കോൺഗ്രസ് വിട്ട് എൻസിപി യിൽ (Nationalist Congress Party) ചേർന്ന ലതിക സുഭാഷ് തദ്ദേശ തിരഞ്ഞെടുപ്പിൽ കോട്ടയം നഗരസഭയിലേക്ക് മത്സരിക്കും. തിരുനക്കര വാർഡിൽ ലതികയെ സ്ഥാനാര്‍ത്ഥിയായി പ്രഖ്യാപിച്ചു. ഇടതുപക്ഷ ജനാധിപത്യ മുന്നണിയിലെ (LDF) ഘടക കഷിയായ എൻസിപി നഗരസഭയിൽ മത്സരിക്കുന്ന ഏക സീറ്റാണിത്.
അപ്രതീക്ഷിതമായി എത്തിയ സ്ഥാനാർത്ഥിത്വം എന്നായിരുന്നു ലതിക സുഭാഷിന്‍റെ പ്രതികരണം. പാർട്ടി പ്രവർത്തകരുടെ ആവശ്യപ്രകാരമാണ് മത്സരിക്കുന്നതെന്നും അവർ പറഞ്ഞു. എൻസിപി ഏൽപിച്ച ഉത്തരവാദിത്വമാണിത്. എൽഡിഎഫ് അടുക്കും ചിട്ടയുമുള്ള മുന്നണി സംവിധാനമാണെന്നും പാർട്ടിക്കും പ്രവർത്തകർക്കും വിധേയമായി പ്രവർത്തിക്കുന്നവരാണ് മുന്നണിയിൽ ഉള്ളതെന്നും ലതിക പറഞ്ഞു.
കോട്ടയം നഗരസഭയിൽ എൽഡിഎഫ് അധികാരത്തിൽ വരുമെന്നും അവർ പറഞ്ഞു.
2021 ൽ നിയമസഭ സീറ്റ് നൽകാത്തതിനെ തുടർന്ന് കോൺഗ്രസ് നിന്ന് രാജി വച്ച് എൻസിപിയിൽ എത്തിയതാണ് ലതിക സുഭാഷ്. കോൺഗ്രസ് സ്ത്രീകൾക്ക് സീറ്റ് നിഷേധിച്ചതിൽ പ്രതിഷേധിച്ചായിരുന്നു രാജി. മഹിളാ കോൺഗ്രസ് അധ്യക്ഷയായിരുന്നു അവർ. എല്ലാ കാലത്തും മഹിളാ കോൺഗ്രസ് അധ്യക്ഷന്മാർക്ക് സീറ്റ് കൊടുത്തിട്ട് താൻ അധ്യക്ഷയായപ്പോൾ സീറ്റ് കിട്ടിയില്ലെന്നും അവർ ആരോപിച്ചിരുന്നു.
തിരുവനന്തപുരത്ത് കോൺഗ്രസ് ആസ്ഥാനമായ ഇന്ദിരാ ഭവന് മുന്നിൽ കസേരയിട്ടിരുന്ന് മുടി മൊട്ടയടിച്ച് കൊണ്ടാണ് അവർ കോൺഗ്രസിൽ നിന്നുള്ള രാജി പ്രഖ്യാപിച്ചത്.
