ഉണ്ണികൃഷ്ണൻ പോറ്റി പണപ്പിരിവ് നടത്തിയതായി ശ്രദ്ധയിൽപ്പെട്ടിട്ടില്ലെന്നും പൂജ നടത്തിയത് ദക്ഷിണ മാത്രമാണ് നൽകിയതെന്നും ജയറാം വ്യക്തമാക്കി.
ശബരിമല സ്വര്‍ണ്ണപ്പാളി വിവാദത്തില്‍ ആരോപണ വിധേയനായ ഉണ്ണികൃഷ്ണന്‍ പോറ്റി ചെന്നൈയില്‍ പൂജാ ചടങ്ങുകൾ നടത്തിയതിന്റെ ദൃശ്യങ്ങൾ പുറത്ത്. നടൻ ജയറാമിന്റെ ചെന്നൈയിലെ വീട്ടിൽ സ്വർണ്ണപ്പാളി എത്തിച്ചത് സംബന്ധിച്ച വിവരങ്ങളും പുറത്ത് വന്നു. 2019 ലെ ദൃശ്യങ്ങളാണ് പുറത്ത് വന്നത്. ഉണ്ണികൃഷ്ണൻ പോറ്റി ചെന്നൈയിൽ സ്വർണ്ണപ്പാളി പ്രദർശിപ്പിച്ച ചടങ്ങിൽ ജയറാം ഉള്‍പ്പെടെ നിരവധി പ്രമുഖര്‍ പങ്കെടുത്തിരുന്നു.
“ഉണ്ണികൃഷ്ണന്‍ പോറ്റി ക്ഷണിച്ചിട്ടാണ് ചടങ്ങിന് എത്തിയത്. ശബരിമല ശ്രീകോവിലിന്റെ വാതില്‍ എന്നൊക്കെ പറഞ്ഞാണ് ചടങ്ങ് സംഘടിപ്പിച്ചത്. വീരമണിയെ ക്ഷണിച്ചത് താനാണ്. മഹാഭാഗ്യമായാണ് അന്ന് കരുതിയത്. പണപ്പിരിവ് ശ്രദ്ധയിൽപ്പെട്ടിട്ടില്ല, അങ്ങനെയുള്ള കാര്യങ്ങൾ അറിയില്ല,” ജയറാം പ്രതികരിച്ചു.
ഉണ്ണിക്കൃഷ്ണന്‍ പോറ്റിയുടെ സ്വപ്‌നത്തില്‍ താന്‍ വന്നെന്നും അതിനാല്‍ പൂജയില്‍ എന്തായാലും പങ്കെടുക്കാന്‍ അദ്ദേഹം പറഞ്ഞെന്നും ജയറാം പറഞ്ഞു. “എന്റെ സ്വപ്‌നത്തില്‍ കണ്ടു നിങ്ങള്‍ തന്നെ ആ പൂജ ചെയ്യണമെന്ന്, അമ്പത്തൂരിലെ ഫാക്ടറിയില്‍ പൂജ നടക്കും മുന്‍പ് ഉണ്ണിക്കൃഷ്ണന്‍ പോറ്റി തന്നെ വിളിച്ച് പറഞ്ഞു,” ജയറാം വ്യക്തമാക്കി. “ഒരു ഒമ്നി വാനിന്റെ പിറകില്‍ കുറെ പ്ലാസ്റ്റിക് പേപ്പറുകളില്‍ പൊതിഞ്ഞ നിലയിലായിരുന്നു പാളികള്‍ ഉണ്ടായിരുന്നത്. ദേവസ്വം ബോര്‍ഡിലെ മറ്റ് അംഗങ്ങളാരും ഉണ്ടായിരുന്നില്ല,” അദ്ദേഹം കൂട്ടിച്ചേര്‍ത്തു. സ്വര്‍ണ്ണപ്പാളിയിലെ എല്ലാ ഭാഗങ്ങളും തന്റെ വീട്ടിലേക്ക് കൊണ്ടുവന്നിരുന്നൂവെന്ന് ജയറാം മാധ്യമങ്ങളോട് പറഞ്ഞു. എന്നാൽ തന്റെ വീട്ടിലല്ല ദൃശ്യങ്ങളിലുള്ള പൂജ നടന്നതെന്നും അദ്ദേഹം വ്യക്തമാക്കി.
പാളിയില്‍ സ്വർണ്ണം പൂശിയ ശേഷം ശബരിമലയിലേക്ക് കൊണ്ടു പോവുകയാണെന്ന് ഉണ്ണിക്കൃഷ്ണന്‍ പോറ്റി പറഞ്ഞിരുന്നെന്നും ആ സമയത്ത് തന്റെ വീട്ടിലെ പൂജാമുറിയിലേക്ക് അതൊന്ന് കൊണ്ടുവരാന്‍ കഴിയുമോയെന്ന് ചോദിച്ചപ്പോള്‍ അയാള്‍ സമ്മതിക്കുകയായിരുന്നുവെന്നും ജയറാം പറഞ്ഞു. പിന്നീട് പൂജാരിമാരെയും മറ്റും വീട്ടിലെത്തിച്ച് പൂജ നടത്തി.
“എന്റെ പൂജാമുറിയില്‍ സ്വര്‍ണ്ണപ്പാളികള്‍ കൊണ്ടുവന്ന് വലിയ രീതിയില്‍ പൂജ നടത്തിയിരുന്നു. എന്നാല്‍ എന്റെ കൈയിൽ നിന്നും അയാള്‍ പണം വാങ്ങിയിരുന്നില്ല. അത്ര സമയം പൂജ ചെയ്തതിന് ദക്ഷിണ മാത്രമാണ് നല്‍കിയത്. സ്വര്‍ണ്ണപ്പാളി വീട്ടിലെത്തിച്ചതിന് ആറോ ഏഴോ മാസങ്ങള്‍ക്ക് മുന്‍പാണ് ഉണ്ണിക്കൃഷ്ണന്‍ പോറ്റിയെ പരിചയപ്പെടുന്നത്. ഇപ്പോള്‍ ആറ് വര്‍ഷത്തെ പരിചയമുണ്ടാകും. മകര വിളക്കിന് പോകുമ്പോള്‍ സ്ഥിരമായി ഉണ്ണിക്കൃഷണന്‍ പോറ്റിയെ കാണാറുണ്ടായിരുന്നു. അദ്ദേഹം തന്നെ ഇങ്ങോട്ട് വന്ന് പരിചയപ്പെടുകയായിരുന്നു,” ജയറാം പറഞ്ഞു.
