ആറാഴ്‌ച്ചയ്‌ക്കിടെ 15 മരണങ്ങളാണ് അമീബിക് മസ്തിഷ്ക ജ്വരം മൂലം റിപ്പോർട്ട് ചെയ്തിരിക്കുന്നത്.
അമീബിക് മസ്തിഷ്ക ജ്വരം ബാധിച്ച് സംസ്ഥാനത്ത് ഒരു മരണം കൂടി റിപ്പോർട്ട് ചെയ്തു. തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലായിരുന്ന കൊല്ലം സ്വദേശിയാണ് ഇന്ന് മരിച്ചത്. ഇതോടെ അമീബിക് മസ്തിഷ്ക ജ്വരം ബാധിച്ച് മരിച്ചവരുടെ എണ്ണം 15 ആയി. കഴിഞ്ഞ ദിവസം കൊല്ലം സ്വദേശിനിയായ 48 കാരിയും മരിച്ചിരുന്നു.
12 ദിവസത്തിനിടെ നാലും ആറാഴ്‌ച്ചയ്‌ക്കിടെ 15 ഉം മരണങ്ങളാണ് അമീബിക് മസ്തിഷ്ക ജ്വരം മൂലം റിപ്പോർട്ട് ചെയ്തിരിക്കുന്നത്. നിലവിൽ 12 പേർ ചികിൽസയിൽ തുടരുന്നു.
ഇന്ന് രണ്ട് കുട്ടികൾക്ക് കൂടി അമീബിക് മസ്തിഷ്ക ജ്വരം സ്ഥിരീകരിച്ചിരുന്നു. കണ്ണൂർ സ്വദേശിയായ മൂന്നരവയസുകാരനും കാസർകോട് സ്വദേശിയായ ആറ് വയസുകാരനുമാണ് രോഗബാധ സ്ഥിരീകരിച്ചത്. കോഴിക്കോട് മെഡിക്കൽ കോളേജിൽ ചികിത്സയിൽ തുടരുന്ന കുട്ടികളുടെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു.
62 കാരനായ പാലക്കാട് കൊടുമ്പ് സ്വദേശിക്ക് ഇന്നലെ രോഗം സ്ഥിരീകരിച്ചിരുന്നു. ഒക്ടോബർ അഞ്ചിന് ചികിത്സ തേടി ഇദ്ദേഹം കൊടുമ്പ് പ്രാഥമികാരോഗ്യ കേന്ദ്രത്തിലും പിന്നീട് കൊടുവായൂർ കമ്മ്യൂണിറ്റി ഹെൽത്ത് സെൻ്ററിലും എത്തിയിരുന്നു. പിന്നീട് ഇദ്ദേഹത്തെ ജില്ലാ ആശുപത്രിയിലേക്ക് മാറ്റി. രോഗം സ്ഥിരീകരിച്ചതോടെ എട്ടാം തീയതി തൃശൂർ മെഡിക്കൽ കോളേജിലേക്ക് മാറ്റി. നിലവിൽ ഇദ്ദേഹം അതീവ ഗുരുതരാവസ്ഥയിൽ വെൻ്റിലേറ്ററിൽ തുടരുകയാണ്. രോഗ ഉറവിടം ഇതുവരെ വ്യക്തമായിട്ടില്ല. ഇതിനായി പ്രദേശത്തെ അഞ്ച് ജലസ്രോതസുകളിലെ സാമ്പിളുകൾ പരിശോധനയ്ക്കായി അയച്ചു. ആരോഗ്യ വകുപ്പിൻ്റെ പരിശോധന കൊടുമ്പ് പഞ്ചയാത്തിൽ തുടരുകയാണ്. .
ഭൂരിപക്ഷം കേസുകളിലും അമീബിക് മസ്തിഷക ജ്വരം എങ്ങനെ പകർന്നെന്ന് കണ്ടെത്താനായിട്ടില്ല. ഇതു സംബന്ധിച്ച് ഒമ്പതാം തീയതിക്ക് ശേഷമുള്ള കണക്കുകൾ ആരോഗ്യവകുപ്പ് പുറത്തുവിട്ടിട്ടില്ല. കഴിഞ്ഞ വർഷവും കേസുകൾ റിപ്പോർട്ട് ചെയ്തിട്ടും പൊതു ജലാശയങ്ങൾ വൃത്തിയാക്കാത്തതിനും ജനങ്ങളെ ബോധവത്കരിക്കാത്തതിനുമെതിരെ പ്രതിപക്ഷം രംഗത്തെത്തിയിരുന്നു.
