സമരം ശക്തമാക്കാൻ കെജിഎംഒഎ; വിഐപി, ഇ- സഞ്ജീവനി ഡ്യൂട്ടികളിൽ നിന്നും വിട്ടു നിൽക്കും

സർക്കാർ ആശുപത്രികളിലെ സുരക്ഷാ സംവിധാനങ്ങൾ കുറ്റമറ്റമാക്കുന്നതിന് വേണ്ടി ഉന്നയിച്ച ആവശ്യങ്ങളിൽ അടിയന്തര പരിഹാരം ഉണ്ടാവാത്ത സാഹചര്യത്തിൽ ജീവൻ രക്ഷാ സമരം കൂടുതൽ ശക്തമാക്കുവാൻ കെജിഎംഒഎ (Kerala Government Medical Officers’ Association). ഇതിന്റെ ഭാഗമായി നവംബർ 15 മുതൽ വിഐപി, ഇ-സഞ്ജീവനി ഡ്യൂട്ടികളും കെജിഎംഒഎ അംഗങ്ങൾ ബഹിഷ്കരിക്കും.

സംസ്ഥാനത്തെ സർക്കാർ ആശുപത്രികളിലെ സുരക്ഷാ സംവിധാനങ്ങൾ കുറ്റമറ്റതാക്കണമെന്നും ഡോക്ടർമാർ അടക്കമുള്ള ആരോഗ്യപ്രവർത്തകർക്ക് നിർഭയമായും സ്വതന്ത്രമായും ജോലി ചെയ്യുന്നതിനുള്ള സാഹചര്യം ഒരുക്കണം എന്നും ആവശ്യപ്പെട്ട് നവംബർ ഒന്നു മുതൽ കെജിഎംഒഎ നിസ്സഹകരണ സമരത്തിലാണ്. താമരശ്ശേരിയിൽ കാഷ്വാലിറ്റി ഡ്യൂട്ടിയിൽ ഉണ്ടായിരുന്ന ഡോക്ടർ ക്രൂരമായി ആക്രമിക്കപ്പെട്ട പശ്ചാത്തലത്തിൽ ആശുപത്രികളിലെ സുരക്ഷിതത്വം ഉറപ്പാക്കുന്നതിനായി സ്വീകരിക്കേണ്ട നടപടികൾ സംഘടന മുന്നോട്ടുവച്ചിരുന്നു.

താമരശ്ശേരി താലൂക്ക് ആശുപത്രിയിൽ ഡ്യൂട്ടി സമയത്ത് ആക്രമണത്തിനിരയായ ഡോ. വിപിന്റെ ചികിത്സാച്ചിലവ് പൂർണമായി ഏറ്റെടുക്കണമെന്നും സർക്കാരിനോട് ആവശ്യപ്പെട്ടിരുന്നു. സംഘടനയുടെ പ്രധാന ആവശ്യങ്ങളിൽ ഒന്നായ ട്രയാജ് സംവിധാനം (അടിയന്തിര ചികിത്സ മുൻഗണനാ പ്രകാരം തീരുമാനിക്കുന്നത്) നടപ്പിലാക്കൽ സംബന്ധിച്ച് യാതൊരു അനുകൂല തീരുമാനവും ഉണ്ടായിട്ടില്ല.

ആശുപത്രികളിൽ സുരക്ഷയ്ക്കായി സ്റ്റേറ്റ് ഇൻഡസ്ട്രിയൽ സെക്യൂരിറ്റി ഫോഴ്സിന്റെ സേവനം ലഭ്യമാക്കുകയോ പോലീസ് ഔട്ട് പോസ്റ്റുകൾ സ്ഥാപിക്കുകകയോ ചെയ്യണമെന്ന ആവശ്യവും ഇതുവരെ പരിഗണിക്കപ്പെട്ടിട്ടില്ല. ആശുപത്രിയിലെ സുരക്ഷയ്ക്കായി സായുധരായ വിമുക്തഭടന്മാരുടെ സേവനം ഉറപ്പാക്കാൻ വേണ്ട ഫണ്ടുകൾ ലഭ്യമാക്കണമെന്നും, കോഡ് ഗ്രേ പ്രോട്ടോകോൾ ഫലപ്രദമായി നടപ്പിലാക്കുന്നതിന് വേണ്ട നടപടികൾ ഉണ്ടാകണം എന്നുമുള്ള ആവശ്യവും യാഥാർത്ഥ്യമായിട്ടില്ല. കൃത്യമായ ഡോക്ടർ രോഗി അനുപാതം നിർവചിക്കണമെന്ന് ആവശ്യവും അംഗീകരിക്കപ്പെട്ടിട്ടില്ല.

48 പുതിയ ചീഫ് മെഡിക്കൽ ഓഫീസർ (CMO) പോസ്റ്റുകൾ അനുവദിക്കപ്പെട്ടെങ്കിലും ഒരു ഷിഫ്റ്റിൽ രണ്ട് കാഷ്വാലിറ്റി മെഡിക്കൽ ഓഫീസർമാരുടെ സേവനം ലഭ്യമാകുന്നതിന് ഈ പോസ്റ്റുകൾ തികച്ചും അപര്യാപ്തമാണ്. ആശുപത്രി അക്രമണങ്ങൾ തടയുന്നതിൽ ഇതേവരെ എടുത്ത് നടപടികൾ ഫലപ്രദമല്ല എന്ന് തെളിയിച്ചുകൊണ്ട് അക്രമങ്ങൾ തുടർച്ചയായി ആവർത്തിക്കപ്പെടുകയാണ്.

വയനാട് പുല്പള്ളി കമ്മ്യൂണിറ്റി ഹെൽത്ത് സെന്ററിൽ ഡ്യൂട്ടിയിൽ ഉണ്ടായിരുന്ന ഡോക്ടർക്ക് നേരെയുണ്ടായ ആക്രമണം ഈ പരമ്പരയുടെ അവസാനത്തെ ഉദാഹരണമാണ്. താമരശ്ശേരി താലൂക്ക് ആശുപത്രിയിൽ നടന്ന ആക്രമണത്തിന്റെ ഞെട്ടൽ മാറും മുൻപേ പുല്പള്ളിയിൽ വീണ്ടും അതിക്രമം സംഭവിച്ചത് ആരോഗ്യ സ്ഥാപനങ്ങളിലെ ജീവനക്കാരുടെ സുരക്ഷിതത്വം ഉറപ്പാക്കേണ്ടതിന്റെ അടിയന്തിരപ്രാധാന്യം വ്യക്തമാക്കുന്നു. ​സംഘടന മുന്നോട്ടുവച്ച ആവശ്യങ്ങൾ മിക്കതും ഇനിയും പരിഹാരമാവാതെ തുടരുന്ന സാഹചര്യത്തിലാണ് സമരം ശക്തമാക്കാനുള്ള തീരുമാനമെന്ന് കെജിഎംഒഎ പ്രസ്‌താവനയിൽ അറിയിച്ചു.