കെപിസിസി പുനഃസംഘടനയും ഭാരവാഹികളുടെ ജംബോ പട്ടികയിലും ഒരു വിഭാഗം നേതാക്കൾക്ക് അതൃപ്തി. പുതിയ പട്ടികയിൽ ഉൾപ്പെടുത്തിയവരിൽ ഭൂരിഭാഗവും കെ.സി. വേണുഗോപാലിന്റെ വിശ്വസ്തരാണെന്നാണ് ആരോപണം. മഹിളാ കോൺഗ്രസിന് പ്രത്യേക പരിഗണന ലഭിച്ചപ്പോൾ യൂത്ത് കോൺഗ്രസ് തഴയപ്പെട്ടതായും ആരോപണമുണ്ട്.
കെപിസിസി ജനറൽ സെക്രട്ടറിമാരുടെ പട്ടികയിൽ ഇടംനേടിയ ഏക യൂത്ത് കോൺഗ്രസ് നേതാവ് കെ.എസ്. ശബരിനാഥനാണ്. പുനഃസംഘടനയിൽ കെ. സുധാകരന്റെ വിശ്വസ്തരെ അവഗണിച്ചതായും റിപ്പോർട്ടുണ്ട്. സുധാകരന്റെ കാലത്തെ തിരുവനന്തപുരത്തെ മുൻ കെപിസിസി ജനറൽ സെക്രട്ടറിമാരായ മരിയാപുരം ശ്രീകുമാർ, സുബോധനൻ, ജി.എസ്. ബാബു എന്നിവരെ പട്ടികയിൽ നിന്ന് ഒഴിവാക്കി. താൻ നിർദേശിച്ച പരിഗണിച്ചില്ലെന്ന പരിഭവം കെ മുരളീധരനുമുണ്ട്.
കെ.സി. വേണുഗോപാലിന്റെ വിശ്വസ്തരായ മണക്കാട് സുരേഷിനെയും നെയ്യാറ്റിൻകര സനലിനെയും കെപിസിസി ജനറൽ സെക്രട്ടറിമാരായി നിയമിച്ചു. അതേസമയം, കെ. മോഹൻ കുമാർ, വർക്കല കഹാർ, കരകുളം കൃഷ്ണപിള്ള തുടങ്ങിയ തിരുവനന്തപുരത്തെ മുതിർന്ന നേതാക്കൾ പുറത്തായി. എ, ഐ ഗ്രൂപ്പുകൾ നിർദ്ദേശിച്ച പല നേതാക്കൾക്കും പട്ടികയിൽ ഇടം നേടാനായില്ല. തഴയപ്പെട്ടവർ ഉടൻ തന്നെ പരസ്യ പ്രതിഷേധവുമായി രംഗത്തെത്തുമെന്നാണ് സൂചന.
