കേരളത്തെയും മലയാളികളെയും ഇന്ത്യയുടെ മറ്റ് ഭാഗങ്ങളിൽ ഇകഴ്ത്തി കാണിക്കുന്ന, വിവാദ ചലച്ചിത്രമായ ‘ദ കേരള സ്റ്റോറി’യുടെ രണ്ടാം ഭാഗത്തിന് നൽകിയ സെൻസർ സർട്ടിഫിക്കറ്റ് റദ്ദാക്കണമെന്ന ഹർജിയിൽ കേന്ദ്ര സർക്കാരിനും സെൻസർ ബോർഡിനും കേരള ഹൈക്കോടതി നോട്ടീസ് അയച്ചു. ‘ദ കേരള സ്റ്റോറി 2: ഗോസ് ബിയോണ്ട്’ (The Kerala Story 2: Goes Beyond) എന്ന സിനിമയുടെ പ്രദർശനാനുമതി തടയണമെന്ന് ആവശ്യപ്പെട്ട് സമർപ്പിക്കപ്പെട്ട ഹർജിയിലാണ് ജസ്റ്റിസ് ബെച്ചു കുര്യൻ തോമസിന്റെ ഇടപെടൽ. സിനിമയുടെ നിർമ്മാതാക്കളായ സൺഷൈൻ പിക്ചേഴ്സിനോടും കോടതി വിശദീകരണം തേടിയിട്ടുണ്ട്.
ചിത്രത്തിന്റെ ട്രെയിലർ പുറത്തുവന്നതിന് പിന്നാലെ വലിയ രീതിയിലുള്ള പ്രതിഷേധങ്ങളാണ് സംസ്ഥാനത്ത് ഉയരുന്നത്. സിനിമയിലെ ഉള്ളടക്കം വസ്തുതാവിരുദ്ധമാണെന്നും ഒരു പ്രത്യേക വിഭാഗത്തെ അവഹേളിക്കുന്ന രീതിയിലുള്ള പരാമർശങ്ങൾ സമൂഹത്തിൽ വിദ്വേഷം പടർത്താൻ കാരണമാകുമെന്നുമാണ് ഹർജിയിലെ പ്രധാന വാദം. രാജസ്ഥാൻ, മധ്യപ്രദേശ് തുടങ്ങിയ സംസ്ഥാനങ്ങളിൽ നടക്കുന്ന കഥയാണെങ്കിലും ‘കേരള സ്റ്റോറി’ എന്ന പേര് ഉപയോഗിക്കുന്നത് കേരളത്തിന്റെ അന്തസ്സിനെ ബോധപൂർവ്വം ഇകഴ്ത്തിക്കാട്ടാനാണെന്നും ഹർജിക്കാരൻ കോടതിയിൽ ചൂണ്ടിക്കാട്ടി.
സിനിമയുടെ ട്രെയിലറിലെ “ഇനി സഹിക്കില്ല, പോരാടും” തുടങ്ങിയ പരാമർശങ്ങൾ പ്രകോപനപരമാണെന്നും ഇത് ക്രമസമാധാന നിലയെ ബാധിക്കുമെന്നും ഹർജിയിൽ പറയുന്നു. സിനിമാറ്റോഗ്രാഫ് ആക്ട് പ്രകാരമുള്ള ചട്ടങ്ങൾ ലംഘിച്ചാണ് ചിത്രത്തിന് സെൻസർ ബോർഡ് അനുമതി നൽകിയതെന്നാണ് പരാതിക്കാരുടെ ആരോപണം.
അതേസമയം, ചിത്രത്തിനെതിരെ രൂക്ഷവിമർശനവുമായി മുഖ്യമന്ത്രി പിണറായി വിജയനും രംഗത്തെത്തിയിട്ടുണ്ട്. കേരളത്തിന്റെ മതേതര പ്രതിച്ഛായ തകർക്കാനുള്ള ആസൂത്രിത നീക്കമാണിതെന്നും ഇത്തരം വിദ്വേഷ പ്രചാരണങ്ങളെ ജനങ്ങൾ തള്ളിക്കളയണമെന്നും അദ്ദേഹം ആവശ്യപ്പെട്ടു. സോഷ്യൽ മീഡിയയിലും ചിത്രത്തിലെ ചില രംഗങ്ങൾക്കെതിരെ വലിയ രീതിയിലുള്ള ട്രോളുകളും പരിഹാസങ്ങളും ഉയരുന്നുണ്ട്. വിഷയം കൂടുതൽ വാദങ്ങൾക്കായി കോടതി അടുത്ത ചൊവ്വാഴ്ചത്തേക്ക് മാറ്റി വെച്ചു.
