Home / Kerala / രഞ്ജി ട്രോഫിക്കുള്ള കേരള ടീമിനെ അസ്സറുദ്ദീൻ നയിക്കും; സഞ്ജു സാംസൺ ടീമിൽ തിരിച്ചെത്തി

രഞ്ജി ട്രോഫിക്കുള്ള കേരള ടീമിനെ അസ്സറുദ്ദീൻ നയിക്കും; സഞ്ജു സാംസൺ ടീമിൽ തിരിച്ചെത്തി

തമിഴ്‌നാട് താരം ബാബ അപരാജിത്ത് ഉപനായകനാകും. സഞ്ജുവിനെ കൂടാതെ രോഹൻ എസ്. കുന്നുമ്മൽ, സച്ചിൻ ബേബി എന്നിവർ ബാറ്റിംഗ് നിരയ്ക്ക് ശക്തി പകരും

രഞ്ജി ട്രോഫിക്കുള്ള 15 അംഗ കേരള ക്രിക്കറ്റ് ടീമിനെ കേരള ക്രിക്കറ്റ് അസോസിയേഷൻ വെള്ളിയാഴ്ച പ്രഖ്യാപിച്ചു. വിക്കറ്റ് കീപ്പർ ബാറ്റ്‌സ്മാനായ മുഹമ്മദ് അസ്സറുദ്ദീനാണ് ടീമിനെ നയിക്കുക. സൂപ്പർ താരമായ സഞ്ജു സാംസൺ ടീമിൽ ഇടംനേടിയിട്ടുണ്ട്.

തമിഴ്‌നാട് താരം ബാബ അപരാജിത്ത് ഉപനായകനാകും. സഞ്ജുവിനെ കൂടാതെ രോഹൻ എസ്. കുന്നുമ്മൽ, സച്ചിൻ ബേബി എന്നിവർ ബാറ്റിംഗ് നിരയ്ക്ക് ശക്തി പകരും. പ്രധാന ഓൾറൗണ്ടർമാരായി വത്സൽ ഗോവിന്ദ്, അക്ഷയ് ചന്ദ്രൻ എന്നിവരുണ്ട്. പേസ് ആക്രമണത്തിന് നേതൃത്വം നൽകുന്നത് ബേസിൽ എൻ.പി, നിധീഷ് എം.ഡി. എന്നിവരാണ്. യുവതാരങ്ങളായ ഏദൻ ആപ്പിൾ ടോം, അഹമ്മദ് ഇമ്രാൻ എന്നിവരും ടീമിൽ ഇടം നേടിയിട്ടുണ്ട്.

സൽമാൻ നിസാർ, ഷോൺ റോജർ, അഭിഷേക് പി നായർ എന്നിവരാണ് ടീമിലിടം നേടിയ മറ്റ് താരങ്ങൾ. അതേസമയം, കഴിഞ്ഞ സീസണിൽ മികച്ച പ്രകടനം കാഴ്ചവെച്ച ഓൾറൗണ്ടർ ജലജ് സക്‌സേന അടുത്തിടെ ടീം വിട്ട് മഹാരാഷ്ട്രയിലേക്ക് കൂടുമാറിയിരുന്നു. രഞ്ജി ട്രോഫിക്കുള്ള മഹാരാഷ്ട്ര ടീമിൽ അദ്ദേഹം ഇടംനേടിയിട്ടുണ്ട്.

കഴിഞ്ഞ സീസണിൽ രഞ്ജി ഫൈനലിലെത്തിയ കേരള ടീമിലെ നിർണായക താരമായിരുന്നു ജലജ്. 2016 മുതൽ കേരളത്തിനായി കളിച്ച അദ്ദേഹം 2215 റൺസും 269 വിക്കറ്റുകളും നേടിയിട്ടുണ്ട്. മൂന്ന് സെഞ്ച്വറിയും പത്ത് അർദ്ധ സെഞ്ച്വറിയും അദ്ദേഹത്തിൻ്റെ പേരിലുണ്ട്.

ഒക്ടോബർ 15-ന് മഹാരാഷ്ട്രക്കെതിരെയാണ് രഞ്ജി ട്രോഫിയിൽ കേരളത്തിൻ്റെ ആദ്യ മത്സരം.

Tagged:

Leave a Reply

Your email address will not be published. Required fields are marked *