ബിഹാർ നിയമസഭാ തിരഞ്ഞെടുപ്പിൽ മതനിരപേക്ഷ ശക്തികൾക്കുണ്ടായ കനത്ത തിരിച്ചടി ശരിയായ രീതിയിൽ വിലയിരുത്തണമെന്നും, ആവശ്യമായ തിരുത്തലുകൾ വരുത്തി മുന്നോട്ട് പോകണമെന്നും സിപി എം സംസ്ഥാന സെക്രട്ടറി എം വി ഗോവിന്ദൻ ആവശ്യപ്പെട്ടു. വർഗീയ പ്രചാരണങ്ങൾക്കും പണക്കൊഴുപ്പിനും വേണ്ടി ബിജെപി തിരഞ്ഞെടുപ്പ് കമ്മീഷനെ ദുരുപയോഗം ചെയ്‌തെന്നും ഗോവിന്ദൻ തിരുവനന്തപുരത്ത് വാർത്താ സമ്മേളനത്തിൽ ആരോപിച്ചു.
തിരഞ്ഞെടുപ്പ് കമ്മീഷനെ ഉപയോഗിച്ച് വോട്ടർ പട്ടിക തീവ്ര പുനഃപരിശോധന (SIR) എന്ന പേരിൽ ഏകദേശം 60 ലക്ഷത്തോളം പേരുടെ വോട്ടവകാശം നീക്കം ചെയ്തതായി എം വി ഗോവിന്ദൻ പറഞ്ഞു. ബിഹാറിലെ ഏകദേശം ഒരു കോടിയോളം പൗരന്മാർക്ക് വോട്ട് ചെയ്യാനായില്ല. ഇവിഎം (EVM) മെഷീനുകൾ പോലും ശരിയായ രീതിയിൽ കൈകാര്യം ചെയ്തില്ല എന്ന ഗുരുതരമായ വിഷയവും ഉയർന്നുവന്നിട്ടുണ്ട്. പെരുമാറ്റച്ചട്ടം നിലവിൽ വന്ന ശേഷം 10,000 രൂപ വീതം ഒന്നര കോടിയോളം പേർക്ക് എൻഡിഎ സർക്കാർ എത്തിച്ചു. തിരഞ്ഞെടുപ്പ് വിജയത്തിന് ശേഷം പ്രധാനമന്ത്രി നരേന്ദ്ര മോദി നടത്തിയ അഭിസംബോധന, തിരഞ്ഞെടുപ്പ് കമ്മീഷൻ വഴി ഒരു രാഷ്ട്രീയ അജണ്ട നടപ്പിലാക്കാൻ ബിജെപിക്ക് കഴിഞ്ഞു എന്നതിന്റെ പരസ്യ പ്രഖ്യാപനമാണെന്നും ഗോവിന്ദൻ പറഞ്ഞു.
കോൺഗ്രസിനെതിരെ വിമർശനം
മതനിരപേക്ഷത സംരക്ഷിക്കുന്നതിൽ കോൺഗ്രസ് വിശാലമായ കാഴ്ചപ്പാടിന്റെ അടിസ്ഥാനത്തിൽ പ്രവർത്തിക്കാൻ തയ്യാറായില്ല എന്നത് ബിഹാർ തിരഞ്ഞെടുപ്പിലുണ്ടായ മറ്റൊരു പ്രധാന പ്രശ്നമാണ്. ഒരു പ്രധാന കക്ഷി എന്ന നിലയിൽ കോൺഗ്രസ് കൂടുതൽ ഗൗരവപൂർണ്ണമായ സമീപനം സ്വീകരിച്ചിരുന്നുവെങ്കിൽ തിരഞ്ഞെടുപ്പ് ചിത്രം മറ്റൊന്നാകുമായിരുന്നു.
“ഇടതുപക്ഷം മത്സരിച്ചത് ഉൾപ്പടെ നിരവധി സീറ്റുകളിൽ കോൺഗ്രസ് വിമത സ്ഥാനാർത്ഥികളെ നിർത്തി ബിജെപിക്ക് അനുകൂലമായ വിധിയുണ്ടാക്കി. വിശാലമായ ഒരു ബിജെപി വിരുദ്ധ ഐക്യം രൂപപ്പെടുത്താൻ കോൺഗ്രസിന് സാധിച്ചില്ല,” ഗോവിന്ദൻ വിമർശിച്ചു. കോൺഗ്രസിലെ രണ്ടാം സ്ഥാനക്കാരൻ എന്ന് പറയുന്ന സംഘടനാ ജനറൽ സെക്രട്ടറി കെസി വേണുഗോപാൽ തിരഞ്ഞെടുപ്പ് കാലയളവിൽ കേരളത്തിലായിരുന്നു. കോൺഗ്രസ് നേതൃത്വം ഈ വിഷയങ്ങൾ ഗൗരവമായി കാണണമെന്നും ഗോവിന്ദൻ ആവശ്യപ്പെട്ടു.
