ശബരിമല സ്വർണ്ണക്കൊള്ളക്കേസിൽ എല്ലാ പ്രതികളെയും അറസ്റ്റ് ചെയ്യണമെന്നും ദേവസ്വം മന്ത്രി വി എൻ വാസവൻ രാജി വയ്ക്കണമെന്നും ആവശ്യപ്പെട്ട് കോൺഗ്രസ് സെക്രട്ടേറിയറ്റ് മാർച്ചും ധർണയും നടത്തി. കേരളത്തിന്റെ ചുമതലയുള്ള എഐസിസി ജനറൽ സെക്രട്ടറി ദീപാ ദാസ് മുൻഷി ഉദ്ഘാടനം ചെയ്തു.
ഈ സമരം രാഷ്ട്രീയപരമല്ല മറിച്ച് എൽഡിഎഫ് സർക്കാർ വിശ്വാസം വഞ്ചിച്ച ലക്ഷക്കണക്കിന് ശബരിമല ഭക്തർക്ക് വേണ്ടിയാണെന്ന് അവർ പറഞ്ഞു. സർക്കാർ ഭക്തരുടെ വിശ്വാസം തകർക്കുകയും ക്ഷേത്ര വിഷയങ്ങളിൽ തട്ടിപ്പ് നടത്തുകയുമാണെന്നവർ ആരോപിച്ചു.
ശബരിമല സ്വർണ്ണക്കൊള്ളയിൽ ഇതുവരെ ഏതാനും ചില അറസ്റ്റുകൾ മാത്രമാണ് നടന്നിട്ടുള്ളത്. 2019 മുതൽ 2025 വരെ ഇതിൽ ഉൾപ്പെട്ട എല്ലാ ഉദ്യോഗസ്ഥരെയും അറസ്റ്റ് ചെയ്യണമെന്നവർ ആവശ്യപ്പെട്ടു. ദേവസ്വം മന്ത്രി രാജിവെക്കണമെന്നും അവർ ആവർത്തിച്ചു. പൂർണ്ണമായ ഉത്തരവാദിത്തം ഉറപ്പാക്കാനും ക്ഷേത്ര ഭരണത്തിലുള്ള ജനങ്ങളുടെ വിശ്വാസം പുനഃസ്ഥാപിക്കാനും ഹൈക്കോടതിയുടെ മേൽനോട്ടത്തിലുള്ള സിബിഐ അന്വേഷണവും അവർ ആവശ്യപ്പെട്ടു.
മന്ത്രി രാജിവെക്കുന്നതുവരെ കോൺഗ്രസും യുഡിഎഫും പ്രതിഷേധം തുടരും. വരാനിരിക്കുന്ന തിരഞ്ഞെടുപ്പുകളിൽ കേരളത്തിലെ ജനങ്ങൾ എൽഡിഎഫിനൊപ്പം നിൽക്കില്ലെന്ന് ദീപാ ദാസ് മുൻഷി മുന്നറിയിപ്പ് നൽകി. അവർക്ക് ഞങ്ങളുടെ ശബ്ദത്തെ തടയാനാകില്ല, ലക്ഷക്കണക്കിന് ഭക്തരുടെ പ്രാർത്ഥനകളെ തടയാനാകില്ല. സ്വാമി ശരണം അയ്യപ്പ വിളിച്ചുകൊണ്ടാണ് അവർ പ്രസംഗം അവസാനിപ്പിച്ചത്.
ശബരിമല സ്വർണ്ണ കുംഭകോണത്തിന് പിന്നിലെ യഥാർത്ഥ കുറ്റവാളികളെ നിയമത്തിന് മുന്നിൽ കൊണ്ടുവരണം എന്ന് രമേശ് ചെന്നിത്തല ആവശ്യപ്പെട്ടു. എൽഡിഎഫ് സർക്കാരിനെയും സി പി എം നേതൃത്വത്തെയും രൂക്ഷമായി വിമർശിച്ച കെപിസിസി പ്രസിഡന്റ് സണ്ണി ജോസഫ് മുൻ ദേവസ്വം കമ്മീഷണറും സിപിഎം നേതാവുമായ വാസുവിൻ്റെ അറസ്റ്റ്, കള്ളന്മാർ കപ്പലിനുള്ളിൽത്തന്നെയാണെന്ന വസ്തുത സ്ഥിരീകരിക്കുന്നതാണെന്ന് പറഞ്ഞു.
എഐസിസി ജനറൽ സെക്രട്ടറി കെ സി വേണുഗോപാൽ, മുതിർന്ന നേതാക്കളായ കെ മുരളീധരൻ കൊടിക്കുന്നിൽ സുരേഷ് പി സി വിഷ്ണുനാഥ് എംഎൽഎ തുടങ്ങിയവർ നേതൃത്വം നൽകി.
