ശബരിമലയിൽ ഇന്ന് മുതൽ കൂടുതൽ നിയന്ത്രങ്ങൾ. മണ്ഡലകാലത്തിന്റെ രണ്ടാം ദിവസമായ ഇന്നലെയുണ്ടായ അസാധാരണമായ തിരക്ക് കണക്കിലെടുത്താണ് നിയന്ത്രണങ്ങൾ കർശനമാക്കുന്നത്. ഇന്ന് നട തുറന്നത് മുതല്‍ ദര്‍ശനം സുഗമമായി നടക്കുന്നുണ്ട്. തിരക്ക് നിയന്ത്രിക്കുന്നതിനായി തൃശൂരില്‍ നിന്നുള്ള എന്‍ഡിആര്‍എഫിന്റെ (NDRF) ആദ്യ സംഘം സന്നിധാനത്ത് എത്തി. ചെന്നൈയില്‍ നിന്നുള്ള അടുത്ത സംഘം വൈകിട്ടോടെ എത്തും. കൂടുതല്‍ കേന്ദ്രസേന വൈകാതെ എത്തുമെന്ന് ഡിജിപി റവാഡ ചന്ദ്രശേഖര്‍ അറിയിച്ചു
ആശങ്കകരമായ സാഹചര്യം ഇന്ന് ശബരിമലയിൽ ഇല്ലെന്ന് ദേവസ്വം ബോർഡ് പ്രസിഡന്റ് കെ ജയകുമാർ പറഞ്ഞു. സ്ഥിതിഗതികൾ നിയന്ത്രണ വിധേയമാണ്. വകുപ്പുകൾ തമ്മിലെ ഏകോപനത്തിൽ പ്രശ്നമില്ലെന്നും ജയകുമാർ പറഞ്ഞു. ഇന്നലത്തെ തിരക്ക് ഭയാനകമെന്നും അപകടകരമായ തരത്തിലുള്ളതെന്നുമാണ് ജയകുമാർ വിശേഷിപ്പിച്ചത്.
നിലയ്ക്കലില്‍ നിന്ന് പമ്പയിലേക്കുള്ള പ്രവേശനം നിയന്ത്രിക്കും. സന്നിധാനത്തെ തിരക്ക് വിലയിരുത്തിയ ശേഷമാണ് ഇപ്പോൾ നിലയ്ക്കലില്‍ നിന്ന് പമ്പയിലേക്ക് തീര്‍ത്ഥാടകരെ കടത്തി വിടുന്നത്. നിയന്ത്രണങ്ങളുടെ ഭാഗമായി സ്പോട്ട് ബുക്കിങ് 20,000 ആയി പരിമിതപ്പെടുത്തി. പമ്പയിലെ സ്പോട്ട് ബുക്കിങ്ങ് താത്ക്കാലികമായി നിർത്തി.
നിലയ്ക്കലില്‍ ഏഴ് സ്പോട്ട് ബുക്കിങ്ങ് ബൂത്തുകള്‍ അധികമായി പ്രവർത്തനം ആരംഭിക്കും. ഭക്തര്‍ക്ക് തങ്ങാന്‍ നിലയ്ക്കലില്‍ സൗകര്യമൊരുക്കും. മരക്കൂട്ടം, ശരംകുത്തി സന്നിധാനം പാതയിലെ ക്യൂ കോംപ്ലക്സുകളിൽ കൂടുതല്‍ ജീവനക്കാരെ നിയോഗിക്കും. ക്യൂ കോംപ്ലക്‌സുകളില്‍ ഭക്തര്‍ക്ക് കുടിവെള്ളവും ലഘുഭക്ഷണവും ചുക്കു കാപ്പിയും നല്‍കും. ദര്‍ശനം പൂര്‍ത്തിയാക്കിയാൽ നിശ്ചിത സമയത്തിനുള്ളില്‍ തന്നെ ഭക്തര്‍ക്ക് മടങ്ങി പോകാന്‍ സാഹചര്യമൊരുക്കും. ക്യൂവിൽ നിന്നിട്ടും ദർശനം നടത്താൻ കഴിയാത്തവർക്ക് അടുത്ത ദിവസം ദര്‍ശനത്തിനുള്ള ക്രമീകരണം ഏര്‍പ്പെടുത്തും.
വിര്‍ചല്‍ ക്യൂ ബുക്കിങ്ങിലൂടെ 70,000 പേരേയും സ്പോട്ട് ബുക്കിങ്ങിലൂടെ 20,000 പേരേയും ഉള്‍പ്പടെ പരമാവധി 90,000 പേർക്കാണ് ഒരു ദിവസം ദര്‍ശനം അനുവദിക്കുക. സന്നിധാനം, പമ്പ, നിലയ്ക്കല്‍ എന്നിവിടങ്ങളിലായി സുരക്ഷയ്ക്കായി 3500 പൊലീസുകാരെ വിന്യസിച്ചിട്ടുണ്ട്.
അതേസമയം തിരക്ക് മൂലം ഇന്നലെ ദർശനം നടത്താൻ കഴിയാതെ പന്തളത്ത് വച്ച് മടങ്ങിയ ഭക്തരെ പോലീസ് കോർഡിനേറ്റർ എഡിജിപി എസ് ശ്രീജിത്ത് തിരികെ വിളിച്ചു. ഫോണിൽ വിളിച്ച് മടങ്ങി പോകരുതെന്നും പോലീസ് സുരക്ഷയിൽ ദർശനം അനുവദിക്കുമെന്നും ശ്രീജിത്ത് അറിയിച്ചു.
