പ്രശസ്ത ചരിത്രകാരനും സാംസ്കാരിക ചിന്തകനുമായ കെ.എൻ. പണിക്കർ (90) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. ആധുനിക ഇന്ത്യൻ ചരിത്രരചനയിൽ മാർക്സിസ്റ്റ് ചരിത്രവീക്ഷണത്തിന് പുതിയ ദിശാബോധം നൽകിയ അദ്ദേഹം, കേരളത്തിന്റെ സാമൂഹിക-സാംസ്കാരിക മണ്ഡലങ്ങളിൽ സജീവമായ ഇടപെടലുകൾ നടത്തിയിരുന്ന വ്യക്തിയായിരുന്നു.
ജെ.എൻ.യു (JNU) സ്കൂൾ ഓഫ് സോഷ്യൽ സയൻസസ് മുൻ ഡീൻ, കേരള സ്റ്റേറ്റ് ഹയർ എജ്യുക്കേഷൻ കൗൺസിൽ വൈസ് ചെയർമാൻ എന്നീ നിലകളിൽ അദ്ദേഹം സ്തുത്യർഹമായ സേവനം അനുഷ്ഠിച്ചിട്ടുണ്ട്. കോളനിവാഴ്ചക്കാലത്തെ ഇന്ത്യയുടെ സാംസ്കാരിക ചരിത്രത്തെക്കുറിച്ചും കേരളത്തിലെ കർഷക സമരങ്ങളെക്കുറിച്ചും അദ്ദേഹം നടത്തിയ പഠനങ്ങൾ ലോകശ്രദ്ധ നേടിയിരുന്നു. മലബാർ കലാപത്തെക്കുറിച്ച് അദ്ദേഹം രചിച്ച ‘എഗെയ്ൻസ്റ്റ് ലോർഡ് ആൻഡ് സ്റ്റേറ്റ്’ (Against Lord and State) ചരിത്രവിദ്യാർത്ഥികൾക്കും ഗവേഷകർക്കും ഇന്നും ഒരു പ്രധാന അവലംബമാണ്.
ചരിത്രരചനയെ കേവലം വസ്തുതകളുടെ ശേഖരണമായി കാണാതെ, അതിനെ വർത്തമാനകാലത്തെ രാഷ്ട്രീയ-സാമൂഹിക സാഹചര്യങ്ങളുമായി ബന്ധിപ്പിക്കാൻ അദ്ദേഹം നിരന്തരം ശ്രമിച്ചിരുന്നതായി മുഖ്യമന്ത്രി പിണറായി വിജയൻ അനുശോചന സന്ദേശത്തിൽ പറഞ്ഞു. വർഗീയതയ്ക്കെതിരെയും ശാസ്ത്രീയ ചരിത്രബോധത്തിന് വേണ്ടിയും അദ്ദേഹം ശക്തമായി നിലകൊണ്ടു. കേരള കൗൺസിൽ ഫോർ ഹിസ്റ്റോറിക്കൽ റിസർച്ച് (KCHR) ചെയർമാനായും അദ്ദേഹം സേവനമനുഷ്ഠിച്ചിട്ടുണ്ട്. കെ.എൻ. പണിക്കരുടെ നിര്യാണത്തിൽ മുഖ്യമന്ത്രി പിണറായി വിജയൻ ഉൾപ്പെടെയുള്ള പ്രമുഖർ അനുശോചനം രേഖപ്പെടുത്തി.
യഥാർത്ഥ മനുഷ്യനെ അടയാളപ്പെടുത്തുന്ന ശാസ്ത്രീയവും വസ്തുനിഷ്ഠവുമായ ചരിത്രബോധത്തിന്റെ കാവൽക്കാരനായി നിലകൊണ്ട സാംസ്കാരിക നായകനായിരുന്നു ഡോ. കെ. എൻ പണിക്കർ. ഇന്ത്യയുടെ ബഹുസ്വരത, ചരിത്രത്തിൻ്റെ നാൾവഴികളിലൂടെ രൂപപ്പെട്ടു വന്നതാണെന്നും അതിൻ്റെ തകർച്ച ഇന്ത്യയുടെ തന്നെ തകർച്ചയ്ക്ക് വഴിവെക്കുമെന്നും എഴുത്തിലൂടെയും പ്രസംഗത്തിലൂടെയും അധ്യാപനത്തിലൂടെയും നിരന്തരം ഓർമ്മിപ്പിച്ചുകൊണ്ടിരുന്നു അദ്ദേഹമെന്നും മുഖ്യമന്ത്രി പറഞ്ഞു.
