തദ്ദേശ തിരഞ്ഞെടുപ്പിൽ കോഴിക്കോട് കോർപറേഷനിൽ ശ്രദ്ധേയമായ നീക്കവുമായി കോൺഗ്രസ്. ചലച്ചിത്ര സംവിധായകൻ വി.എം. വിനുവിനെ മേയർ സ്ഥാനാർഥിയായി മത്സരിപ്പിക്കാൻ കോൺഗ്രസ് ആലോചിക്കുന്നതായി റിപ്പോർട്ടുകൾ. ഇതുമായി ബന്ധപ്പെട്ട ഔദ്യോഗിക സ്ഥാനാർഥി പ്രഖ്യാപനം ഉടൻ ഉണ്ടാകുമെന്നാണ് സൂചന.
പാറേപ്പടിയിലോ ചേവായൂരിലോ വി.എം. വിനുവിനെ സ്ഥാനാർഥിയായി പരിഗണിച്ചേക്കുമെന്നാണ് വിവരം. കോൺഗ്രസ് നേതൃത്വം വിനുവുമായി ചർച്ച നടത്തുകയും, അദ്ദേഹം മത്സരിക്കുന്നതിന് സമ്മതം അറിയിക്കുകയും ചെയ്തതായാണ് വിവരങ്ങൾ.
കോർപറേഷനിലെ 49 സീറ്റുകളിലാണ് കോൺഗ്രസ് സ്ഥാനാർഥികളെ നിർത്തുന്നത്. വിനു ഉൾപ്പെടെയുള്ളവരുടെ ആദ്യഘട്ട സ്ഥാനാർഥിപ്പട്ടിക ഇന്ന് പ്രഖ്യാപിക്കുമെന്നും സൂചനയുണ്ട്.
പ്രമുഖ എഴുത്തുകാരനും നാടകപ്രവർത്തകനുമായിരുന്ന വിനയൻ്റെ മകനാണ് വി.എം. വിനു. പഠനകാലത്ത് നാടകരംഗത്ത് സജീവമായിരുന്ന ഇദ്ദേഹം പിന്നീട് സിനിമയിലെത്തി.
‘ബാലേട്ടൻ’, ‘വേഷം’, ‘ബസ് കണ്ടക്ടർ’, ‘പല്ലാവൂർ ദേവനാരായണൻ’, ‘മയിലാട്ടം’, ‘ആകാശത്തിലെ പറവകൾ’ തുടങ്ങിയ ഹിറ്റ് ചിത്രങ്ങൾ ഉൾപ്പെടെ പതിനഞ്ചോളം സിനിമകൾ ഇദ്ദേഹം സംവിധാനം ചെയ്തിട്ടുണ്ട്.
