തന്ത്രിയുടെ നിർദ്ദേശപ്രകാരമാണ് മകൻ പണി ഏറ്റെടുത്തതെന്നാണ് മുൻ പ്രസിഡൻ്റ് എ. പത്മകുമാറിൻ്റെ വിശദീകരണം.
ശബരിമല ക്ഷേത്രത്തിലെ യോഗ ദണ്ഡ്, രുദ്രാക്ഷ മാല എന്നിവ സ്വർണം പൂശുന്നതിൻ്റെ നടപടിക്രമങ്ങളിൽ ദുരൂഹതയെന്ന് റിപ്പോർട്ടുകൾ. 2019-ൽ നടന്ന ഈ അറ്റകുറ്റപ്പണികൾക്ക് ചുമതല നൽകിയത് അന്നത്തെ തിരുവിതാംകൂർ ദേവസ്വം ബോർഡ് പ്രസിഡൻ്റ് എ. പത്മകുമാറിൻ്റെ മകൻ ജയശങ്കർ പദ്മനാണ്. ഈ നിയമനവുമായി ബന്ധപ്പെട്ട നടപടിക്രമങ്ങൾ സംബന്ധിച്ച് ചോദ്യങ്ങൾ ഉയർന്നിട്ടുണ്ട്.
തന്ത്രിയുടെ നിർദ്ദേശപ്രകാരമാണ് മകൻ പണി ഏറ്റെടുത്തതെന്നാണ് മുൻ പ്രസിഡൻ്റ് എ. പത്മകുമാറിൻ്റെ വിശദീകരണം. “ആര് ചെയ്യും എന്ന് തന്ത്രി ചോദിച്ചപ്പോൾ മകൻ സ്വയം ഏറ്റെടുക്കുകയായിരുന്നു,” എന്ന് പദ്മകുമാർ പ്രതികരിച്ചു. കൂടാതെ, അറ്റകുറ്റപ്പണികൾ ശബരിമലയ്ക്ക് പുറത്തുകൊണ്ട് പോകാതെയാണ് നടത്തിയതെന്നും അദ്ദേഹം വ്യക്തമാക്കി.
ദ്വാരപാലക ശിൽപങ്ങളിലെയും വാതിലിൻ്റെയും സ്വർണപ്പണി നടന്ന അതേ സമയത്താണ് യോഗദണ്ഡും രുദ്രാക്ഷ മാലയും സ്വർണം പൂശാനായി പുറത്തെടുത്തത്. ജയശങ്കർ പദ്മനെ ചുമതലപ്പെടുത്തിക്കൊണ്ട് ദേവസ്വം ബോർഡ് ഉത്തരവിറക്കിയത് 2019 മാർച്ച് 16-നായിരുന്നു. ഏപ്രിൽ 14-ന് തയ്യാറാക്കിയ മഹസറിൽ യോഗദണ്ഡും രുദ്രാക്ഷ മാലയും അറ്റകുറ്റപ്പണിക്കായി കൈമാറുന്നു എന്ന് രേഖപ്പെടുത്തിയിട്ടുണ്ട്.
യോഗ ദണ്ഡിലുണ്ടായിരുന്ന 19.2 ഗ്രാം സ്വർണം സ്ട്രോങ് റൂമിൽ സൂക്ഷിക്കാൻ ദേവസ്വം ഹെഡ് അക്കൗണ്ടൻ്റിനെ ഏൽപ്പിച്ചു. പിന്നീട്, പതിനെട്ട് ചുറ്റുകൾക്കും അടിഭാഗത്ത് കപ്പും തീർക്കുന്നതിനായി 44.54 ഗ്രാം പുതിയ സ്വർണം ഉപയോഗിച്ചു. പണികൾ പൂർത്തിയാക്കിയ ശേഷം യോഗ ദണ്ഡും രുദ്രാക്ഷ മാലകളും അഡ്മിനിസ്ട്രേറ്റീവ് ഓഫീസർക്ക് തിരികെ നൽകിയെന്ന് മഹസറിൽ പറയുന്നു. അഡ്മിനിസ്ട്രേറ്റീവ് ഓഫീസർ മുരാരി ബാബു, എക്സിക്യൂട്ടീവ് ഓഫീസർ ഡി. സുധീഷ് കുമാർ, തിരുവാഭരണം കമ്മീഷണർ കെ.എസ്. ബൈജു എന്നിവരാണ് മഹസറിൽ ഒപ്പുവെച്ചത്.
ചോദ്യങ്ങളുമായി പ്രതിപക്ഷം
അതേസമയം, ഈ പണികൾക്കായി ഹൈക്കോടതിയുടെ അനുമതി തേടിയിരുന്നുവോ എന്ന കാര്യത്തിൽ രേഖകളിൽ വ്യക്തതയില്ല. എന്ത് നടപടിക്രമം പാലിച്ചാണ് ദേവസ്വം ബോർഡ് പ്രസിഡൻ്റിൻ്റെ മകന് ഈ ചുമതല നൽകിയതെന്ന് പ്രതിപക്ഷ നേതാവ് ചോദ്യം ഉന്നയിച്ചു. സംഭവത്തിൽ കൂടുതൽ അന്വേഷണം ആവശ്യമാണെന്നും ആവശ്യമുയരുന്നുണ്ട്.
