പാലക്കാട് പുതുശ്ശേരിയിൽ കുട്ടികൾ ഉൾപ്പെട്ട ക്രിസ്മസ് കരോൾ സംഘത്തിന് നേരെയുണ്ടായ ആർഎസ്എസ് ആക്രമണത്തിൽ ശക്തമായ പ്രതിഷേധവുമായി ഡിവൈഎഫ്ഐയും കോൺഗ്രസും രംഗത്തെത്തി. ജില്ലയിലെ സമാധാനാന്തരീക്ഷം തകർക്കാനുള്ള ബോധപൂർവ്വമായ ശ്രമമാണ് നടക്കുന്നതെന്ന് ഇരു പാർട്ടികളും ആരോപിച്ചു. സംഭവത്തിൽ ബിജെപി നേതാവ് സി. കൃഷ്ണകുമാറിനെതിരെയും കടുത്ത വിമർശനമാണ് ഉയരുന്നത്.
കരോൾ സംഘം ഉപയോഗിച്ച വാദ്യോപകരണങ്ങളിൽ സിപിഎം എന്ന് എഴുതിയിരുന്നു എന്ന് ആരോപിച്ചായിരുന്നു ആക്രമണം. കുട്ടികളെ ഭീഷണിപ്പെടുത്തുകയും ബാൻഡ് സെറ്റും മറ്റ് ഉപകരണങ്ങളും തല്ലിത്തകർക്കുകയും ചെയ്ത സംഭവത്തിൽ ആർഎസ്എസ് പ്രവർത്തകൻ അശ്വിൻ രാജിനെ കസബ പൊലീസ് നേരത്തെ അറസ്റ്റ് ചെയ്തിരുന്നു. പ്രതിക്കെതിരെ വധശ്രമത്തിനാണ് കേസെടുത്തിരിക്കുന്നത്.
ആർഎസ്എസ് ഭീഷണിയെ രാഷ്ട്രീയമായി തന്നെ നേരിടുമെന്ന് ഡിവൈഎഫ്ഐ പ്രഖ്യാപിച്ചു. ഇതിന്റെ ഭാഗമായി പാലക്കാട് ജില്ലയിലെ 2500 കേന്ദ്രങ്ങളിൽ ഡിവൈഎഫ്ഐ പ്രതിഷേധ കരോൾ സംഘടിപ്പിക്കും. ആർഎസ്എസിന് തടയാൻ ചങ്കൂറ്റമുണ്ടെങ്കിൽ അതിനെ ആ രീതിയിൽ തന്നെ കൈകാര്യം ചെയ്യുമെന്ന് ഡിവൈഎഫ്ഐ നേതൃത്വം മുന്നറിയിപ്പ് നൽകി. കേരളത്തിന്റെ മതേതരത്വം തകർക്കാൻ അനുവദിക്കില്ലെന്നും ഡിവൈഎഫ്ഐ വ്യക്തമാക്കി.
നാടിന്റെ ഐക്യവും മതസൗഹാർദവും തകർക്കാനുള്ള സംഘപരിവാർ അജണ്ടയാണിതെന്ന് കോൺഗ്രസ് ആരോപിച്ചു. കുട്ടികൾക്ക് നേരെ പോലും ഇത്തരത്തിൽ അക്രമാസക്തരാകുന്നത് അംഗീകരിക്കാനാവില്ലെന്നും കുറ്റക്കാർക്കെതിരെ കർശന നടപടി വേണമെന്നും കോൺഗ്രസ് നേതാക്കൾ ആവശ്യപ്പെട്ടു.
അതേസമയം, അറസ്റ്റിലായ അശ്വിൻ രാജിന് പാർട്ടിയുമായി ബന്ധമില്ലെന്നും മദ്യലഹരിയിലുണ്ടായ തർക്കമാണ് സംഭവത്തിന് പിന്നിലെന്നുമാണ് ബി.ജെ.പി പ്രാദേശിക നേതൃത്വത്തിന്റെ വിശദീകരണം. എന്നാൽ, ബി.ജെ.പി നേതാക്കളുടെ പ്രസ്താവനകളെ തള്ളിക്കളഞ്ഞ രാഷ്ട്രീയ പാർട്ടികൾ, പ്രദേശത്ത് സംഘർഷം സൃഷ്ടിക്കാനുള്ള ഗൂഢാലോചനയാണ് നടന്നതെന്ന് ഉറപ്പിച്ചു പറയുന്നു. സംഭവത്തിൽ കൂടുതൽ പ്രതികൾക്കായി പൊലീസ് അന്വേഷണം ഊർജിതമാക്കിയിട്ടുണ്ട്.
