സംസ്ഥാനത്ത് ഹിന്ദി അടിച്ചേൽപ്പിക്കുന്നത് തടയിടാൻ ലക്ഷ്യമിട്ട് പുതിയ ബിൽ അവതരിപ്പിക്കാൻ ഒരുങ്ങി തമിഴ്നാട്. ഇതു സംബന്ധിച്ച നിയമനിർമ്മാണത്തിനായി വിദഗ്ധരുമായും ഉദ്യോഗസ്ഥ തലത്തിലും യോഗം ചേർന്നതായാണ് വിവരം.
സംസ്ഥാനത്തുടനീളമുള്ള ഹിന്ദി ഹോർഡിംഗുകൾ, ബോർഡുകൾ, സിനിമകൾ, പാട്ടുകൾ എന്നിവയ്ക്ക് വിലക്കേർപ്പെടുത്താൻ ലക്ഷ്യമിട്ടുള്ളതാണ് ഈ ബിൽ. എന്നാൽ, പുതിയ നിയമം ഭരണഘടനയ്ക്ക് അനുസൃതമായിരിക്കും എന്ന് അധികൃതർ ഉറപ്പുനൽകുന്നുണ്ട്. “ഞങ്ങൾ ഭരണഘടനയ്ക്ക് വിരുദ്ധമായി ഒന്നും ചെയ്യില്ല, എങ്കിലും ഹിന്ദി അടിച്ചേൽപ്പിക്കലിന് എതിരാണ്” എന്ന് മുതിർന്ന ഡിഎംകെ നേതാവ് ടി.കെ.എസ്. ഇളങ്കോവൻ പ്രതികരിച്ചു.
സർക്കാർ നടത്തുന്നത് “വിഡ്ഢിത്തവും അസംബന്ധവുമായ നീക്കമാണ്” എന്ന് ബിജെപി നേതാവ് വിനോജ് സെൽവം വിമർശിച്ചു. ഭാഷയെ ഒരു രാഷ്ട്രീയ ഉപകരണമായി ഉപയോഗിക്കരുതെന്നും, വിവാദമായ ഫോക്‌സ്‌കോൺ നിക്ഷേപ പ്രശ്‌നത്തിൽ നിന്ന് ജനശ്രദ്ധ തിരിക്കാൻ ഡിഎംകെ ഭാഷാ തർക്കം ഉപയോഗിക്കുകയാണെന്നും അദ്ദേഹം കുറ്റപ്പെടുത്തി.
ഇതുമായി ബന്ധപ്പെട്ട് നേരത്തെയും തർക്കങ്ങൾ ഉടലെടുത്തിരുന്നു. 2025-26 ലെ സംസ്ഥാന ബജറ്റ് ലോഗോയിൽ ദേശീയ രൂപയുടെ ചിഹ്നമായ ‘₹’ ന് പകരം തമിഴ് അക്ഷരമായ ‘ரூ’ (രു) ഉപയോഗിച്ചത് വിമർശനങ്ങൾക്ക് വഴിവെച്ചിരുന്നു. ഈ മാറ്റത്തിനെതിരെ ബിജെപി നേതാക്കളും കേന്ദ്ര ധനമന്ത്രി നിർമ്മല സീതാരാമനും രംഗത്തെത്തിയിരുന്നു. എന്നാൽ, ദേശീയ ചിഹ്നത്തെ നിരാകരിക്കുകയല്ല, മറിച്ച് തമിഴ് ഭാഷയെ പ്രോത്സാഹിപ്പിക്കാനുള്ള ശ്രമമാണിതെന്നാണ് ഡിഎംകെ ഇതിനെ പ്രതിരോധിച്ചത്.
