തന്റെ പ്രിവിലേജുകളെക്കുറിച്ച് ബോധ്യമുണ്ടെന്ന് നടൻ ദുൽഖർ സൽമാൻ. പ്രേക്ഷകരെ സംബന്ധിച്ച് താൻ പ്രിവിലേജുകളില്‍ നിന്നുമാണ് വരുന്നതെന്ന് അറിയാമെന്നും തമിഴ് മാധ്യമമായ സിനിമ വികടന് നൽകിയ അഭിമുഖത്തിൽ ദുൽഖർ പറഞ്ഞു.
പ്രിവിലേജിനെക്കുറിച്ച് പറഞ്ഞ് മമ്മൂട്ടി കളിയാക്കാറുണ്ടെന്നും ദുല്‍ഖര്‍ പറഞ്ഞു. പെങ്ങളുടെ കല്യാണത്തിന് പണമുണ്ടാക്കേണ്ടതില്ലെന്നും അതുകൊണ്ട് മോശം സിനിമകൾ ചെയ്താൽ പറയാൻ ന്യായീകരണമില്ലെന്നും ദുൽഖർ പറഞ്ഞു. മലയാളം കടന്ന് തെലുങ്കിലും തമിഴിലും താരമായി മാറിയ ദുൽഖറിന്റെ ഏറ്റവും പുതിയ ചിത്രം ‘കാന്ത’ ഇന്ന് റിലീസ് ചെയ്യുന്നതിന് മുന്നോടിയായിട്ടായിരുന്നു അഭിമുഖം.
‘എന്റെ വാപ്പിച്ചിയും ഉമ്മയും നല്‍കിയിരിക്കുന്ന സുരക്ഷിത്വതവും പിന്തുണയും കാരണം എനിക്ക് ധൈര്യമായി തീരുമാനങ്ങളെടുക്കാന്‍ സാധിക്കും. എപ്പോഴും നല്ല സിനിമകള്‍ ചെയ്യാനുള്ള ധൈര്യമുണ്ട്. വാപ്പിച്ചി എപ്പോഴും എന്നെ കളിയാക്കും. നിനക്ക് പെങ്ങളുടെ കല്യാണത്തിനോ വീടു വെക്കാനോ പണമുണ്ടാക്കേണ്ടതില്ല. എനിക്ക് അതൊക്കെ ഉണ്ടായിരുന്നു. അതിനാല്‍ ചില മോശം സിനിമകളൊക്കെ ചെയ്യേണ്ടി വന്നിട്ടുണ്ട്. നിനക്ക് ആ എക്‌സ്‌ക്യൂസ് പറയാനില്ല എന്ന്…ശരിയാണ് എനിക്ക് അത്തരം എക്‌സ്‌ക്യൂസുകളൊന്നും പറയാനില്ല. മോശം സിനിമ ചെയ്താല്‍ എന്ത് ന്യായീകരണം പറയും?” ദുൽഖർ പറഞ്ഞു.
സ്വയം അനുഗ്രഹീതനായിട്ടാണ് തോന്നുന്നതെന്നും ദുൽഖർ പറഞ്ഞു. “പ്രേക്ഷകരെ സംബന്ധിച്ച് ഞാന്‍ പ്രിവിലേജുകളില്‍ നിന്നുമാണ് വരുന്നത്. നല്ല സിനിമകളെ പിന്തുടര്‍ന്നാല്‍ നല്ല സിനിമ നമ്മളെ തേടി വരാന്‍ തുടങ്ങും. എന്റെ യാത്ര എനിക്ക് ഒരുപാടിഷ്ടമാണ്. അനുഗ്രഹീതനായിട്ടാണ് തോന്നുന്നത്. ഒരു സിനിമ തമിഴിലാണെങ്കില്‍ അടുത്തത് തെലുങ്കിലാകും. അടുത്തത് മലയാളത്തിലാകും. അതിനാല്‍ എന്റെ ജീവിതം അത്രയും റിച്ച് ആണ്’, ദുൽഖർ കൂട്ടിച്ചേർത്തു.
ഈ റിച്ച്‌നെസും വ്യത്യസ്തതയും സിനിമ നല്കിയതാണെന്ന് പറയാനും ദുൽഖറിന് മടിയില്ല. “വ്യത്യസ്തമായ സംസ്‌കാരങ്ങളും ഭക്ഷണവുമെല്ലാം അനുഭവച്ചറിയാനാകുന്നുണ്ട്. അഭിനേതാക്കളെപ്പോലെ യാത്ര ചെയ്യാന്‍ കഴിയുന്നവർ വേറെയുണ്ടാകില്ല. ഞാന്‍ ഇന്ത്യയുടെ നാല് ഭാഗത്തും പോയിട്ടുണ്ട്. നാഗാലാന്റില്‍ ഷൂട്ട് ചെയ്തിട്ടുണ്ട്. ഇപ്പോള്‍ ഗുജറാത്തില്‍ ഷൂട്ട് ചെയ്ത് വരികയാണ്. കാശ്മീരിലും രാമേശ്വരത്തിലും പോയിട്ടുണ്ട്. എല്ലാത്തിനും കാരണം സിനിമയാണ്,” ദുല്‍ഖറിന്റെ വാക്കുകൾ.
അതേസമയം, ‘കാന്ത’ യ്ക്ക് മികച്ച പ്രതികരണമാണ് ആദ്യ ദിവസത്തിൽ ലഭിക്കുന്നത്. സിനിമ ഗംഭീരമാണെന്നും ദുൽഖറിന്റെ കരിയർ ബെസ്റ്റ് പെർഫോമൻസ് ആണിതെന്നും അഭിപ്രായപ്പെടുന്ന റിവ്യൂസ് ‘കാന്ത’ കണ്ടിരിക്കേണ്ടതാണെന്നും (Must Watch) പറയുന്നു. ‘കാന്ത’ ദുൽഖറിന് ദേശീയ അവാർഡ് നേടിക്കൊടുക്കുമെന്നുമാണ് ആരാധകരുടെ പ്രതീക്ഷ. ‘കാന്ത’യുടെ ആഗോള റിലീസായിരുന്നു ഇന്ന്.
സെല്‍വമണി സെല്‍വരാജ് ആണ് ‘കാന്ത’ യുടെ സംവിധാനം. ഭാഗ്യശ്രീ ബോര്‍സെ, സമുദ്രക്കനി, റാണ ദഗുബാട്ടി എന്നിവരാണ് പ്രധാന വേഷത്തിൽ. അന്‍പതുകളിലെ തമിഴ് സിനിമയുടെ പശ്ചാത്തലത്തിലാണ് സിനിമയുടെ കഥ അവതരിപ്പിച്ചിരിക്കുന്നത്. 1950 കാലഘട്ടത്തിലെ മദ്രാസാണ് പശ്ചാത്തലം. നിര്‍മാണം ദുൽഖറിന്റെ തന്നെ വേഫേറർ ഫിലിംസും റാണയും ചേര്‍ന്നാണ്.
മികച്ച മലയാള ചിത്രങ്ങൾ നിർമ്മിച്ചിട്ടുള്ള വേഫേറർ ഫിലിംസിന്റെ ആദ്യ അന്യഭാഷാ ചിത്രം കൂടിയാണിത്. തമിഴിൽ ചിത്രീകരിച്ച ‘കാന്ത’ മലയാളം, തെലുങ്ക്, ഹിന്ദി ഭാഷകളിലും റിലീസ് ചെയ്യുന്നുണ്ട്. ദുൽഖർ നായകനായെത്തിയ ‘ലക്കി ഭാസ്കർ’ തെലുങ്കിൽ ബ്ലോക്ക്ബസ്റ്ററായിരുന്നു.
