ശ്രീലങ്കയിൽ കനത്ത നാശം വിതച്ച ദിത്വാ ചുഴലിക്കാറ്റിനെത്തുടർന്ന് കൊളംബോയിലേക്ക് പോകേണ്ടിയിരുന്ന അഞ്ച് വിമാനങ്ങൾ തിരുവനന്തപുരം അന്താരാഷ്ട്ര വിമാനത്താവളത്തിലേക്ക് തിരിച്ചുവിട്ടു. വെളളിയാഴ്ച പുലർച്ചെ 3.44 മുതലാണ് തിരിച്ചു വിട്ട വിമാനങ്ങൾ തിരുവനന്തപുരത്ത് ലാൻഡ് ചെയ്ത് തുടങ്ങിയത്.
ഗൾഫ് മേഖലയിൽ നിന്നും മലേഷ്യ, മുംബൈ എന്നിവിടങ്ങളിൽ നിന്നും കൊളംബോയിലേക്ക് പുറപ്പെട്ട വിമാനങ്ങളാണ് കാലാവസ്ഥാ മുന്നറിയിപ്പിനെത്തുടർന്ന് തിരിച്ചു വിട്ടത്. ദുബായ്, ദോഹ എന്നിവിടങ്ങളിൽ നിന്നുള്ള രണ്ട് ശ്രീലങ്കൻ എയർലൈൻസ് വിമാനങ്ങൾ, അബുദാബിയിൽ നിന്നുള്ള എത്തിഹാദ് എയർവേസ്, ക്വാലാലംപൂരിൽ നിന്നുള്ള എയർ ഏഷ്യ, മുംബൈയിൽ നിന്നുള്ള ഇൻഡിഗോ വിമാനം എന്നിവയാണ് തിരുവനന്തപുരത്ത് ഇറക്കിയതെന്ന് വിമാനത്താവള അധികൃതർ അറിയിച്ചു.
ഇതിൽ മുംബൈയിൽ നിന്നുള്ള ഇൻഡിഗോ വിമാനം കാലാവസ്ഥ അനുകൂലമായതിനെത്തുടർന്ന് രാവിലെ 11.32-ഓടെ കൊളംബോയിലേക്ക് യാത്ര തിരിച്ചു. മറ്റ് വിമാനങ്ങളിലെ യാത്രക്കാരെ അതത് എയർലൈനുകളും ഗ്രൗണ്ട് ഹാൻഡിലിംഗ് ഏജൻസികളും ചേർന്ന് വിവിധ ഹോട്ടലുകളിലേക്ക് മാറ്റിയതായും അധികൃതർ അറിയിച്ചു.
ബംഗാൾ ഉൾക്കടലിലും ശ്രീലങ്കയിലുമായി രൂപം കൊണ്ട ദിത്വാ ചുഴലിക്കാറ്റ് മൂലമുണ്ടായ ശക്തമായ മഴയിലും മണ്ണിടിച്ചിലിലും ശ്രീലങ്കയിൽ 56 പേർ മരണപ്പെടുകയും 21 പേരെ കാണാതാവുകയും ചെയ്തു. 12,000 കുടുംബങ്ങളെ മാറ്റി പാർപ്പിച്ചതായും റിപ്പോർട്ടുകൾ പറയുന്നു. രക്ഷാപ്രവർത്തനം പുരോഗമിക്കുകയാണ്.
അതേസമയം, ദിത്വ ചുഴലിക്കാറ്റ് വടക്ക്-വടക്കുപടിഞ്ഞാറൻ ദിശയിൽ സഞ്ചരിക്കുന്നതായി കേന്ദ്ര കാലാവസ്ഥാ വകുപ്പ് (IMD) അറിയിച്ചു. നവംബർ 30-ന് പുലർച്ചെയോടെ തമിഴ്നാട് , തെക്കൻ ആന്ധ്രാപ്രദേശ് തീരങ്ങളിലേക്ക് ചുഴലിക്കാറ്റ് അടുത്തേക്കും. നവംബർ 28 മുതൽ ദക്ഷിണേന്ത്യയിൽ കനത്ത മഴയ്ക്ക് സാധ്യതയുണ്ട്. കേരളം കൂടാതെ തമിഴ്നാട്, ആന്ധ്രാപ്രദേശ്, , കർണാടക, തെലങ്കാന എന്നീ സംസ്ഥാനങ്ങളിൽ ജാഗ്രതാ നിർദ്ദേശം നൽകിയിട്ടുണ്ട്.
കേരളത്തിൽ ഇന്നും നാളെയും ശക്തമായ മഴ ലഭിക്കും.
