ഹോങ്കോങ്ങിലെ പാർപ്പിട സമുച്ചയത്തിലുണ്ടായ വൻ തീപിടുത്തത്തിൽ മരിച്ചവരുടെ എണ്ണം 55 ആയി ഉയർന്നു. 250-ലധികം ആളുകളെ ഇനിയും കണ്ടെത്താനായിട്ടില്ലെന്ന് അധികൃതർ അറിയിച്ചു. തായ് പോ (Tai Po) പ്രവിശ്യയിലെ ‘വാങ് ഫുക് കോർട്ട്’ (Wang Fuk Court) എന്ന ഫ്ലാറ്റ് സമുച്ചയത്തിലാണ് ബുധനാഴ്ച ഉച്ചയോടെ തീപിടുത്തമുണ്ടായത്. 63 വർഷത്തിനിടയിൽ ഹോങ്കോങ്ങ് കണ്ട ഏറ്റവും വലിയ അഗ്നിബാധയാണിത്.
കെട്ടിടത്തിന്റെ അറ്റകുറ്റപ്പണികൾക്കായി ഉപയോഗിച്ചിരുന്ന മുളകൊണ്ടുള്ള സ്കഫോൾഡിംഗിൽ (bamboo scaffolding) നിന്നാണ് തീ പടർന്നത് എന്നാണ് പ്രാഥമിക നിഗമനം. നിർമ്മാണ കമ്പനിയുടെ അനാസ്ഥയാണ് അപകടത്തിന് കാരണമെന്ന് പോലീസ് സംശയിക്കുന്നു. സംഭവവുമായി ബന്ധപ്പെട്ട് നിർമ്മാണ കമ്പനിയിലെ മൂന്ന് ഉദ്യോഗസ്ഥരെ പോലീസ് അറസ്റ്റ് ചെയ്തിട്ടുണ്ട്.
എട്ട് ബ്ലോക്കുകളിലായി 2000-ത്തോളം അപ്പാർട്ടുമെന്റുകളുള്ള സമുച്ചയമാണിത്. ശക്തമായ കാറ്റ് തീ പടരാൻ കാരണമായി. തീപിടുത്തത്തെ തുടർന്ന് തൊള്ളായിരത്തോളം ആളുകളെ സമീപത്തെ ഷെൽട്ടറുകളിലേക്ക് മാറ്റി പാർപ്പിച്ചു. കാണാതായവർക്ക് വേണ്ടിയുള്ള തിരച്ചിൽ ഇപ്പോഴും തുടരുകയാണ്. മരിച്ചവരിൽ ഒരു ഫയർഫോഴ്സ് ഉദ്യോഗസ്ഥനും ഉൾപ്പെടുന്നു. പരിക്കേറ്റ 60-ലധികം പേർ വിവിധ ആശുപത്രികളിൽ ചികിത്സയിലാണ്.
തീപിടുത്തം നിയന്ത്രണവിധേയമാക്കാൻ 140-ലധികം ഫയർ എഞ്ചിനുകളാണ് സ്ഥലത്തെത്തിയത്. കെട്ടിട നിർമ്മാണ ചട്ടങ്ങൾ ലംഘിച്ചിട്ടുണ്ടോ എന്ന് പരിശോധിക്കുമെന്ന് അധികൃതർ വ്യക്തമാക്കി.
