ബിജെപി നയിക്കുന്ന എൻഡിഎ (National Democratic Alliance) യ്ക്ക് ഭരണത്തുടർച്ച പ്രവചിച്ച ബിഹാർ എക്സിറ്റ് പോൾ ഫലങ്ങൾ തള്ളി കോൺഗ്രസ്. നവംബർ 14ന് ഫലം വരുമ്പോൾ കേവല ഭൂരിപക്ഷം നേടി മഹാസഖ്യം (Mahagathbandhan) അധികാരത്തിലേറുമെന്ന് ബിഹാറിന്‍റെ ചുമതലയുള്ള എഐസിസി സെക്രട്ടറി ദേവേന്ദ്ര യാദവ് പറഞ്ഞു.
എൻഡിഎയ്ക്കും നിതീഷ് കുമാറിനും ഭരണത്തുടർച്ച പ്രവചിച്ച എക്സിറ്റ് പോൾ ഫലങ്ങൾ പ്രകാരം, എൻഡിഎ യ്ക്ക് 130 മുതൽ 167 വരെ സീറ്റുകൾ ലഭിക്കും. മൊത്തം 243 അംഗ നിയമസഭയാണ് ബിഹാറിലേത്. കേവല ഭൂരിപക്ഷത്തിന് 122 സീറ്റാണ് വേണ്ടത്. കോൺഗ്രസും രാഷ്ട്രീയ ജനതാദളും നയിക്കുന്ന മഹാസഖ്യത്തിന് 70 മുതൽ 108 വരെ സീറ്റുകളാണ് എക്സിറ്റ് പോൾ പ്രകാരമുള്ള പ്രവചനം. ഒരു എക്സിറ്റ് പോൾ മാത്രം എൻഡിഎ യ്ക്ക് 184 മുതൽ 209 വരെ സീറ്റുകൾ പ്രവചിക്കുന്നുണ്ട്. മഹാസഖ്യത്തിന് ഇതു പ്രകാരം ലഭിക്കാൻ സാധ്യതയുള്ളത് 32 മുതൽ 49 വരെ സീറ്റുകളാണ്.
വലിയ പ്രതീക്ഷകളുമായി വന്ന പ്രശാന്ത് കിഷോറിന്റെ ജൻ സുരാജ് പാർട്ടി (ജെഎസ് പി) അക്കൗണ്ട് തുറന്നേക്കാമെങ്കിലും വലിയ മുന്നേറ്റം നടത്തില്ലെന്നാണ് എക്സിറ്റ് പോൾ ഫലങ്ങൾ സൂചിപ്പിക്കുന്നത്.
