മുസ്ലീം ലീഗ് ഒരു സാമുദായിക സംഘടന മാത്രമല്ല, ന്യൂനപക്ഷ സംഘടന കൂടിയാണെന്നും കെ.എം. ഷാജി ഓർമ്മിപ്പിച്ചു.
സമുദായത്തിന് വേണ്ടി വാദിക്കുന്നതിൻ്റെ പേരിൽ തന്നെ വർഗീയവാദിയാക്കി ചിത്രീകരിക്കുന്നത് ഇരട്ടത്താപ്പാണെന്ന് മുസ്ലീം ലീഗ് സംസ്ഥാന സെക്രട്ടറി കെ.എം. ഷാജി. സമുദായത്തിന് വേണ്ടി വാദിക്കുന്നുണ്ടെങ്കിൽ, താൻ ഒരു വർഗീയവാദി തന്നെയാണെന്നും, അതിൽ യാതൊരു സംശയവുമില്ലെന്നും അദ്ദേഹം വ്യക്തമാക്കി.
“ഞാൻ സമുദായത്തിന് വേണ്ടി വാദിച്ചാൽ വർഗീയവാദി. എന്നാൽ, വെള്ളാപ്പള്ളി (നടേശൻ) മറ്റ് സമുദായങ്ങളെ ആക്ഷേപിച്ചാൽ നവോത്ഥാന നായകൻ. ഇതെന്തൊരു തമാശയാണെന്ന്” ഷാജി ചോദിച്ചു. വെള്ളാപ്പള്ളി ഈഴവ സമുദായത്തിന് വേണ്ടി വാദിക്കുകയല്ല, മറിച്ച് മുസ്ലിങ്ങളെ ആക്ഷേപിക്കുകയും പരിഹസിക്കുകയും ചീത്ത വിളിക്കുകയുമാണ് ചെയ്യുന്നതെന്നും അദ്ദേഹം കുറ്റപ്പെടുത്തി. എന്നിട്ടും വെള്ളാപ്പള്ളി നവോത്ഥാന നായകനാവുകയും, സമുദായത്തിന് വേണ്ടി അവകാശവാദം ഉന്നയിക്കുന്ന താൻ വർഗീയവാദിയാവുകയും ചെയ്യുന്നതിലെ വൈരുധ്യമാണ് ഷാജി ഉയർത്തിക്കാട്ടിയത്.
മുസ്ലീം ലീഗ് ഒരു സാമുദായിക സംഘടന മാത്രമല്ല, ന്യൂനപക്ഷ സംഘടന കൂടിയാണെന്നും കെ.എം. ഷാജി ഓർമ്മിപ്പിച്ചു. ന്യൂനപക്ഷങ്ങളുടെ മേൽ കുതിരകയറി ഭരണം നിലനിർത്താമെന്ന് സി.പി.എം. വിചാരിക്കുന്നുണ്ടെങ്കിൽ, അതിനെ പ്രതിരോധിക്കാൻ ലീഗ് ഇവിടെ ഉണ്ടാകുമെന്നും അദ്ദേഹം കൂട്ടിച്ചേർത്തു.
ഷാജി വഹാബിയാണെന്ന ഉമർ ഫൈസിയുടെ വിമർശനത്തിന് മറുപടിയായി, “സഖാക്കൾ അത്തരത്തിൽ പലതരം ആരോപണങ്ങളും ഉന്നയിക്കാറുണ്ടെന്ന” പരിഹാസ രൂപേണയുള്ള മറുപടി നൽകി. സുന്നിയാകാൻ ആരുടെയും സർട്ടിഫിക്കറ്റ് വാങ്ങേണ്ട ഗതികേട് തനിക്കില്ലെന്നും കെ.എം. ഷാജി പറഞ്ഞു.
