കാഞ്ഞിരപ്പള്ളി ജനറൽ ആശുപത്രിയിൽ ഗുരുതര വീഴ്ചയെത്തുടർന്ന് മോർച്ചറിയിൽ സൂക്ഷിച്ച മൃതദേഹം ജീർണ്ണിച്ചു. മണിമല സ്വദേശിയായ വ്യക്തിയുടെ മൃതദേഹത്തോടാണ് ആശുപത്രി അധികൃതർ അനാദരവ് കാട്ടിയത്. തകരാറിലായ ഫ്രീസറിൽ മൃതദേഹം സൂക്ഷിച്ചതാണ് ഈ ദുരവസ്ഥയ്ക്ക് കാരണമായത്.
മൃതദേഹം ഏറ്റുവാങ്ങാനായി ബന്ധുക്കൾ എത്തിയപ്പോഴാണ് വിവരം പുറത്തറിയുന്നത്. മോർച്ചറിയിൽ നിന്ന് അസഹനീയമായ ദുർഗന്ധം വമിക്കുന്ന നിലയിലായിരുന്നു മൃതദേഹം. ഇതോടെ ക്ഷുഭിതരായ ബന്ധുക്കളും നാട്ടുകാരും ആശുപത്രിക്ക് മുന്നിൽ വലിയ പ്രതിഷേധം നടത്തി. സംഭവത്തിൽ ആശുപത്രി അധികൃതർ വീഴ്ച സമ്മതിച്ചിട്ടുണ്ട്. അനാസ്ഥ കാണിച്ച ജീവനക്കാർക്കെതിരെ കർശന നടപടിയെടുക്കുമെന്ന് അധികൃതർ ഉറപ്പുനൽകിയതോടെയാണ് പ്രതിഷേധം തണുത്തത്.
