ഒടുവിൽ പാലക്കാട് എംഎൽഎ രാഹുൽ മാങ്കൂട്ടത്തിലെനെതിരെ ലൈംഗിക പീഡന വിഷയത്തിൽ പരാതി. യൂത്ത് കോൺഗ്രസ് മുൻ സംസ്ഥാന അധ്യക്ഷൻ കൂടിയായ രാഹുൽ മാങ്കൂട്ടത്തിലിനെതിരെ യുവതി മുഖ്യമന്ത്രി പിണറായി വിജയന് പരാതി നൽകി. സംഭവത്തിൽ അടിയന്തര ഇടപെടൽ ആവശ്യപ്പെട്ടാണ് യുവതി മുഖ്യമന്ത്രിയെ സമീപിച്ചിരിക്കുന്നത്. പരാതി ക്രൈംബ്രാഞ്ചിന് കൈമാറുമെന്നാണ് റിപ്പോർട്ടുകൾ സൂചിപ്പിക്കുന്നത്. വാട്ട്സപ്പ് ചാറ്റുകൾ, ഓഡിയോ സംഭാഷണം അടക്കം കൈമാറിയതാണ് വിവരം. ഉച്ചയോടെ ആണ് യുവതി പരാതി നൽകിയത്.
രാഹുൽ മാങ്കൂട്ടത്തിൽ യുവതിയെ ഗർഭിണിയാക്കിയതും ഗർഭഛിദ്രം ചെയ്യാൻ നിർബന്ധിച്ചതുമായ സംഭാഷണങ്ങൾ അടങ്ങിയ ഓഡിയോ ക്ലിപ്പുകൾ ടെലിവിഷൻ ചാനലുകൾ പുറത്ത് വിട്ടിരുന്നു. പലപ്പോഴായി പുറത്തു വന്ന ഓഡിയോ ക്ലിപ്പുകളിൽ ഗർഭഛിദ്രം നടത്താൻ കഴിയാത്ത ശാരീരിക, മാനസിക പ്രശ്നങ്ങൾ യുവതി വിവരിക്കുമ്പോൾ രാഹുൽ അവരോട് അസഭ്യം കലർന്ന രീതിയിലാണ് പ്രതികരിക്കുന്നത്.
ആദ്യ തവണ ഓഡിയോ ക്ലിപ്പ് പുറത്തു വന്നപ്പോൾ പാർട്ടി നിർദ്ദേശ പ്രകാരം രാഹുൽ യൂത്ത് കോൺഗ്രസ് അധ്യക്ഷ സ്ഥാനം രാജി വച്ചിരുന്നു. എന്നാൽ എംഎൽഎ സ്ഥാനം രാജി വയ്ക്കണമെന്ന ആവശ്യത്തെ പ്രതിരോധിച്ചിരുന്നത് രാഹുലിനെതിരെ പരാതി ഇല്ലെന്ന കാരണം പറഞ്ഞായിരുന്നു. പാർട്ടി നിർദ്ദേശം മറി കടന്ന് തദ്ദേശ തെരഞ്ഞെടുപ്പ് പ്രചരണത്തിൽ രാഹുൽ സജീവമായത് മുതിർന്ന കോൺഗ്രസ് നേതാക്കളിൽ അതൃപ്തി ഉണ്ടാക്കിയിരുന്നു. അതേ സമയം, ഒരിക്കൽ പോലും ഓഡിയോ ക്ലിപ്പുകളിലെ ശബ്ദം തന്റേതല്ലെന്ന് രാഹുൽ നിഷേധിച്ചിരുന്നില്ല.
കോണ്‍ഗ്രസ് അടിയന്തിരമായി രാഹുൽ മാങ്കൂട്ടത്തിനെ പ്രാഥമികാംഗത്വത്തിൽ നിന്നും പുറത്താക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് സംസ്ഥാന ജനറൽ സെക്രട്ടറി സജന ബി.സാജൻ ഇന്ന് രംഗത്തെത്തിയിരുന്നു.
