീഠം ഒളിച്ചുവെച്ചശേഷം കണ്ടില്ലെന്ന് പറഞ്ഞു പരാതി പറയുന്നതിന് പിന്നില്‍ ഗൂഢാലോചനയുണ്ട്. പീഠം നാലര വര്‍ഷമായി ബന്ധുവിന്റ വീട്ടില്‍ ഉണ്ടായിരുന്നത് തനിക്കറിയില്ലായിരുന്നുവെന്ന ഉണ്ണികൃഷ്ണന്റെ വാദം വിശ്വസിക്കാന്‍ കഴിയില്ല. വിഷയത്തില്‍ വിജിലന്‍സ് എസ് പി നാളെ കോടതിയില്‍ റിപ്പോര്‍ട്ട് സമര്‍പ്പിക്കും. കോടതി എന്ത് നിലപാട് എടുക്കുമെന്ന് നോക്കി ഭാവികാര്യങ്ങളില്‍ തീരുമാനമെടുക്കും.
ശബരിമലയില്‍ വലിയതോതില്‍ അഴിമതി നടക്കുന്നുണ്ടെന്ന പ്രതിപക്ഷ ആരോപണത്തില്‍ കഴമ്പില്ല. എല്ലാ കാര്യങ്ങളും സുതാര്യമായിട്ടാണ് നടക്കുന്നത്. ദേവസ്വം ബോര്‍ഡ് ഭരണത്തില്‍ അഴിമതി നടക്കുന്നുവെന്ന ആക്ഷേപമോ പരാതിയോ സമീപകാലത്ത് ഉണ്ടായിട്ടില്ല. പ്രതിപക്ഷം അവര്‍ ഭരണത്തിലുണ്ടായിരുന്ന കാലത്തെ അഴിമതിയെക്കുറിച്ചാവും ഓര്‍മിച്ചതെന്നും മന്ത്രി പറഞ്ഞു.
ഉണ്ണികൃഷ്ണന്‍ പോറ്റി സ്്‌പോണ്‍സര്‍ ചെയ്ത പീഠം 2021 മുതലാണ് കാണാതായത്. ദ്വാരപാലക ശില്പങ്ങള്‍ക്ക് രണ്ടാമതൊരു പീഠം കൂടി നിര്‍മിച്ച് നല്‍കിയിരുന്നുവെന്ന് അത് കാണാനില്ലെന്നും സ്വര്‍ണപ്പാളി വിവാദത്തിനിടെയാണ് ഉണ്ണികൃഷ്ണന്‍ പോറ്റി വെളിപ്പെടുത്തിയത്. ആദ്യമുണ്ടായിരുന്ന പീഠങ്ങളുടെ നിറം മങ്ങിയപ്പോള്‍ മൂന്ന് പവന്‍ സ്വര്‍ണം ഉപയോഗിച്ചാണ് പീഠം തയാറാക്കിയതെന്നും അതിപ്പോള്‍ കാണാനില്ലെന്നും വിജിലന്‍സ് അന്വേഷിക്കട്ടെയെന്നുമായിരുന്നു അദ്ദേഹം പറഞ്ഞത്. തുടര്‍ന്ന് അന്വേഷണത്തിനിറങ്ങിയ വിജിലന്‍സ്, ഉണ്ണികൃഷ്ണന്‍ പോറ്റിയുടെ സഹോദരിയുടെ വെഞ്ഞാറമൂട് വലിയ കട്ടയ്ക്കാലിലെ വീട്ടില്‍നിന്ന് ശനിയാഴ്ചയാണ് പീഠം കണ്ടെത്തിയത്. തുടര്‍ന്ന് സ്‌ട്രോങ് റൂമിലേക്കു മാറ്റി. ബെംഗളൂരുവില്‍ വ്യവസായിയായ ഉണ്ണികൃഷ്ണന്‍ പോറ്റിയുടെ സ്‌പോണ്‍സര്‍ഷിപ്പില്‍ ചെന്നൈയിലെ സ്മാര്‍ട്ട് ക്രിയേഷന്‍സിലാണ് 2019ല്‍ ദ്വാരപാലക ശില്‍പ്പത്തിന്റെ ചെമ്പുപാളികളില്‍ സ്വര്‍ണം പൂശിയത്.
ഉണ്ണികൃഷ്ണന്‍ പോറ്റിയുടെ ജീവനക്കാരന്‍ വാസുദേവനെ ഇതിനിടയിലാണ് വിജിലന്‍സ് സംഘം ചോദ്യം ചെയ്തതോടെയാണ് പീഠം കണ്ടെത്താനായത്. ശബരിമലയില്‍ സമര്‍പ്പിക്കാനായി 2021ല്‍ നല്‍കിയ പീഠം അളവ് കൃത്യമാകാത്തതിനാല്‍ അറ്റകുറ്റപ്പണിക്കായി അത്് വാസുദേവന്റെ കൈയില്‍ തന്നെ ദേവസ്വം അധികൃതര്‍ തിരിച്ച് നല്‍കിയിരുന്നു. ഇതിനുശേഷം വാസുദേവന്റെ വീട്ടിലെ സ്വീകരണമുറിയിലാണ് പീഠം സൂക്ഷിച്ചിരുന്നത്. പീഠം കാണാനില്ലെന്ന വെളിപ്പെടുത്തലില്‍ കോടതി ഇടപെട്ടതോടെ വാസുദേവന്‍ അത് ഈ മാസം 13ന് ഉണ്ണികൃഷ്ണന്‍ പോറ്റിയെ തിരികെ ഏല്‍പ്പിക്കുകയും അദ്ദേഹം സഹോദരിയുടെ വീട്ടിലേക്ക് മാറ്റുകയായിരുന്നുവെന്നുമാണ് പുറത്തുവന്ന വിവരം.
വാസുദേവന്‍ പീഠം വീട്ടില്‍ സൂക്ഷിച്ചത് ദുരുദ്ദേശ്യത്തോടെയായിരുന്നില്ലെന്നും സംഭവം താനും മറന്നുപോയിരുന്നുവെന്നുമാണ് ഉണ്ണികൃഷ്ണന്‍ പോറ്റി ഇപ്പോള്‍ പറയുന്നത്. ദേവസ്വം അധികൃതര്‍ തിരിച്ച് നല്‍കിയ പീഠം കോവിഡ് കാലമായതിനാല്‍ അറ്റകുറ്റപ്പണി നടത്താന്‍ കഴിയാതിരുന്നതിനാലാണ് വാസുദേവശന്‍ വീട്ടില്‍ സൂക്ഷിച്ചതെന്നും തന്റെ കൈയിലുള്ളതാണ് വിവാദങ്ങള്‍ക്ക് കാരണമായ പീഠമെന്ന് വാസുദേവന്‍ തിരിച്ചറിയുന്നത് വാര്‍ത്തകള്‍ വന്നശേഷമാണെന്നുമാണ് പോറ്റി പറയുന്നത്.
അതേസമയം, പീഠം എടുത്തതുകൊണ്ട് ഉണ്ണികൃഷ്ണനോ വാസുദേവനോ പ്രത്യേകിച്ച് ലാഭമില്ലെന്നും അവര്‍ എന്തിന് അങ്ങനെ ചെയ്തുവെന്നത് വിജിലന്‍സ് അന്വേഷിക്കണമെന്നുമാണ് തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റ് എ പത്മകുമാറിന്റെ പ്രതികരണം. പുതിയ പീഠം കൊണ്ട് വന്നപ്പോള്‍ ശില്‍പ്പവുമായി ചേരുന്നില്ലെന്ന് കണ്ടെത്തി. തിരികെ കൊടുത്തുവിടുമ്പോള്‍ അതുമായി ബന്ധപ്പെട്ട രേഖ ദേവസ്വം ഉദ്യോഗസ്ഥര്‍ തയാറാക്കിയിട്ടുാവുമെന്നു കരുതുന്നു. നടപടികള്‍ എല്ലാം ചെയ്തത് അന്നത്തെ തിരുവാഭരണം കമ്മീഷണര്‍ ഉള്‍പ്പെടെയുള്ള ഉദ്യോഗസ്ഥരാണ്. സ്പോണ്സര് ഉണ്ണികൃഷ്ണനുമായി വ്യക്തിബന്ധമില്ലെന്നും പത്മകുമാര്‍ പറഞ്ഞു.
വിശദമായ അന്വേഷണത്തിന് ഉത്തരവിട്ട് ഹൈക്കോടതി; വിരമിച്ച ജില്ലാ ജഡ്ജി അന്വേഷിക്കും
ശബരിമലയിലെ ദ്വാരപാലക പീഠം സ്പോണ്‍സറുടെ ബന്ധുവീട്ടില്‍നിന്ന് കണ്ടെത്തിയ സംഭവത്തില്‍ വിശദമായ അന്വേഷണം വേണമെന്ന് ഹൈക്കോടതി. ദേവസ്വം ബോര്‍ഡിന്റെ രജിസ്റ്ററുകളില്‍ കൃത്യതയില്ലെന്നു നിരീക്ഷിച്ച കോടതി വിരമിച്ച ജില്ലാ ജഡ്ജിയെ അന്വേഷണത്തിനായി നിയോഗിച്ചു. ദേവസ്വം വിജിലന്‍സ് അന്വേഷണം തുടരണമെന്നും ഹൈക്കോടതി വ്യക്തമാക്കി.
സ്‌ട്രോങ് റൂമില്‍ പരിശോധന നടത്തണം. രേഖകള്‍ പരിശോധിച്ച് സ്വര്‍ണാഭരണങ്ങളുടെ കണക്കെടുക്കണം. തിരുവാഭരണം രജിസ്റ്ററും പരിശോധിക്കണം. എത്ര അളവില്‍ സ്വര്‍ണമുണ്ടെന്നും അതിന്റെ മൂല്യവും പരിശോധിക്കണം. 1999 മുതലുള്ള വിവരങ്ങളില്‍ അവ്യക്തതണ്ട്. രേഖകളുടെയും സ്വത്തിന്റെയും രഹസ്യ സ്വഭാവം കാത്തുസൂക്ഷിക്കണമെന്നും ദേവസ്വം ചീഫ് വിജിലന്‍സ് ഓഫീസര്‍ക്ക് കോടതി നിര്‍ദേശം നല്‍കി. അറ്റകുറ്റപ്പണി പൂര്‍ത്തിയാക്കിയ സ്വര്‍ണപാളിക്കാന്‍ കോടതി അനുമതി നല്‍കി.
