കേന്ദ്ര സമുദ്രമത്സ്യ ഗവേഷണ സ്ഥാപനവും ബ്യൂറോ ഓഫ് ഇന്ത്യന്‍ സ്റ്റാന്‍ഡേര്‍ഡ്‌സും സംയുക്തമായി സംഘടിപ്പിച്ച ശില്‍പ്പശാലയിലാണ് ഈ നിര്‍ദേശമുയര്‍ന്നത്.
സമുദ്ര ആവാസവ്യവസ്ഥയെ സംരക്ഷിക്കാനും സുസ്ഥിരമായ മീന്‍പിടിത്തം ഉറപ്പാക്കാനും സമുദ്രമത്സ്യമേഖലയില്‍ ഇന്ത്യന്‍ സ്റ്റാന്‍ഡേര്‍ഡിന് രൂപം നല്‍കണമെന്ന് വിദഗ്ധര്‍. ഇതിനായി, ജൈവവൈവിധ്യ സംരക്ഷണം, സുസ്ഥിര പരിപാലനരീതികള്‍ തുടങ്ങിയവ ലക്ഷ്യമിട്ടുള്ള ദേശീയ ചട്ടക്കൂട് വികസിപ്പിക്കണമെന്നും വിദഗ്ധര്‍ നിര്‍ദേശിച്ചു. കേന്ദ്ര സമുദ്രമത്സ്യ ഗവേഷണ സ്ഥാപനവും (സി.എം.എഫ്.ആര്‍.ഐ.) ബ്യൂറോ ഓഫ് ഇന്ത്യന്‍ സ്റ്റാന്‍ഡേര്‍ഡ്‌സും (ബി.ഐ.എസ്.) സംയുക്തമായി സംഘടിപ്പിച്ച ശില്‍പ്പശാലയിലാണ് ഈ നിര്‍ദേശമുയര്‍ന്നത്.
ഏകീകൃതവും വിശ്വസനീയവും ശാസ്ത്രീയമായ രീതികള്‍ ഉറപ്പാക്കുന്നതിന് ബി.ഐ.എസ്. ഔദ്യോഗികമായി അംഗീകരിച്ച മാനദണ്ഡമാണ് ഇന്ത്യന്‍ സ്റ്റാന്‍ഡേര്‍ഡ്. സമുദ്രമത്സ്യമേഖലയില്‍ ഇത് നടപ്പിലാക്കുന്നത്, രാജ്യത്തെ സമുദ്രസമ്പത്ത് സംരക്ഷിക്കുന്നതിലും കൈകാര്യം ചെയ്യുന്നതിലും ഒരു പൊതുനിലവാരം കൊണ്ടുവരാന്‍ സഹായിക്കും. ഇതുവഴി, ഇന്ത്യയുടെ നയങ്ങള്‍ക്കും വിവരശേഖരണത്തിനും കൂടുതല്‍ വിശ്വാസ്യത കൈവരികയും ആഗോളതലത്തില്‍ ഇന്ത്യന്‍ മത്സ്യമേഖലക്ക് കൂടുതല്‍ സ്വീകാര്യത ലഭിക്കുകയും ചെയ്യും.
അന്താരാഷ്ട്ര മാനദണ്ഡങ്ങളായ ജൈവവൈവിധ്യ ഉടമ്പടി (സിബിഡി), യുണൈറ്റഡ് നേഷന്‍സ് കണ്‍വെന്‍ഷന്‍ ഓണ്‍ ദി ലോ ഓഫ് ദി സീ എന്നിവയ്ക്ക് അനുസൃതമായി വികസിപ്പിച്ചെടുക്കുന്ന ദേശീയ അംഗീകാരമുള്ള പ്രോട്ടോകോള്‍, ഇന്ത്യയുടെ ജൈവസംരക്ഷണത്തെയും അന്താരാഷ്ട്രതലത്തില്‍ രാജ്യത്തിന്റെ വ്യാപാരശേഷിയും ശക്തിപ്പെടുത്തുമെന്ന് ശില്‍പ്പശാലയില്‍ അഭിപ്രായമുയര്‍ന്നു.
വിദേശ സുസ്ഥിരതാ സര്‍ട്ടിഫിക്കേഷനുകള്‍ക്ക് ബദലായി, ഇന്ത്യയുടെ സാഹചര്യങ്ങള്‍ക്ക് അനുയോജ്യവും ചെലവ് കുറഞ്ഞതുമായ ഇന്ത്യന്‍ മറൈന്‍ സസ്റ്റൈനബിലിറ്റി സര്‍ട്ടിഫിക്കേഷന്‍ സംവിധാനം ബി.ഐ.എസ് ന് കീഴില്‍ രൂപീകരിക്കണമെന്ന നിര്‍ദേശവും ശില്‍പ്പശാലയില്‍ ഉയര്‍ന്നു.
മത്സ്യമേഖലയുടെ സുസ്ഥിരമായ വികസനത്തിന് സമുദ്രജൈവവൈവിധ്യ സംരക്ഷണം അനിവാര്യമാണെന്ന് ശില്‍പ്പശാല ഉദ്ഘാടം ചെയ്ത സിഎംഎഫ്ആര്‍ഐ ഡയറക്ടര്‍ ഡോ. ഗ്രിന്‍സണ്‍ ജോര്‍ജ് പറഞ്ഞു. ദേശീയ ചട്ടക്കൂട് വികസനത്തില്‍, മത്സ്യസമ്പത്തിന്റെ സാസ്ത്രീയ അവലോകനം, തീരദേശ വിഭവ മാപ്പിങ്, ആവാസവ്യവസ്ഥ അടിസ്ഥാനമാക്കിയുള്ള പരിപാലനരീതികള്‍ തുടങ്ങിയ മേഖലകളില്‍ ശാസത്രീയ പിന്തുണ നല്‍കാന്‍ സിഎംഎഫ്ആര്‍ഐ ഒരുക്കമാണ്. ബി.ഐ.എസ്, മറ്റ് ഏജന്‍സികള്‍ എന്നിവരുമായി സഹകരിച്ച് ഇന്ത്യന്‍ ഗുണനിലവാര സ്റ്റാന്‍ഡേര്‍ഡിന്റെ ശാസ്ത്രീയ രീതികള്‍ രൂപീകരിക്കുന്നതിന് സി.എം.എഫ്.ആര്‍.ഐ. നേതൃത്വം നല്‍കുമെന്നും അദ്ദേഹം പറഞ്ഞു.
സി.എം.എഫ്.ആര്‍.ഐ., ഇന്‍സ്റ്റിറ്റ്യൂട്ട് ഓഫ് ഫോറസ്റ്റ് ജനറ്റിക്സ് ആന്‍ഡ് ട്രീ ബ്രീഡിങ്, സുവോളജിക്കല്‍ സര്‍വേ ഓഫ് ഇന്ത്യ, ബി.ഐ.എസ്. എന്നിവിടങ്ങളില്‍ നിന്നുള്ള ശാസ്ത്രജ്ഞര്‍ പങ്കെടുത്തു.
