പേരാമ്പ്രയിലെ സംഘർഷവുമായി ബന്ധപ്പെട്ട് പോലീസിനെതിരെ ഗുരുതരമായ ആരോപണങ്ങളുമായി ഷാഫി പറമ്പിൽ എം.പി. രംഗത്ത്. പേരാമ്പ്രയിലെ സംഘർഷം പോലീസ് ബോധപൂർവം സൃഷ്ടിച്ചതാണെന്നും ഇതിന് പിന്നിൽ രാഷ്ട്രീയ നിർദ്ദേശമുണ്ടെന്ന് തനിക്ക് ഉറപ്പുണ്ടെന്നും അദ്ദേഹം കോഴിക്കോട്ട് നടത്തിയ വാർത്താസമ്മേളനത്തിൽ പറഞ്ഞു.
തന്നെ മർദിച്ചത് സി.ഐ. അഭിലാഷ് ഡേവിഡാണ്. ഗുണ്ടാബന്ധത്തിന്റെ പേരിൽ 2023 ജനുവരിയിൽ സർവീസിൽനിന്ന് പിരിച്ചുവിട്ട ഉദ്യോഗസ്ഥരിൽ ഒരാളാണ് അഭിലാഷ് എന്നും ഷാഫി ആരോപിച്ചു.
“മാധ്യമങ്ങളോടും നിയമസഭയിലും ഇയാളെ പിരിച്ചുവിട്ടതായി പറയുക. ശേഷം രഹസ്യമായി സർവീസിൽ തിരിച്ചെടുത്തശേഷം സി.പി.എം. പറയുന്ന ഗുണ്ടാപ്പണിക്ക് ഇവരെ നിയോഗിക്കുക എന്നതാണ് ഇവിടെ സംഭവിച്ചത്. സി.ഐ. അഭിലാഷ് ഡേവിഡ് എന്ന സി.പി.എമ്മിന്റെ പോലീസ് ഗുണ്ടയാണ് പേരാമ്പ്രയിലെ പോലീസ് അതിക്രമത്തിന് നേതൃത്വം നൽകിയത്,” ഷാഫി പറഞ്ഞു.
വടകര കൺട്രോൾ റൂം സി.ഐ. ആയ ഇദ്ദേഹത്തെ സസ്പെൻഡ് ചെയ്തതിൻ്റെ ഉത്തരവ് ഉണ്ടെങ്കിലും പിരിച്ചുവിട്ടതിൻ്റെ ഉത്തരവ് ലഭ്യമല്ലെന്നും ഷാഫി വ്യക്തമാക്കി. അഭിലാഷിന് പഴയ എസ്.എഫ്.ഐ. ബന്ധമുണ്ടായിരുന്നെന്നും സസ്പെൻഷൻ കാലയളവിൽ ഏരിയാ കമ്മിറ്റി ഓഫീസുകൾ സന്ദർശിച്ച് സമയം ചെലവഴിച്ചിരുന്നതായും അദ്ദേഹം കൂട്ടിച്ചേർത്തു. പേരാമ്പ്ര സംഘർഷത്തിൻ്റെ വീഡിയോ ദൃശ്യങ്ങൾ ഉൾപ്പെടെ പങ്കുവെച്ചുകൊണ്ടായിരുന്നു ഷാഫി പറമ്പിലിന്റെ വാർത്താസമ്മേളനം.
പോലീസ് നടപടി ദൃശ്യങ്ങളിൽ:
തൻ്റെ തലയിൽ അടിച്ച അതേ പോലീസ് ഉദ്യോഗസ്ഥൻ തന്നെയാണ് മുഖത്തും അടിച്ചതെന്നും തുടർന്നാണ് മൂക്കിന് പരിക്കേറ്റതെന്നും ഷാഫി പറഞ്ഞു. വീണ്ടും തന്നെ അടിക്കാൻ ശ്രമമുണ്ടായി. എസ്.പി. പറഞ്ഞതുപോലെ പിന്നിൽ നിന്നല്ല, മുന്നിൽനിന്നാണ് മർദിച്ചത്. ഈ സംഭവം നടക്കുമ്പോൾ കണ്ണീർവാതകം പ്രയോഗിച്ചിരുന്നില്ല.
മർദനത്തിൻ്റെ ദൃശ്യങ്ങൾ ചൂണ്ടിക്കാട്ടി അദ്ദേഹം ഇങ്ങനെ പറഞ്ഞു: “ഡിവൈ.എസ്.പി. ഹരിപ്രസാദ് ഒരു കൈയിൽ ടിയർ ഗ്യാസുമായി നിൽക്കുകയും മറുകൈയിലെ ലാത്തി ഉപയോഗിച്ച് മർദിക്കുകയും ചെയ്യുന്നതും ദൃശ്യങ്ങളിൽ വ്യക്തമാണ്.”
പേരാമ്പ്രയിൽ തനിക്കും സഹപ്രവർത്തകർക്കും ക്രൂരമായ മർദനമേറ്റിട്ടും തങ്ങൾ കലാപാന്തരീക്ഷം സൃഷ്ടിച്ചോ എന്നും ഷാഫി ചോദിച്ചു. മർദനമേറ്റയുടൻ ആശുപത്രിയിലേക്ക് പോകാതിരുന്നത് എന്തുകൊണ്ടാണെന്ന ചോദ്യത്തിനും അദ്ദേഹം മറുപടി നൽകി.
“മൂക്കിൻ്റെ പാലം പൊട്ടിയെന്നൊന്നും അപ്പോൾ അറിയില്ലായിരുന്നു. ചോര വരുന്നുണ്ടെന്ന് അറിയാമായിരുന്നു. അങ്ങനൊരിടത്തുനിന്ന് ഓടിപ്പോയാൽ പിന്നീട് അവിടെ ഉണ്ടാകാൻ പോകുന്ന സംഘർഷങ്ങൾ അപകടങ്ങൾ സൃഷ്ടിക്കും. അതിനാൽ, അവിടെനിന്ന് പ്രവർത്തകരോട് പിരിഞ്ഞുപോകാൻ ആവശ്യപ്പെട്ട്, അവരെ പിരിച്ചുവിട്ടതിന് ശേഷമാണ് അവിടെനിന്ന് മടങ്ങിയത്,” ഷാഫി വിശദീകരിച്ചു.
