ചികിത്സ തേടിയെത്തുന്ന രോഗികൾക്ക് പണമില്ലെന്നോ, ആവശ്യമായ രേഖകളില്ലെന്നോ പറഞ്ഞ് ചികിത്സ നിഷേധിക്കാൻ ആശുപത്രികൾക്ക് അവകാശമില്ലെന്ന് കേരള ഹൈക്കോടതി. സംസ്ഥാനത്തെ ആശുപത്രികളുടെ പ്രവർത്തനങ്ങൾക്കായി സുപ്രധാനമായ മാർഗ്ഗനിർദ്ദേശങ്ങൾ പുറത്തിറക്കിക്കൊണ്ടാണ് ഹൈക്കോടതിയുടെ ഉത്തരവ്. ജീവൻ രക്ഷിക്കാനുള്ള പ്രാഥമിക കർത്തവ്യം എല്ലാ ആശുപത്രികൾക്കുമുണ്ടെന്ന് കോടതി ഓർമ്മിപ്പിച്ചു.
ആശുപത്രികളുടെ പ്രവർത്തനങ്ങൾ സംബന്ധിച്ച് പുറപ്പെടുവിച്ച നിർദ്ദേശങ്ങൾ പ്രകാരം, അത്യാഹിത വിഭാഗത്തിലെത്തുന്ന എല്ലാ രോഗികളെയും പരിശോധിച്ച് അവരുടെ ആരോഗ്യനില ഭദ്രമാണെന്ന് ഉറപ്പാക്കേണ്ടത് ആശുപത്രി അധികൃതരുടെ ഉത്തരവാദിത്തമാണ്. തുടർചികിത്സ ആവശ്യമുണ്ടെങ്കിൽ, രോഗിയെ സുരക്ഷിതമായി മറ്റൊരു ആശുപത്രിയിലേക്ക് മാറ്റാനുള്ള ഉത്തരവാദിത്തം നിലവിലെ ആശുപത്രി ഏറ്റെടുക്കണം.
മാത്രമല്ല, ചികിത്സാ നിരക്കുകളിൽ വ്യക്തത ഉറപ്പാക്കണമെന്നും ഹൈക്കോടതി നിർദ്ദേശിച്ചു. ആശുപത്രികളിലെ റിസപ്ഷനിലും വെബ്‌സൈറ്റുകളിലും മലയാളത്തിലും ഇംഗ്ലീഷിലും ചികിത്സാ നിരക്കുകൾ വ്യക്തമായി പ്രദർശിപ്പിക്കണം. ഓരോ ചികിത്സയുടെയും കൃത്യമായ നിരക്കുകൾ രോഗികൾക്കും അവരുടെ ബന്ധുക്കൾക്കും എളുപ്പത്തിൽ മനസ്സിലാക്കാൻ കഴിയുന്ന തരത്തിലായിരിക്കണം പ്രദർശിപ്പിക്കേണ്ടതെന്നും കോടതി നിർദ്ദേശത്തിൽ വ്യക്തമാക്കി.
ആശുപത്രികളുമായി ബന്ധപ്പെട്ട് ഉയർന്നുവന്ന നിരവധി പരാതികളുടെയും ഹർജികളുടെയും അടിസ്ഥാനത്തിലാണ് ഹൈക്കോടതിയുടെ ഉത്തരവ്.
