ജനാധിപത്യത്തെ കശാപ്പ് ചെയ്താണ് തെരഞ്ഞെടുപ്പിന് മുമ്പേ കണ്ണൂരില് സിപിഎം സ്ഥാനാര്ത്ഥികള് വിജയം ആഘോഷിക്കുന്നതെന്ന് പ്രതിപക്ഷ നേതാവ് വിഡി സതീശൻ. ഗുണ്ടായിസം കാട്ടിയും ഭയപ്പെടുത്തിയും എതിര് സ്ഥാനാര്ത്ഥികളെയോ എതിര് രാഷ്ട്രീയത്തെയോ അനുവദിക്കാത്ത ഒരു പാര്ട്ടിയുടെ കാടത്തമാണ് സിപിഎമ്മിന്റെ ആഘോഷങ്ങളിലൂടെ പുറത്തു വരുന്നത്.
സംസ്ഥാന സെക്രട്ടറിയുടെ വാര്ഡില് പോലും സിപിഎം ക്രിമിനലുകള് യുഡിഎഫ് സ്ഥാനാര്ത്ഥികളാകാന് തയാറായവരെ ഭീഷണിപ്പെടുത്തി. പഞ്ചായത്തിലും സ്വന്തം വാര്ഡിലും ജില്ലയിലും ജനാധിപത്യവും സ്വാതന്ത്ര്യവും അനുവദിക്കാത്ത പിണറായി വിജയനും എം.വി ഗോവിന്ദനുമാണ് ഫാഷിസ്റ്റു വിരുദ്ധ ക്ലാസെടുക്കുന്നതെന്ന് വിഡി സതീശൻ പ്രസ്താവനയിൽ പറഞ്ഞു.
ജനാധിപത്യത്തിന് എന്തൊരു അപമാനമാണിത്? ബംഗാളിലും ത്രിപുരയിലും ഇതിനേക്കാള് വിലയ പാര്ട്ടി ഗ്രാമങ്ങള് ഉണ്ടായിരുന്നെന്നത് സിപിഎം മറക്കരുത്. ബംഗാളിലെ അവസാനകാലത്തുണ്ടായിരുന്നതിനേക്കാള് ജനാധിപത്യ വിരുദ്ധമായും മാഫിയാ സംഘമായുമാണ് കേരളത്തില് സിപിഎം പ്രവര്ത്തിക്കുന്നത്.
യുഡിഎഫ് സ്ഥാനാര്ത്ഥികളുടെ നാമനിര്ദ്ദേശ പത്രികകള് സൂക്ഷ്മ പരിശോധനയില് നിയമവിരുദ്ധമായി തള്ളാന് സിപിഎം ഫ്രാക്ഷന് പോലെ ഒരു സംഘം തെരരഞ്ഞെടുപ്പ് ഉദ്യോഗസ്ഥര് പ്രവര്ത്തിച്ചു. സിപിഎം ക്രിമിനല് സംഘത്തിന്റെ ഭീഷണിയുള്ള കണ്ണൂര് ജില്ലയിലെ മലപ്പട്ടത്തും കണ്ണപുരത്തും ആന്തൂരിലും ഇത് വ്യക്തമായിരുന്നു.
മലപ്പട്ടം പഞ്ചായത്തില് യുഡിഎഫ് സ്ഥാനാര്ത്ഥിയുടെ പത്രിക തള്ളാന് വരണാധികാരിക്ക് മുന്നില് സ്ഥാനാര്ത്ഥി ഇട്ട ഒപ്പ് വ്യാജമാണെന്ന വിചിത്രമായ കണ്ടെത്തലാണ് ഉദ്യോഗസ്ഥന് നടത്തിയത്. എറണാകുളം കടമക്കുടി ജില്ലാ പഞ്ചായത്ത് ഡിവിഷനില് തിരുത്തിയ പത്രിക സമര്പ്പിക്കാന് എത്തിയ യുഡിഎഫ് സ്ഥാനാര്ത്ഥി വരണാധികാരിക്ക് മുന്നില് എത്തുന്നത് വൈകിപ്പിക്കാന് പൊലീസ് ഉദ്യോഗസ്ഥര് ശ്രമിച്ച സംഭവവും ഉണ്ടായി. പാലക്കാട് അട്ടപ്പാടിയില് എതിര് സ്ഥാനാര്ത്ഥിയെ തട്ടിക്കളയുമെന്നാണ് സിപിഎം ലോക്കല് സെക്രട്ടറിയുടെ ഭീഷണി.
കണ്ണൂര്, കാസര്കോട് ജില്ലകളില് ഖാദി ബോര്ഡിലെ താല്ക്കാലിക ജീവനക്കാരായ നാല് സിപിഎം സ്ഥാനാര്ത്ഥികളുടെ പത്രിക അംഗീകരിച്ച തെരഞ്ഞെടുപ്പ് കമ്മിഷന് എറാണകുളം ആലങ്ങാട് ബ്ലോക്ക് പഞ്ചായത്ത് സ്ഥാനാര്ത്ഥിയുടെ പത്രിക ഖാദി ബോര്ഡ് താല്ക്കാലിക ജീവനക്കാരിയാണെന്ന കാരണം ചൂണ്ടിക്കാട്ടിയാണ് തള്ളിയത്. തിരഞ്ഞെടുപ്പ് ഉദ്യോഗസ്ഥരുടെ പക്ഷപാതപരമായ നടപടിയെ യുഡിഎഫ് നിയമപരമായി നേരിടുമെന്നും സതീശൻ പറഞ്ഞു.
