പള്ളുരുത്തിയിലെ ഹിജാബ് വിവാദത്തിൽ മകൾക്ക് ട്രാൻസ്ഫർ സർട്ടിഫിക്കറ്റ് (ടി.സി.) വാങ്ങി മറ്റൊരു സ്കൂളിൽ ചേർക്കാനുള്ള തീരുമാനത്തിൽ ഉറച്ചുനിൽക്കുകയാണെന്ന് പിതാവ് ആവർത്തിച്ചു വ്യക്തമാക്കി. കുട്ടിക്ക് മാനസിക സമ്മർദ്ദമുണ്ട് എന്നും അതിനാലാണ് കുടുംബം ഇങ്ങനെയൊരു തീരുമാനമെടുത്തതെന്നും അദ്ദേഹം പറഞ്ഞു. “മതേതര വേഷം അനുവദിക്കുമെന്നാണ് സ്കൂളിന്റെ വാദം. എൻ്റെ മകൾ ധരിച്ച ഷാൾ മതേതരമല്ലേ? എന്നും പിതാവ് ആരാഞ്ഞു.
കുട്ടിക്കും കുടുംബത്തിനും എതിരെ വ്യാജ പ്രചാരണങ്ങൾ നടക്കുന്നുണ്ടെന്നും ഇതിന് പിന്നിലുള്ളവർക്കെതിരെ നിയമനടപടി സ്വീകരിക്കുമെന്നും പിതാവിൻ്റെ അഭിഭാഷകൻ കൂട്ടിച്ചേർത്തു.
നേരത്തെ, ഹൈക്കോടതിയിൽ നിന്ന് സംരക്ഷണം ലഭിച്ച സ്കൂളിലെ പ്രിൻസിപ്പൽ സിസ്റ്റർ ഹെലീന ആൽബി കോടതിക്ക് നന്ദി അറിയിച്ചിരുന്നു. വിദ്യാഭ്യാസമന്ത്രിയോടും അവർ നന്ദി പറഞ്ഞു. സ്കൂളിലെ നിയമങ്ങൾ പാലിച്ചാൽ വിദ്യാർത്ഥിക്ക് തുടർന്നും പഠിക്കാമെന്നും അവർ മാധ്യമങ്ങളോട് പറഞ്ഞു.
“സ്കൂളിന് സംരക്ഷണം നൽകിയ ഹൈക്കോടതിക്ക് ഞങ്ങൾ നന്ദി പറയുന്നു. സ്കൂളിന്റെ നിയമങ്ങൾ അനുസരിച്ചാൽ വിദ്യാർത്ഥിക്ക് തുടർന്ന് പഠിക്കാം. കുട്ടികൾക്ക് ആവശ്യമായതെല്ലാം സ്കൂൾ നൽകുന്നുണ്ട്. ടി.സി. വാങ്ങാനുള്ള തീരുമാനം ഞങ്ങളുടെ ശ്രദ്ധയിൽപ്പെട്ടിട്ടില്ല. കോടതിയെയും സർക്കാരിനെയും ഞങ്ങൾ ബഹുമാനിക്കുന്നു. കോടതിയുടെ പരിഗണനയിലുള്ള കാര്യങ്ങളിൽ നിയമം നിയമത്തിന്റെ വഴിക്ക് പോകും,” സിസ്റ്റർ ഹെലീന ആൽബി പറഞ്ഞു.
