ശബരിമല സ്വർണ്ണപ്പാളിക്കടത്ത് കേസിൽ തിരുവിതാംകൂർ ദേവസ്വം ബോർഡ് മുൻ പ്രസിഡന്റ് എൻ. വാസുവിന്റെ അറസ്റ്റ് സിപിഐഎമ്മിനെ രാഷ്ട്രീയ പ്രതിസന്ധിയിലും പ്രതിരോധത്തിലുമാക്കിയിരിക്കുകയാണ്. തദ്ദേശ തിരഞ്ഞെടുപ്പിന് തൊട്ട് മുമ്പ് നടന്ന അറസ്റ്റിനെ എങ്ങനെ രാഷ്‌ട്രീയമായി നേരിടണമെന്ന ആശയക്കുഴപ്പവും സിപിഎമ്മിനെ അലട്ടുന്നുണ്ട്. അതേസമയം ഈ കേസുമായി ബന്ധപ്പെട്ട് പാർട്ടിക്കും പിണറായി സർക്കാരിനുമുള്ള തിരിച്ചടികൾ വാസുവിന്റെ അറസ്റ്റോടെ അവസാനിക്കില്ലെന്നാണ് പുറത്തുവരുന്ന സൂചനകൾ.
സ്വർണ്ണം പൊതിഞ്ഞ കട്ടിളപ്പാളിയെ 2019-ൽ ചെമ്പെന്ന് രേഖപ്പെടുത്തി കടത്താൻ ദേവസ്വം കമ്മീഷണറായിരുന്ന എൻ. വാസു നൽകിയ റിപ്പോർട്ട് അംഗീകരിച്ചത് അന്നത്തെ ബോർഡ് പ്രസിഡന്റായിരുന്ന എ. പത്മകുമാറാണ്. പത്തനംതിട്ടയിലെ മുതിർന്ന സി.പി.എം. നേതാവും കോന്നി മുൻ എം.എൽ.എയുമാണ് പത്മകുമാർ. ശബരിമലയുമായി അടുത്ത ബന്ധം പുലർത്തിയിരുന്ന പത്മകുമാറിന് കട്ടിളപ്പാളികൾ സ്വർണ്ണം പൊതിഞ്ഞതാണെന്ന് അറിയാമായിരുന്നു. എന്നിട്ടും ചെമ്പെന്ന് രേഖപ്പെടുത്തിയ റിപ്പോർട്ടിന് അംഗീകാരം നൽകിയത് എന്തിനാണെന്ന ചോദ്യത്തിന് മറുപടി പറയേണ്ടിവരും.
ഈ സാഹചര്യത്തിൽ അന്വേഷണം അടുത്തതായി പത്മകുമാറിലേക്ക് എത്തുമെന്നത് ഏതാണ്ട് ഉറപ്പാണ്. എൻ. വാസുവിനെ അടുത്ത ദിവസങ്ങളിൽ അന്വേഷണസംഘം കസ്റ്റഡിയിൽ വാങ്ങി ചോദ്യം ചെയ്യും. വാസു പത്മകുമാറിനെതിരെ മൊഴി നൽകിയാൽ അദ്ദേഹത്തിന്റെ അറസ്റ്റ് ഉൾപ്പെടെയുള്ള നടപടികൾക്ക് വേഗത കൂടും.
പത്മകുമാറിന് ചോദ്യം ചെയ്യലിനായി അന്വേഷണ സംഘം നോട്ടീസ് നൽകിയിട്ടുണ്ട്. പത്മകുമാറിന്റെ പ്രൈവറ്റ് സെക്രട്ടറിയെ കഴിഞ്ഞ ദിവസം ചോദ്യം ചെയ്തിരുന്നുവെന്നുള്ള റിപ്പോർട്ടുകൾ പുറത്തുവന്നിട്ടുണ്ട്. അടുത്തതായി അന്വേഷണം എത്തുന്നത് പത്മകുമാറിലേക്കാണ് എന്നത് വ്യക്തം. ശേഷം പാർട്ടിയിലെ ആരിലേക്ക് ഒക്കെ അന്വേഷണം എത്തുമെന്നത് തിരഞ്ഞെടുപ്പ് അടുത്തിരിക്കെ സിപിഎമ്മിനെ കൂടുതൽ പ്രതിരോധത്തിലാക്കും.
സിപിഎം നേതാവായിരുന്ന വാസുവിന്റെ അറസ്റ്റ് ശബരിമല സ്വർണ്ണക്കൊള്ളയിൽ സിപിഎം ഇതുവരെ തീർത്ത പ്രതിരോധത്തിൽ വിള്ളൽ വീഴ്ത്തിയിട്ടുണ്ട്. കൊല്ലം കുളക്കട പഞ്ചായത്ത് പ്രസിഡന്റായി തുടങ്ങിയ വാസു 2006-11 ലെ വി. എസ്. അച്യുതാനന്ദൻ മന്ത്രിസഭയിൽ പി.കെ. ഗുരുദാസന്റെ പിഎ ആയിരുന്നു. വിജിലൻസ് ട്രൈബ്യൂണൽ അംഗമായും പ്രവർത്തിച്ചിട്ടുണ്ട്. രണ്ടുതവണ തിരുവിതാം ദേവസ്വം ബോർഡ് കമ്മിഷണറായി. 2019-ൽ ദേവസ്വം പ്രസിഡന്റ് സ്ഥാനത്തെത്തി. ദേവസ്വം കമ്മിഷണറായിരുന്ന ഒരാൾ ദേവസ്വം പ്രസിഡന്റ് സ്ഥാനത്തേക്കെത്തുന്നത് ആദ്യമായിട്ടായിരുന്നു.
പാര്‍ട്ടി നേതൃത്വത്തിന്റെ വിശ്വസ്തനാണ് എൻ. വാസു എന്നതാണ് സിപിഎമ്മിന് ഈ വിഷയത്തിലെ കൈ കഴുകൽ ഇനി എളുപ്പമല്ലാതാക്കുന്നത്.
ലയന സജീവ്
