മാധ്യമങ്ങൾ ആരോപിക്കുന്ന മകനെ ജനങ്ങൾ കണ്ടിട്ടുണ്ടോ എന്നും, ക്ലിഫ് ഹൗസിൽ എത്ര മുറിയുണ്ടെന്ന് പോലും അവന് അറിയില്ലെന്നും അദ്ദേഹം പറഞ്ഞു
തൻ്റെ രാഷ്ട്രീയ പ്രവർത്തനം സുതാര്യവും കളങ്കരഹിതവുമാണെന്ന് മുഖ്യമന്ത്രി. താൻ തെറ്റായ പ്രവർത്തനങ്ങളൊന്നും ചെയ്തിട്ടില്ലെന്നും, പല ആക്ഷേപങ്ങളെയും ഉള്ളാലെ ചിരിച്ച് തള്ളുകയാണ് പതിവെന്നും അദ്ദേഹം വാർത്താസമ്മേളനത്തിൽ പറഞ്ഞു.
കഴിഞ്ഞ പത്ത് വർഷത്തെ ഭരണത്തിൽ അഭിമാനിക്കാൻ പല കാര്യങ്ങളുണ്ടെന്നും, നാട്ടിൽ നടപ്പാക്കിയ പദ്ധതികൾ അതിനു തെളിവാണെന്നും മുഖ്യമന്ത്രി പറഞ്ഞു. പദ്ധതികൾക്ക് കരാർ നൽകുമ്പോൾ ചിലയിടങ്ങളിൽ മുൻപ് കൃത്യമായ വിഹിതം കമ്മീഷൻ നൽകുന്ന പതിവുണ്ടായിരുന്നു, എന്നാൽ കേരളത്തിൽ ഇപ്പോൾ ആ രീതിയില്ല.
അഴിമതിയുമായി ബന്ധപ്പെട്ട യാതൊന്നും അനുവദിക്കില്ല എന്ന നിർബന്ധ ബുദ്ധി തനിക്കുണ്ട്. രാഷ്ട്രീയ ലക്ഷ്യത്തോടെ വരുന്ന ഏത് ഏജൻസികളുടെ നീക്കങ്ങളും തൻ്റെ മുന്നിൽ വിലപ്പോവില്ല എന്നും അദ്ദേഹം കൂട്ടിച്ചേർത്തു. പൊതുജീവിതം കളങ്കമില്ലാതെ കൊണ്ടുപോകാനാണ് ശ്രമം, അതിൽ തനിക്ക് അഭിമാനമുണ്ട്. ഈ ശ്രമത്തിൽ കുടുംബം ഒപ്പം നിന്നു.
മാധ്യമങ്ങൾ ആരോപിക്കുന്ന മകനെ ജനങ്ങൾ കണ്ടിട്ടുണ്ടോ എന്നും, ക്ലിഫ് ഹൗസിൽ എത്ര മുറിയുണ്ടെന്ന് പോലും അവന് അറിയില്ലെന്നും അദ്ദേഹം പറഞ്ഞു. മക്കൾ തനിക്ക് ഒരു ദുഷ്പേരും ഉണ്ടാക്കിയിട്ടില്ല എന്നും മുഖ്യമന്ത്രി ഉറപ്പിച്ചു പറഞ്ഞു.
