തിരുവനന്തപുരം കോർപറേഷനിലെ കോൺഗ്രസ് സ്ഥാനാർത്ഥി വൈഷ്ണ സുരേഷിന്റെ പേര് വോട്ടർ പട്ടികയിൽ നിന്ന് ഒഴിവാക്കിയ നടപടിയെ വിമർശിച്ച് ഹൈക്കോടതി. അനാവശ്യ രാഷ്ട്രീയം മാത്രമാണിതെന്നും സംഭവത്തിൽ നവംബർ 20നുള്ളിൽ ജില്ലാ കളക്ടര്‍ തീരുമാനം എടുക്കണമെന്നും കോടതി നിർദ്ദേശിച്ചു. കോർപറേഷനിലെ കോൺഗ്രസിന്റെ ഏറ്റവും പ്രായം കുറഞ്ഞ സ്ഥാനാർത്ഥിയാണ് വൈഷ്ണ.
വോട്ടര്‍ പട്ടികയിൽ നിന്ന് ഒഴിവാക്കിയ നടപടിക്കെതിരെ വൈഷ്ണയുടെ ഹര്‍ജി പരിഗണിച്ചുകൊണ്ടാണ് ഹൈക്കോടതിയുടെ ഉത്തരവ്. വൈഷ്ണക്കെതിരെ പരാതി നൽകിയ സിപിഎം നടപടിയെ വിമര്‍ശിച്ച കോടതി ഒരു യുവ സ്ഥാനാര്‍ത്ഥി മത്സരിക്കാൻ വരുമ്പോള്‍ ഇങ്ങനെയാണോ കാണിക്കേണ്ടതെന്നും ചോദിച്ചു. വോട്ടര്‍ പട്ടികയിൽ നിന്ന് പേരു നീക്കിയതിനെതിരെ വൈഷ്ണ നൽകിയ അപ്പീൽ പരിഗണിക്കാനും ഹൈക്കോടതി ഉത്തരവിട്ടു. വൈഷ്ണ സുരേഷിൻറെ പേര് സപ്ലിമെന്ററി വോട്ടർ പട്ടികയിൽ നിന്ന് തിരഞ്ഞെടുപ്പ് കമ്മീഷൻ നീക്കം ചെയ്തത് സിപിഎം നൽകിയ പരാതി അംഗീകരിച്ചാണ്.
കേസിൽ കക്ഷി ചേർക്കണമെന്ന തിരുവനന്തപുരം കോർപറേഷന്റെ ആവശ്യം നിരാകരിച്ച കോടതി കോർപറേഷന് ഇതിൽ കാര്യമെന്താണെന്ന് ചോദിച്ചു. അനാവശ്യമായ ഇടപെടലുകൾ കോർപറേഷൻ നടത്തരുതെന്നും കോടതി നിർദ്ദേശിച്ചു. മുട്ടട വാർഡിൽ നിന്നാണ് വൈഷ്ണ മത്സരിക്കുന്നത്.
24 വയസുള്ള കുട്ടിയെ സാങ്കേതികത്വത്തിന്‍റെ പേരിൽ മത്സരിപ്പിക്കാതെ ഇരിക്കരുതെന്നാണ് കോടതി ഉത്തരവിൽ വ്യക്തമാക്കിയിട്ടുള്ളത്. ഹര്‍ജിക്കാരിയും പരാതിക്കാരനും നാളെ ജില്ലാ കളക്ടര്‍ക്ക് മുമ്പാകെ ഹാജരാകണമെന്നും കോടതി ഉത്തരവിട്ടു. ഇടക്കാല ഉത്തരവ് പുറപ്പെടുവിച്ച കോടതി ഹർജി പിന്നീട് പരിഗണിക്കാനായി മാറ്റി.
