താമര ചിഹ്നത്തിൽ വോട്ട് ചോദിക്കാൻ ആളില്ലാതെ ആയിരക്കണക്കിന് വാർഡുകൾ, ബിജെപി അണികൾക്കിടയിൽ അതൃപ്തി

കേരളത്തിൽ സ്വാധീനം വർദ്ധിപ്പിക്കുമെന്ന് നേതാക്കൾ അവകാശപ്പെടുമ്പോഴും അയ്യായിരത്തോളം വാർഡുകളിൽ ബിജെപി നയിക്കുന്ന എൻഡിഎ (National Democratic Alliance) യ്ക്ക് സ്ഥാനാർത്ഥികളില്ല. തദ്ദേശ തെരഞ്ഞെടുപ്പിൽ 19,000 സീറ്റുകളിൽ ബിജെപി മത്സരിക്കുമ്പോൾ, അയ്യായിരത്തോളം വാർഡുകളിൽ എൻഡിഎക്ക് (NDA) മുന്നണിക്ക് സ്ഥാനാർത്ഥികളില്ല.

ഗ്രാമപഞ്ചായത്തുകൾ, ബ്ലോക്ക്-ജില്ലാ പഞ്ചായത്തുകൾ, നഗരസഭകൾ, കോർപറേഷനുകൾ എന്നിവയിലായി ആകെ 21,995 വാർഡുകളാണുള്ളത്. ഇതിൽ വലിയൊരു ശതമാനം സീറ്റുകളിലും ബിജെപി സ്ഥാനാർത്ഥികളെ നിർത്തിയപ്പോൾ, ഏകദേശം 20 ശതമാനത്തോളം സീറ്റുകളിൽ എൻഡിഎ സാന്നിധ്യം ഇല്ലാത്ത അവസ്ഥയാണ്. ഇത് അണികൾക്കിടയിൽ അതൃപ്തിക്ക് കാരണമായിട്ടുണ്ട്.

വടക്കൻ കേരളത്തിലാണ് എൻഡിഎക്ക് സ്ഥാനാർത്ഥികളെ കണ്ടെത്താൻ ഏറ്റവും കൂടുതൽ ബുദ്ധിമുട്ട് നേരിട്ടിട്ടുള്ളത്. പ്രത്യേകിച്ചും മലപ്പുറം ജില്ലയിലെ ഭൂരിഭാഗം വാർഡുകളിലും മുന്നണിക്ക് സ്ഥാനാർത്ഥികളില്ല. കണ്ണൂർ, കാസർകോട്, കോഴിക്കോട് ജില്ലകളിലെ ചില പ്രദേശങ്ങളിലും സമാനമായ സാഹചര്യമുണ്ട്.

പാർട്ടിക്ക് സ്വാധീനമില്ലാത്ത മേഖലകളിൽ സ്ഥാനാർത്ഥികളെ നിർത്തേണ്ടതില്ലെന്നത് ചിലയിടങ്ങളിൽ തന്ത്രപരമായ തീരുമാനമാണെങ്കിൽ, മറ്റു പലയിടങ്ങളിലും സംഘടനാ ദൗർബല്യമാണ് സ്ഥാനാർത്ഥി ക്ഷാമത്തിന് കാരണമെന്നാണ് വിലയിരുത്തപ്പെടുന്നത്. അതേസമയം, വിജയസാധ്യതയുള്ള തിരുവനന്തപുരം, പാലക്കാട്, തൃശൂർ, പത്തനംതിട്ട തുടങ്ങിയ ജില്ലകളിൽ ബിജെപി ഇത്തവണ ശക്തമായ മത്സരത്തിനാണ് ഒരുങ്ങുന്നത്.

അതേസമയം, കൊല്ലം ജില്ലയിലെ പുനലൂർ നഗരസഭയിലും ബിജെപി സ്ഥാനാർത്ഥി ക്ഷാമം നേരിടുന്നുണ്ട്. 13 വാർഡുകളിൽ പാർട്ടിക്ക് സ്ഥാനാർത്ഥികളില്ല. കഴിഞ്ഞ തവണ മികച്ച മത്സരം കാഴ്ചവെച്ച വാർഡുകളിലടക്കം ഇത്തവണ പാർട്ടിക്ക് സ്ഥാനാർത്ഥികളില്ലാത്തത് പ്രവർത്തകർക്കിടയിൽ ചർച്ചയായിട്ടുണ്ട്.

പുതിയതായി രൂപീകരിച്ച കുതിരച്ചിറ വാർഡ് ഉൾപ്പെടെ ആകെ 36 വാർഡുകളാണ് പുനലൂർ നഗരസഭയിലുള്ളത്. ഇതിൽ 13 ഇടത്താണ് എൻഡിഎക്ക് സ്ഥാനാർത്ഥികളില്ലാത്തത്. ബിജെപി സ്ഥാനാര്‍ത്ഥിയായി മത്സരിച്ചയാള്‍ പിന്നീട് കൊല്ലപ്പെട്ട കക്കോട് വാര്‍ഡിലടക്കം ഇത്തവണ ബിജെപിക്ക് സ്ഥാനാര്‍ത്ഥിയില്ല. കക്കോട് വാര്‍ഡിലെ ബിജെപി സ്ഥാനാര്‍ത്ഥിയായിരുന്ന സുമേഷ് ആണ് കൊല്ലപ്പെട്ടത്. കൊലപതകത്തിൽ സിപിഎം വാർഡ് അംഗം അടക്കമുള്ള പ്രവര്‍ത്തകര്‍ക്ക് എതിരെ കേസെടുത്തിരുന്നു.

ഐക്കരക്കോണം, ശാസ്താംകോണം, കാഞ്ഞിരമല, ചാലക്കോട്, പേപ്പർമിൽ, നെടുങ്കയം, മുസാവരി, നെല്ലിപ്പള്ളി, വിളക്കുവെട്ടം, കല്ലാർ, തുമ്പോട്, വാളക്കോട്, ഗ്രേസിങ് ബ്ലോക്ക്, ചെമ്മന്തൂർ എന്നീ വാർഡുകളിലാണ് ‘താമര’ ചിഹ്നത്തിൽ വോട്ട് ചോദിക്കാൻ ആളില്ലാത്തത്.

അതേസമയം, സമീപ പഞ്ചായത്തുകളിലെ മിക്ക സീറ്റുകളിലും ബിജെപി സ്ഥാനാർത്ഥികളെ നിർത്തിയിട്ടുണ്ട്.