ശബരിമല സ്വർണക്കവർച്ച കേസിൽ ദേവസ്വം ഉദ്യോഗസ്ഥർക്കെതിരെ നടപടി കടുപ്പിച്ച് പ്രത്യേക അന്വേഷണ സംഘം. രേഖകൾ സമർപ്പിക്കാത്ത ഉദ്യോഗസ്ഥർക്കെതിരെ നിയമനടപടി സ്വീകരിക്കുമെന്ന് അന്വേഷണ സംഘം മുന്നറിയിപ്പ് നൽകി. ഇതിനായി അധിക സമയം അനുവദിക്കില്ലെന്നും അന്വേഷണ ഉദ്യോഗസ്ഥർ വ്യക്തമാക്കി.
1999-ൽ വിജയ് മല്ല്യ നൽകിയ സ്വർണ്ണത്തെ സംബന്ധിച്ച കൂടുതൽ രേഖകൾ ഉടൻ സമർപ്പിക്കണമെന്ന് എസ്.ഐ.ടി നിർദ്ദേശിച്ചിരുന്നു. ശ്രീകോവിൽ നവീകരണവുമായി ബന്ധപ്പെട്ട രേഖകളും അന്വേഷണത്തിന് അത്യാവശ്യമാണ്. രേഖകൾ കണ്ടെത്താൻ ഉദ്യോഗസ്ഥർക്ക് ഇനി സമയം അനുവദിക്കാനാവില്ലെന്നും സംഘം വ്യക്തമാക്കി.
കേസിൽ റിമാൻഡിൽ കഴിയുന്ന ദേവസ്വം ബോർഡ് ഉദ്യോഗസ്ഥൻ മുരാരി ബാബുവിനെ ഇന്ന് റാന്നി കോടതിയിൽ ഹാജരാക്കും. മുരാരി ബാബുവിനെ കസ്റ്റഡിയിൽ വാങ്ങാൻ അന്വേഷണ സംഘം കോടതിയിൽ അപേക്ഷ നൽകും. കേസിലെ പ്രധാന പ്രതിയായ ഉണ്ണികൃഷ്ണൻ പോറ്റിയെയും മുരാരി ബാബുവിനെയും ഒരുമിച്ച് ചോദ്യം ചെയ്യാനാണ് തീരുമാനം.
ശബരിമലയിൽ നിന്ന് കവർന്നെടുത്ത സ്വർണം ഉടൻ ഹൈക്കോടതിയിൽ സമർപ്പിക്കുമെന്ന് അന്വേഷണസംഘം അറിയിച്ചു. അറസ്റ്റിലായ ഉണ്ണികൃഷ്ണൻ പോറ്റിയുടെ കസ്റ്റഡി കാലാവധി അവസാനിക്കുന്നതിന് മുൻപ് പരമാവധി തെളിവുകൾ ശേഖരിക്കുകയാണ് ലക്ഷ്യമെന്നും ഉദ്യോഗസ്ഥർ പറഞ്ഞു. പോറ്റിയുടെ കസ്റ്റഡി ഒക്ടോബർ 30ന് അവസാനിക്കും.
കവർന്നെടുത്ത സ്വർണം ബെല്ലാരിയിലെ ഒരു ജ്വല്ലറിയിൽ നിന്നാണ് കണ്ടെത്തിയത്. ഇത് ഉണ്ണികൃഷ്ണൻ പോറ്റിയുടെ സുഹൃത്തും വ്യവസായിയുമായ ഗോവർധന്റെ ഉടമസ്ഥതയിലാണ്. 500 ഗ്രാമിൽ അധികം തൂക്കമുള്ള സ്വർണ്ണബാറുകൾ സംഘം കസ്റ്റഡിയിലെടുത്തു. ശബരിമല സ്വർണക്കവർച്ചയുമായി തനിക്ക് ബന്ധമില്ലെന്നും അന്വേഷണ സംഘത്തിന് മുന്നിൽ താൻ മൊഴി നൽകിയെന്നും ഗോവർധൻ മാധ്യമങ്ങളോട് പറഞ്ഞു.
