തദ്ദേശ തെരഞ്ഞെടുപ്പിനുള്ള യുഡിഎഫിന്റെ (UDF) പ്രചരണ പരിപാടികള്‍ ആരംഭിച്ചു. ഇതുവരെ കേരളം ഭരിച്ച ഇടതു മുന്നണി സര്‍ക്കാരിന്റെ ദുര്‍ ഭരണത്തെ ജനങ്ങള്‍ അവരുടെ മനഃസാക്ഷിയുടെ കേടതിയില്‍ വിചാരണ ചെയ്യുന്നതിനുള്ള അവസരമാക്കി ഈ തെരഞ്ഞെടുപ്പിനെ മാറ്റും. അതിന്റെ ഭാഗമായുള്ള കുറ്റപത്രമാണ് യുഡിഎഫ് അവതരിപ്പിക്കുന്നതെന്ന് നേതാക്കൾ തിരുവനന്തപുരത്ത് വാർത്താസമ്മേളനത്തിൽ പറഞ്ഞു.
തദ്ദേശ തെരഞ്ഞെടുപ്പുമായി ബന്ധപ്പെട്ട് യുഡിഎഫ് പുറത്തിറക്കുന്ന പ്രകടനപത്രിക 24-ന് കൊച്ചിയില്‍ പ്രകാശനം ചെയ്യും. ആദ്യ ഘട്ടത്തില്‍ സര്‍ക്കാരിന്റെ ചെയ്തികള്‍ക്ക് എതിരായ കുറ്റപത്രവും രണ്ടാം ഘട്ടത്തില്‍ അധികാര വികേന്ദ്രീകരണത്തിന്റെ വ്യക്തമായ ലക്ഷ്യങ്ങള്‍ കൈവരിക്കുന്നതിനുള്ള മാറ്റങ്ങള്‍ പ്രഖ്യാപിച്ചുള്ള പ്രകടന പത്രികയും പുറത്തിറക്കും.
എല്‍ഡിഎഫിന്റെ കാലഘട്ടത്തില്‍ നല്ല വികാസം വന്നെന്നും യുഡിഎഫ് ഭരണകാലത്ത് അധോഗതിയിലേക്ക് പോയെന്നുമാണ് മുഖ്യമന്ത്രി പറഞ്ഞത്. എന്നാല്‍ എല്‍ഡിഎഫിന്റെ കാലത്ത് വികാസം ഉണ്ടായത് സിപിഎമ്മുകാരുടെ പോക്കറ്റുകള്‍ക്കാണ്. അല്ലാതെ ഒരു വികാസവും ഈ നാട്ടില്‍ ഉണ്ടായിട്ടില്ല.
ഈ സര്‍ക്കാരിന്റെ കാലത്താണ് ശബരിമലയിലെ സ്വര്‍ണം കൊള്ളയടിച്ചെന്ന ഞെട്ടിക്കുന്ന വാര്‍ത്ത വന്നത്. അയ്യപ്പന്റെ ശ്രീകോവിലിന്റെ വാതിലും കട്ടിളപ്പടിയും ദ്വാരപാലക ശില്‍പങ്ങളുമാണ് കൊള്ളയടിച്ചത്. ഇതെല്ലാം 2019-ലാണ് നടന്നത്. അന്നത്തെ ദേവസ്വം ബോര്‍ഡ് പ്രസിഡന്റുമാരുടെയും ദേവസ്വം മന്ത്രി ഉള്‍പ്പെടെയുള്ള രാഷ്ട്രീയ നേതൃത്വത്തിന്റെയും അറിവോടെയാണ് ഈ കൊള്ള നടന്നത്. ഈ സംഭവങ്ങള്‍ എല്ലാം അറിഞ്ഞിട്ടും മുന്‍ ദേവസ്വം ബോര്‍ഡും നിയമം ലംഘിച്ച് ദ്വാരപാലക ശില്‍പങ്ങള്‍ പുറത്തേക്ക് കൊണ്ടു പോകാന്‍ ശ്രമിച്ചു.
കേസ് അന്വേഷിച്ച് കഴിയുമ്പോള്‍ മൂന്ന് മുന്‍ ദേവസ്വം ബോര്‍ഡ് പ്രസിഡന്റുമാര്‍ അഴികള്‍ക്കുള്ളിലാകും. ശരിയായ രീതിയില്‍ അന്വേഷിച്ചാല്‍ ഇപ്പോഴത്തെ ദേവസ്വം മന്ത്രിയും മുന്‍ ദേവസ്വം മന്ത്രിയും ജയിലിലാകും. അവരുടെ കൂടി അറിവോടെയാണ് ഒരു തവണ കൊള്ള നടന്നതും രണ്ടാം തവണ കൊള്ളയ്ക്ക് ശ്രമം നടത്തിയതും.
ശബരിമല തീര്‍ത്ഥാടനം
തെരഞ്ഞെടുപ്പ് നടപടിക്രമങ്ങള്‍ നിലവില്‍ വന്നതു കൊണ്ടാണ് മുന്നൊരുക്കങ്ങള്‍ നടത്താത്തതെന്നാണ് ദേവസ്വം മന്ത്രി പറഞ്ഞത്. ഈ മാസം പത്തിനാണ് തെരഞ്ഞെടുപ്പ് പ്രഖ്യാപിച്ചത്. ഒരാഴ്ച മുന്‍പ് മാത്രമാണോ ശബരിമല തീര്‍ത്ഥാടനത്തിനുള്ള തയ്യാറെടുപ്പുകള്‍ നടത്തുന്നത്?
യുഡിഎഫ് സര്‍ക്കാരിന്റെ കാലത്ത് മുഖ്യമന്ത്രിയായിരുന്ന ഉമ്മന്‍ ചാണ്ടി പമ്പയില്‍ പോയാണ് ഏകോപനത്തിനായി വിവിധ വകുപ്പുകളുടെ യോഗം വിളിച്ചത്. ശബരിമലയിലെ പ്രശ്‌നങ്ങള്‍ പരിഹരിക്കാന്‍ സര്‍ക്കാര്‍ അടിയന്തരമായി ശ്രമിച്ചില്ലെങ്കില്‍ യുഡിഎഫ് പ്രതിനിധി സംഘം ശബരിമല സന്ദര്‍ശിക്കും.
കൂപ്പുകുത്തിയ ധനസ്ഥിതി
രാഷ്ട്രീയ ഭരണ ചരിത്രത്തിലെ ഏറ്റവും പരിതാപകരമായ സ്ഥിതിയിലേക്ക് സംസ്ഥാനത്തിന്റെ ധനസ്ഥിതി കൂപ്പുകുത്തി. ഖജനാവില്‍ അഞ്ച് പൈസയില്ല. നാലരലക്ഷം കോടിയില്‍ അധികമാണ് സംസ്ഥാനത്തിന്റെ കടം. ഇതുകൂടാതെ കിഫ്ബിയുടെ കടം 20000 കോടി രൂപയും പെന്‍ഷന്‍ കമ്പനിയുടെയും കടം 13000 കോടി രൂപയുമാണ്.
ഇവര്‍ അധികാരം വിട്ടൊഴിയുമ്പോള്‍ ആറു ലക്ഷത്തോളം കോടി രൂപയുടെ കടബാധ്യതയിലേക്ക് സംസ്ഥാനത്തെ തള്ളിവിടും. കടമെടുത്തിരിക്കുന്ന പണത്തില്‍ നിന്നും അഞ്ച് ശതമാനം മാത്രമാണ് വികസന പ്രവര്‍ത്തനങ്ങള്‍ക്ക് ഉപയോഗിച്ചിരിക്കുന്നതെന്നാണ് സി.എ.ജി റിപ്പോര്‍ട്ടില്‍ കണ്ടെത്തിയിരിക്കുന്നത്.
കഴിഞ്ഞ പത്തു മാസമായി ഇന്ത്യയില്‍ ഏറ്റവും വിലക്കയറ്റമുള്ള സംസ്ഥാനങ്ങളില്‍ കേരളത്തിനാണ് ഒന്നാം സ്ഥാനം. പച്ചക്കറി ഉള്‍പ്പെടെ നിത്യോപയോഗ സാധനങ്ങള്‍ക്കും രൂക്ഷമായ വിലക്കയറ്റമുണ്ടായി. എന്നിട്ടും സര്‍ക്കാര്‍ ചെറുവിരല്‍ അനക്കുന്നില്ല. വിപണി ഇടപെടലിന് തയാറാകുന്നില്ല.
തകർന്ന ആരോഗ്യ, വിദ്യാഭ്യാസ മേഖല
കേരളത്തിന് അഭിമാനകരമായിരുന്ന ആരോഗ്യ- വിദ്യാഭ്യാസ മേഖലകള്‍ തകര്‍ത്ത് തരിപ്പണമാക്കി. ആരോഗ്യ കേരളം വെന്റിലേറ്ററിലായി. സിസ്റ്റം പൂര്‍ണമായും തകര്‍ന്നെന്നാണ് മന്ത്രി പറയുന്നത്. സര്‍ക്കാര്‍ ആശുപത്രികളില്‍ മരുന്നില്ല. മെഡിക്കല്‍ കോളജ് ആശുപത്രിയില്‍ സര്‍ജറിക്ക് പോകുന്ന രോഗികള്‍ മരുന്നും സൂചിയും നൂലും കത്രികയും പഞ്ഞിയും വാങ്ങിക്കൊണ്ട് പോകേണ്ട സ്ഥിതിയിലാണ്. പഞ്ഞി പോലും ഇല്ലാത്ത സ്ഥിതിയിലേക്ക് കേരളത്തിലെ മെഡിക്കല്‍ കോളജുകളെ ഈ സര്‍ക്കാര്‍ മാറ്റി.
ലക്ഷക്കണക്കിന് കുട്ടികളാണ് ഉന്നത പഠനത്തിന് വിദേശത്തേക്ക് പോകുന്നത്. സര്‍വകലാശാലകളില്‍ വൈസ് ചാന്‍സലര്‍മാരില്ല. 66 കോളജുകളില്‍ പ്രിന്‍സിപ്പല്‍മാരില്ല. സര്‍വകലാശാലകളിലും കോളജുകളിലും അനാഥത്വമാണ്. കാലഹരണപ്പെട്ട കോഴ്‌സുകളാണ് പല സര്‍വകലാശാലകളിലുമുള്ളത്. കാലം മാറുന്നതിന് അനുസരിച്ച് ഒന്നും ചെയ്യാന്‍ സര്‍ക്കാര്‍ തയാറാകുന്നില്ല.
തകർന്ന കാര്‍ഷിക മേഖല
കാർഷിക മേഖലയും പൂര്‍ണമായും തകര്‍ന്നു. സംഭരിക്കാത്തതിനെ തുടര്‍ന്ന് കര്‍ഷകര്‍ പണിയെടുത്ത് കൊയ്തു കൂട്ടുന്ന നെല്ല് മഴയെടുക്കുകയാണ്. നെല്ല് സംഭരണവും നാളികേര സംഭരണവും നടക്കുന്നില്ല. റബര്‍ മേഖല പൂര്‍ണമായും തകര്‍ന്നു. വന്യജീവി ആക്രമണത്തില്‍ ജനങ്ങളെ സര്‍ക്കാര്‍ വിധിക്ക് വിട്ടുകൊടുത്തിരിക്കുകയാണ്. ഇത്രമാത്രം തകര്‍ച്ച കാര്‍ഷിക മേഖലയില്‍ ഏതുകാലത്തെങ്കിലും ഉണ്ടായിട്ടുണ്ടോ?
കേരളത്തെ ലഹരി മരുന്നിന്റെ തലസ്ഥാനമാക്കി മാറ്റി. ലഹരി ഉപയോഗിക്കുന്നവര്‍ക്ക് എതിരെ മാത്രമാണ് കേസെടുക്കുന്നത്. എവിടെ നിന്നാണ് ലഹരി എത്തുന്നതെന്നതു സംബന്ധിച്ച് ഒരു അന്വേഷണവുമില്ല.
