വരാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പില്‍ മതാടിസ്ഥാനത്തില്‍ സ്ഥാനാര്‍ത്ഥികളെ നിര്‍ത്താന്‍ ബി.ജെ.പി. തീരുമാനിച്ചു. സ്ഥാനാര്‍ത്ഥി പട്ടികയില്‍ ക്രിസ്ത്യന്‍ സമുദായത്തിന് പ്രത്യേക സംവരണം നല്‍കാനാണ് പാര്‍ട്ടി നേതൃത്വത്തിന്റെ തീരുമാനം.
സംസ്ഥാന നേതൃത്വം ക്രിസ്ത്യന്‍ സഭകളുമായി അടുപ്പം വര്‍ധിപ്പിക്കുന്നതിന്റെ ഭാഗമായാണ് ഈ നീക്കം. സംസ്ഥാന ഉപാധ്യക്ഷന്‍ ഷോണ്‍ ജോര്‍ജിന്റെ നേതൃത്വത്തില്‍ സര്‍വേ നടത്തിയ ശേഷമാണ് ഈ തീരുമാനമെന്നാണ് ലഭ്യമാകുന്ന സൂചനകള്‍.
സര്‍ക്കുലര്‍ പുറത്ത്
ബി.ജെ.പി. കണ്ണൂര്‍ നോര്‍ത്ത് ജില്ലാ പ്രസിഡന്റ് കെ.കെ. വിനോദ് കുമാര്‍ ഇറക്കിയ സര്‍ക്കുലറാണ് ചര്‍ച്ചയായിരിക്കുന്നത്. ‘തദ്ദേശ തിരഞ്ഞെടുപ്പില്‍ ക്രിസ്ത്യന്‍ വിഭാഗത്തില്‍പ്പെട്ടവരെ സ്ഥാനാര്‍ത്ഥികളാക്കേണ്ടതിന്റെ ആവശ്യകത സംസ്ഥാന ഘടകം അറിയിച്ചിട്ടുണ്ട്. അതിന്റെ ഭാഗമായി നടത്തിയ സര്‍വേയില്‍ ഓരോ പഞ്ചായത്തിലും ക്രിസ്ത്യന്‍ സ്ഥാനാര്‍ത്ഥികളെ പരിഗണിക്കുന്നത് ഉചിതമായിരിക്കുമെന്ന് കണ്ടെത്തി,’ എന്നാണ് സര്‍ക്കുലറില്‍ വ്യക്തമാക്കുന്നത്.
കണ്ണൂരിലെ മലയോര മേഖലയിലെ ഒമ്പത് പഞ്ചായത്തുകളിലെ 47 വാര്‍ഡുകളിലാണ് ക്രിസ്ത്യന്‍ സ്ഥാനാര്‍ത്ഥികളെ നിര്‍ത്താന്‍ തീരുമാനിച്ചിരിക്കുന്നത്. ഗ്രാമ പഞ്ചായത്തുകളില്‍ കൃത്യമായ അനുപാതത്തില്‍ ക്രിസ്ത്യന്‍ സമുദായത്തില്‍നിന്നുള്ളവരെ മത്സരിപ്പിക്കണമെന്നാണ് സംസ്ഥാന നേതൃത്വം ജില്ലാ നേതൃത്വത്തിന് നല്‍കിയ നിര്‍ദേശം.
പഞ്ചായത്തുകളുടെ പേരും അതതു പഞ്ചായത്തില്‍ നിന്ന് എത്ര സീറ്റുകള്‍ ക്രിസ്ത്യന്‍ സ്ഥാനാര്‍ത്ഥികള്‍ക്ക് നല്‍കണമെന്നും സര്‍ക്കുലറില്‍ വ്യക്തമാക്കിയിട്ടുണ്ട്. സര്‍ക്കുലര്‍ രാഷ്ട്രീയ ചര്‍ച്ചകള്‍ക്ക് തുടക്കം കുറിച്ചിരിക്കുകയാണ്.
പഞ്ചായത്തുകള്‍ ( സീറ്റുകള്‍)
ഉദയഗിരിയിൽ നാല്, ആലക്കോട് നാല്, നടുവില്‍ എട്ട്, ഏരുവേശി ഏഴ്, പയ്യാവൂര്‍ എട്ട്, ഉളിക്കല്‍ ഒമ്പത്, ശ്രീകണ്ഠാപുരം രണ്ട്, ചപ്പാരപ്പടവ് രണ്ട്, ചെറുപുഴ മൂന്ന് എന്നിങ്ങനെ 47 സീറ്റുകളാണുള്ളത്.
