രാഹുൽ മാങ്കൂട്ടത്തിൽ പാർട്ടിക്ക് പുറത്താണെന്നും കോൺഗ്രസ് നേതാക്കൾ രാഹുലുമായി വേദി പങ്കിടില്ലെന്നും കെ മുരളീധരൻ. തദ്ദേശ തെരഞ്ഞെടുപ്പിനുള്ള പ്രചരണത്തിനിടെ തിരുവനന്തപുരത്ത് മാധ്യമ പ്രവർത്തകരോടായിരുന്നു മുരളീധരന്റെ പ്രതികരണം.
രാഹുൽ മാങ്കൂട്ടം ഇങ്ങനെ ചർച്ചയായി നിൽക്കുന്നത് മൊത്തത്തിൽ ഒരു നെഗറ്റീവ് ആണോ കോൺഗ്രസിന് എന്ന ചോദ്യത്തിന് ഞങ്ങൾക്കൊരു നെഗറ്റീവുമില്ല എന്നായിരുന്നു പ്രതികരണം- “ഞങ്ങൾക്ക് നെഗറ്റീവ് ഒന്നും ഇല്ല, അദ്ദേഹം പാർട്ടിക്ക് പുറത്താ”.
കോൺഗ്രസ് സ്ഥാനാർത്ഥികൾക്ക് വേണ്ടി പ്രചരണം നടത്താൻ അദ്ദേഹത്തിന് സ്വാതന്ത്ര്യം ഉണ്ടല്ലോയെന്നും മുരളീധരൻ പറഞ്ഞു. “അദ്ദേഹത്തിന് വേണ്ടി വോട്ട് ചെയ്ത ആൾക്കാരൊക്കെ ഇലക്ഷന് നിൽക്കുമ്പോ അവർക്ക് വേണ്ടി പ്രചരണം നടത്തുന്നത് ആയിരിക്കും. അതാ പ്രദേശത്തിന് ഗുണകരമാണോയെന്ന് അതത് പ്രദേശത്തെ ഘടകങ്ങൾ തീരുമാനിക്കും,” മുരളീധരൻ പറഞ്ഞു.
ഞങ്ങളോടൊപ്പം ആരും വേദി പങ്കിട്ടിട്ടില്ല. കോൺഗ്രസ് നേതാക്കൾ പങ്കെടുക്കുന്ന വേദിയിൽ അദ്ദേഹത്തിന് പ്രവേശനമില്ല. ഇപ്പോൾ ഞങ്ങളുടെ കൂട്ടത്തിലുള്ള എല്ലാവരും കോൺഗ്രസുകാരൊന്നും അല്ല. സ്ഥാനാർത്ഥികളോടുള്ള ഇഷ്ടം കൊണ്ട് നടക്കുന്നവരുമുണ്ടെന്നും മുരളീധരൻ പറഞ്ഞു.
പാലക്കാട് എംഎൽഎ രാഹുൽ മാങ്കൂട്ടത്തിലുമായി ബന്ധപ്പെട്ട പുതിയ ഓഡിയോ ക്ലിപ് കഴിഞ്ഞ ദിവസമാണ് പുറത്ത് വന്നത്. നമുക്ക് കുഞ്ഞ് വേണമെന്നും നീ ഗര്ഭിണിയാകണമെന്നും രാഹുൽ ഒരു സ്ത്രീയോട് പറയുന്നത് ഈ ഓഡിയോയിൽ കേൾക്കാം. ശേഷം, ഗര്‍ഭച്ഛിദ്രത്തിന് രാഹുല്‍ മാങ്കൂട്ടത്തില്‍ അവരോട് ആവശ്യപ്പെടുന്നു. അതിനുള്ള ശാരീരിക, മാനസിക ബുദ്ധിമുട്ടുകൾ സ്ത്രീ വിവരക്കുമ്പോൾ അസഭ്യം കലർന്ന മറുപടിയാണ് രാഹുൽ നൽകുന്നത്.
