കണ്ണൂർ പാനൂര്‍ പാലത്തായി പോക്സോ കേസില്‍ ബിജെപി നേതാവ് കെ പത്മരാജന് ജീവപര്യന്തം തടവും പിഴയും. തലശ്ശേരി പോക്സോ അതിവേഗ സ്പെഷ്യൽ കോടതിയാണ് വിധി പ്രഖ്യാപിച്ചത്. പോക്സോ കുറ്റങ്ങളിൽ 40 വർഷം തടവവും ശിക്ഷ വിധിച്ചിട്ടുണ്ട്. പത്മരാജൻ കുറ്റക്കാരനാണെന്ന് കോടതി ഇന്നലെ കണ്ടെത്തിയിരുന്നു.
നാലാം ക്‌ളാസുകാരിയെ ലൈംഗികമായി പീഡിപ്പിക്കുകയും ബലാത്സംഗം ചെയ്യുകയും ചെയ്തതടക്കമുള്ള കുറ്റങ്ങൾ സംശയാതീതമായി തെളിയിക്കാൻ പ്രോസിക്യൂഷന് കഴിഞ്ഞെന്ന് കോടതി നിരീക്ഷിച്ചു. 49-കാരനായ പത്മരാജൻ, ബിജെപിയുടെ തൃപ്രങ്ങോട്ടൂർ പഞ്ചായത്ത് മുൻ പ്രസിഡന്റും അദ്ധ്യാപകനുമായിരുന്നു. ഇയാൾ പഠിപ്പിച്ചിരുന്ന സ്കൂളിലെ പത്ത് വയസ്സുകാരിയായ വിദ്യാർത്ഥിനിയാണ് പീഡനത്തിനിരയായത്. സ്കൂളിലെ ശുചിമുറിയിൽ വച്ചടക്കം പല തവണ ഇയാൾ കുട്ടിയെ ലൈംഗികമായി ഉപദ്രവിച്ചു എന്നാണ് കേസ്.
2020 മാർച്ച് മാസത്തിലാണ് ചൈൽഡ് ലൈൻ പ്രവർത്തകർ വഴി ഈ കേസ് പുറത്തുവന്നത്. മാർച്ച് 18-ന് പരാതി നൽകുകയും തുടർന്ന് ഏപ്രിൽ 15-ന് പ്രതി അറസ്റ്റിലാവുകയും ചെയ്തു. ഐപിസി (IPC) 376 (ബലാത്സംഗം), പോക്സോ നിയമത്തിലെ അഞ്ച്, ആറ് വകുപ്പുകൾ (ഗുരുതരമായ ലൈംഗിക അതിക്രമം) എന്നിവയാണ് ഇയാൾക്കെതിരെ ആദ്യം ചുമത്തിയിരുന്നത്.
പെണ്‍കുട്ടിയുടെ മാതാവിന്റെ ആവശ്യപ്രകാരം 2020 ഏപ്രില്‍ 24ന് അന്വേഷണം ക്രൈംബ്രാഞ്ചിന് കൈമാറി. ഐജി എസ് ശ്രീജിത്താണ് ക്രൈം ബ്രാഞ്ച് സംഘത്തെ നയിച്ചത്. ജുവനൈല്‍ ജസ്റ്റിസ് ആക്ടിലെ 75, 82 വകുപ്പുകള്‍ ചുമത്തി ക്രൈംബ്രാഞ്ച് ഡിറ്റ്ക്ടീവ് ഇന്‍സ്പെക്ടര്‍ മധുസൂദനന്‍ നായര്‍ കേസില്‍ ഇടക്കാല കുറ്റപത്രം സമര്‍പ്പിച്ചു. അവർ സമർപ്പിച്ച കുറ്റപത്രത്തിൽ ഗുരുതരമായ പോക്സോ വകുപ്പുകൾ ഒഴിവാക്കുകയും ചെയ്തു. ഇത് സംസ്ഥാനത്ത് വലിയ പ്രതിഷേധങ്ങൾക്ക് ഇടയാക്കി. നാലാം ക്ലാസുകാരിയുടെ മൊഴികളിലെ വൈരുധ്യത്തിലൂന്നി കേസ് ദുര്‍ബലമാക്കാനായിരുന്നു ശ്രീജിത്ത് അടക്കമുള്ള അന്വേഷണ ഉദ്യോഗസ്ഥര്‍ ശ്രമിച്ചതെന്ന ആരോപണമാണ് പ്രതിഷേധങ്ങൾക്ക് വഴി വച്ചത്.
രാഷ്ട്രീയ ഇടപെടൽ ആരോപിച്ച് കുട്ടിയുടെ മാതാവ് ഹൈക്കോടതിയെ സമീപിച്ചതിനെത്തുടർന്ന്, പ്രത്യേക അന്വേഷണ സംഘം (SIT) ത്തെ നിയോഗിച്ചു. അന്വേഷണ സംഘം പോക്സോ വകുപ്പുകൾ ഉൾപ്പെടുത്തിക്കൊണ്ട് പുതിയ കുറ്റപത്രം സമർപ്പിക്കുകയും ചെയ്തു. കേസിൽ അഞ്ച് തവണ അന്വേഷണ സംഘത്തെ മാറ്റിയിരുന്നു. പ്രത്യേക അന്വേഷണ സംഘം പോക്സോ വകുപ്പ് ചുമത്തിയതാണ് കേസില്‍ നിര്‍ണായകമായത്.
