രണ്ട് മക്കളുമായി ആശുപത്രിയിലെത്തിയ ആളാണ് ഡോക്ടർക്ക് നേരെ അക്രമം അഴിച്ചുവിട്ടത്
താമരശ്ശേരി താലൂക്ക് ആശുപത്രിയിലെ ഡോക്ടർക്ക് നേരെ ആക്രമണം. അടുത്തിടെ അമീബിക് മസ്തിഷ്കജ്വരം ബാധിച്ച് മരിച്ച ഒമ്പത് വയസ്സുകാരിയുടെ പിതാവാണ് ഡോ. വിപിനിനെ വെട്ടി പരുക്കേൽപ്പിച്ചത്.
മരിച്ച കുട്ടിയുടെ പിതാവായ സനൂപാണ് ഡോക്ടറെ ആക്രമിച്ചത്. ഇയാളെ പോലീസ് അറസ്റ്റ് ചെയ്തു. കുട്ടിയുടെ മരണകാരണം വ്യക്തമാക്കാത്തതിനാലും മരണ സർട്ടിഫിക്കറ്റ് ലഭിക്കാത്തതിനാലും തങ്ങൾക്ക് നീതി ലഭിച്ചില്ലെന്ന് ഇയാൾ ആരോപിച്ചിരുന്നു.
തലയ്ക്ക് ഗുരുതരമായി പരിക്കേറ്റ ഡോ. വിപിനെ ഉടൻ തന്നെ കോഴിക്കോട് ബേബി മെമ്മോറിയൽ ആശുപത്രിയിലേക്ക് മാറ്റി.
സനൂപ് രണ്ട് മക്കളുമായിട്ടാണ് ആശുപത്രിയിലെത്തിയത്. കുട്ടികളെ പുറത്ത് നിർത്തി സൂപ്രണ്ടിൻ്റെ മുറിയിലേക്കാണ് ഇയാൾ ആദ്യം പോയത്. ആ സമയം സൂപ്രണ്ട് മുറിയിൽ ഉണ്ടായിരുന്നില്ല. സൂപ്രണ്ടിനെ ലക്ഷ്യമിട്ടാണ് സനൂപ് എത്തിയതെന്നാണ് കരുതുന്നത്. തുടർന്ന്, “എൻ്റെ മകളെ കൊന്നവനല്ലേ നീ?” എന്ന് ആക്രോശിച്ചുകൊണ്ട് ഇയാൾ ഡോ. വിപിനെ വെട്ടുകയായിരുന്നു. ആക്രമണം വളരെ പെട്ടെന്നായിരുന്നെന്ന് ആശുപത്രിയിലെ ഒരു ലാബ് ജീവനക്കാരൻ പറഞ്ഞു.
പനി ബാധിച്ച മകളുമായി സനൂപ് താമരശ്ശേരി താലൂക്ക് ആശുപത്രിയിലെത്തുകയായിരുന്നു. അവിടെ വെച്ച് കുട്ടിയുടെ നില വഷളായതിനെ തുടർന്ന് മെഡിക്കൽ കോളേജിലേക്ക് റഫർ ചെയ്തു. എന്നാൽ, ഒമ്പത് വയസ്സുകാരിയായ അനയ, മെഡിക്കൽ കോളേജിൽ എത്തുന്നതിന് മുമ്പ് മരിച്ചു.
