ഒന്നാംവിള കൊയ്ത്ത് തുടങ്ങി രണ്ടുമാസം പിന്നിട്ടപ്പോള്‍ വില പ്രഖ്യാപിച്ച് സംഭരണം തുടങ്ങുമെന്നറിയിച്ചിട്ടും ഗുണം ലഭിക്കാതെ നെല്‍കര്‍ഷകര്‍. ഒന്നാം വിളയുടെ പകുതിയിലേറെ നെല്ലും കര്‍ഷകര്‍ നഷ്ടത്തില്‍ വിറ്റുകഴിഞ്ഞു. സംഭരണം വൈകിയതു മൂലം നെല്ല് സൂക്ഷിക്കാന്‍ കഴിയാത്തതും മഴ ശക്തിപ്പെട്ടതു മൂലവും നെല്ല് വിറ്റൊഴിവാക്കാന്‍ കര്‍ഷകര്‍ നിര്‍ബന്ധിതരാകുകയായിരുന്നു. വില്‍ക്കാത്ത കര്‍ഷകരുടെ നെല്ല് പാതയോരങ്ങളിലും വീട്ടുമുറ്റത്തും മഴ നനഞ്ഞും മുളച്ചും നശിക്കുകയാണ്.
ഇപ്പോള്‍ പ്രഖ്യാപിച്ച വില കിലോയ്ക്കു 30 രൂപയാണെങ്കിലും ഭൂരിപക്ഷം ചെറുകിട കര്‍ഷകരും 20 രൂപക്കു വരെ നെല്ല് സ്വകാര്യ മില്ലുകള്‍ക്ക് വിറ്റു. പുതുക്കിയ സംഭരണവില വെച്ച് കണക്കാക്കിയാല്‍ കിലോക്ക് 10 രൂപയാണ് ഈ കര്‍ഷകര്‍ക്ക് നഷ്ടപ്പെട്ടത്. ഈ നഷ്ടം ആര് നികത്തുമെന്നാണ് ഇവരുടെ ചോദ്യം. സംഭരണവില മുമ്പേ പ്രഖ്യാപിച്ചിരുന്നെങ്കില്‍ കുറച്ചുകൂടി ഉയര്‍ന്ന വില സ്വകാര്യ മില്ലുകളില്‍നിന്ന് കര്‍ഷകര്‍ക്ക് ലഭിക്കുമായിരുന്നു. 30 രൂപ പ്രഖ്യാപിച്ചപ്പോള്‍ രണ്ട് രൂപ വരെ ഇവരും ഉയര്‍ത്തിയിട്ടുണ്ട്.
2019 – 2020, 2020-21 വര്‍ഷങ്ങളില്‍ സംസ്ഥാന സര്‍ക്കാര്‍ പ്രോത്സാഹന ബോണസായി കിലോഗ്രാമിന് 8.80 രൂപ നല്‍കിയിരുന്നു. ഇപ്പോള്‍ സംഭരണ വില 30 ആക്കുമ്പോള്‍ കേന്ദ്ര താങ്ങുവിലയായ 23.69 രൂപയ്‌ക്കൊപ്പം സംസ്ഥാന പ്രോത്സാഹന ബോണസായ 6.31 രൂപയാണ് ചേര്‍ക്കുക. 2021 നു ശേഷമുള്ള വര്‍ഷങ്ങളില്‍ കേന്ദ്രം താങ്ങുവിലയില്‍ വര്‍ധന വരുത്തിയപ്പോഴെല്ലാം സംസ്ഥാനം ബോണസില്‍ വെട്ടിക്കുറവ് വരുത്തി. കഴിഞ്ഞ വര്‍ഷം 5.20 രൂപ മാത്രമായിരുന്നു ബോണസ്. 2018 മുതല്‍ 2021 വരെ ഉണ്ടായിരുന്ന ബോണസ് തുകയായ 8.80 രൂപ കര്‍ഷകര്‍ക്ക് അവകാശപ്പെട്ടതാണ്. കേന്ദ്ര താങ്ങുവിലയായ 23.69 നൊപ്പം 8.80 രൂപ ബോണസും പുനസ്ഥാപിച്ചാല്‍ സംഭരണ വിലയായി 32.49 രൂപ കര്‍ഷകര്‍ക്ക് നല്‍കണമെന്നാണ് ആവശ്യം.
അതേസമയം ഔട്ട് ടേണ്‍ റേഷ്യോയില്‍ തട്ടി സംഭരണം നീളുകയാണ്. ഇതില്‍ ഇളവ് നല്‍കാമെന്ന മുഖ്യമന്ത്രിയുടെ പ്രഖ്യാപനം മില്ലുടമകള്‍ തള്ളി. കേന്ദ്ര മാനദണ്ഡപ്രകാരം ഒരു ക്വിന്റല്‍ നെല്ലു സംസ്‌കരിക്കുമ്പോള്‍ 68 ശതമാനം അരി തിരികെനല്‍കണം. കേരളത്തില്‍ 64.5 കിലോഗ്രാമേ ലഭിക്കൂയെന്നാണ് മില്ലുടമകളുടെ വാദം. ഇത് 66.5 കിലോഗ്രാമായി നിശ്ചയിക്കാമെന്നാണ് മുഖ്യമന്ത്രിയുടെ വാഗ്ദാനം. എന്നാല്‍ ഇതും അംഗീകരിക്കില്ലെന്നാണ് മില്ലുടമകള്‍ പറയുന്നത്. മുന്‍ വര്‍ഷങ്ങളില്‍ നല്‍കിയ ഉറപ്പുകള്‍ സംസ്ഥാന സര്‍ക്കാര്‍ പാലിക്കാത്തതാണ് മില്ലുടമകളുടെ അവിശ്വാസത്തിനു കാരണം.
അതേസമയം ജില്ലയില്‍നിന്ന് ഒന്നാം വിളയ്ക്ക് ഇത്തവണ മുന്‍വര്‍ഷത്തേതില്‍നിന്നു പകുതി നെല്ലു മാത്രമേ സപ്‌ളൈകോക്ക് സംഭരിക്കാനാകൂയെന്നാണ് കര്‍ഷകര്‍ പറയുന്നത്. പകുതിയോളം നെല്ല് കര്‍ഷകര്‍ വിറ്റഴിച്ചതും കാലാവസ്ഥ പ്രശ്‌നങ്ങളും രോഗങ്ങളും മൂലം ഉത്പാദനം കുറഞ്ഞതുമാണ് ഇതിനു കാരണം. ഒന്നാം വിളയ്ക്ക് ശരാശരി അമ്പതിനായിരം മെട്രിക് ടണ്‍ നെല്ലാണ് പാലക്കാട് ജില്ലയില്‍നിന്നു സംഭരിച്ചിരുന്നത്. എന്നാല്‍ ഇത്തവണ അത് 25000- 30000 ടണ്ണായി കുറയുമെന്നാണ് കരുതുന്നത്. കൊയ്ത്ത് ആരംഭിച്ചതിനു ശേഷം മാത്രം ചര്‍ച്ചകള്‍ തുടങ്ങുന്ന സര്‍ക്കാര്‍ നയമാണ് എല്ലാ അനിശ്ചിതത്വങ്ങള്‍ക്കും കാരണമെന്നാണ് കര്‍ഷകരുടെ വിമര്‍ശനം.
