കേരളത്തിൽ മുന്നണികൾ മാറിമാറി ഭരിക്കുന്നതാണ് സംസ്ഥാനത്തിന് നല്ലതെന്ന തന്റെ മുൻ നിലപാടിൽ ഉറച്ചുനിൽക്കുന്നതായി കവിയും കേരള സാഹിത്യ അക്കാദമി പ്രസിഡന്റുമായ കെ. സച്ചിദാനന്ദൻ. ജനാധിപത്യത്തിന്റെ അടിസ്ഥാന തത്വം ഭരണപക്ഷവും പ്രതിപക്ഷവും മാറിവരിക എന്നതാണെന്നും ബംഗാളിലെ രാഷ്ട്രീയ സാഹചര്യം മുൻനിർത്തിയാണ് താൻ ഇക്കാര്യം പറയുന്നതെന്നും അദ്ദേഹം മാധ്യമങ്ങളോട് വ്യക്തമാക്കി.
തുടർച്ചയായ ഭരണം ഉണ്ടാകുമ്പോൾ പാർട്ടിക്കുള്ളിലേക്ക് സ്വാർത്ഥ താൽപ്പര്യങ്ങൾ കടന്നുകൂടാൻ സാധ്യതയുണ്ടെന്ന് അദ്ദേഹം ചൂണ്ടിക്കാട്ടി. അധികാരം വികേന്ദ്രീകരിക്കുന്നതിന് പകരം കേന്ദ്രീകരിക്കപ്പെടാൻ ഇത് കാരണമാകും. പ്രതിപക്ഷത്തിരിക്കുക എന്നത് ഒരു രാഷ്ട്രീയ പാർട്ടിക്ക് ജനങ്ങൾക്കിടയിൽ കൂടുതൽ വേരോട്ടം ഉണ്ടാക്കാൻ സഹായിക്കുന്ന ഘടകമാണ്. ജനങ്ങളുടെ അസംതൃപ്തിയും വിയോജിപ്പും പ്രകടിപ്പിക്കുന്നത് പ്രതിപക്ഷമാണ്. ശക്തമായ പ്രതിപക്ഷമില്ലാത്ത ജനാധിപത്യം അപൂർണ്ണമാണെന്നും അദ്ദേഹം കൂട്ടിച്ചേർത്തു.
തന്റെ ഈ നിരീക്ഷണം ഏതെങ്കിലും ഒരു പ്രത്യേക പാർട്ടിക്കോ ഇടതുപക്ഷത്തിനോ എതിരല്ലെന്നും സച്ചിദാനന്ദൻ വ്യക്തമാക്കി. കോൺഗ്രസ് ആണ് അധികാരത്തിലെങ്കിലും മൂന്നാം തവണ അവർ തുടരുന്നത് ശരിയല്ലെന്ന് താൻ പറയുമായിരുന്നു. ജനവിധി എന്നത് കേവലം ജയപരാജയങ്ങൾക്കപ്പുറം താഴെത്തട്ടിലുള്ളവരുടെ ശബ്ദം കേൾക്കാനുള്ള വേദിയാകണമെന്നും അദ്ദേഹം പറഞ്ഞു.
കമ്മ്യൂണിസ്റ്റ് നേതാക്കളുടെ നിലപാടുകളെക്കുറിച്ചും അദ്ദേഹം രൂക്ഷമായ വിമർശനം ഉന്നയിച്ചു. ശ്രീനാരായണ ഗുരുവിന്റെ ആദർശങ്ങൾക്ക് വിരുദ്ധമായി പ്രവർത്തിക്കുന്നവരെ സന്തോഷിപ്പിക്കാൻ അവർ ഗുരുവിനേക്കാൾ വലിയവരാണെന്ന് പറയുന്നത് ഒരു കമ്മ്യൂണിസ്റ്റുകാരന് ചേർന്നതല്ല. ഇത്തരം നിലപാടുകൾ പാർട്ടികളുടെ ആദർശങ്ങളിൽ നിന്ന് പിന്നോട്ടുപോകാൻ കാരണമാകുമെന്നും കമ്മ്യൂണിസ്റ്റ് നേതാക്കളിൽ നിന്ന് ആശയപരമായ തുടർച്ചയാണ് കേരളം പ്രതീക്ഷിക്കുന്നതെന്നും സച്ചിദാനന്ദൻ പറഞ്ഞു.
