മുസ്‍ലിം ലീഗ് പ്രവർത്തകനായിരുന്ന അരിയിൽ ഷുക്കൂർ വധക്കേസിലെ പ്രതികളിലൊരാളെ മേഖലാ സെക്രട്ടറിയാക്കി ഡിവൈഎഫ്ഐ (DYFI). കെ. ഷിജിനെയാണ് ഡിവൈഎഫ്ഐയുടെ കണ്ണൂർ കണ്ണപുരം ഈസ്റ്റ് മേഖലാ സെക്രട്ടറിയായി തിരഞ്ഞെടുത്തത്. കമ്മിറ്റിയുടെ മേഖലാ സമ്മേളനത്തിലാണ് ഷിജിനെ സെക്രട്ടറി സ്ഥാനത്തേക്ക് തിരഞ്ഞെടുത്തത്. ഷുക്കൂർ വധക്കേസിലെ 15-ാം പ്രതിയാണ് ഷിജിൻ.
മുസ്‍ലിം ലീഗിന്റെ വിദ്യാർത്ഥി വിഭാഗമായ എംഎസ്എഫിന്റെ പ്രാദേശിക പ്രവർത്തകനായിരുന്നു ഷുക്കൂർ. 2012 ഫെബ്രുവരി 20-നാണ് ഷുക്കൂർ കൊല്ലപ്പെട്ടത്. സിപിഎം നേതാക്കളായ പി. ജയരാജനും ടി.വി. രാജേഷും സഞ്ചരിച്ച വാഹനം യൂത്ത് ലീഗ് പ്രവർത്തകർ ആക്രമിച്ചതിന് തൊട്ടുപിന്നാലെയായിരുന്നു കൊലപാതകം. തളിപ്പറമ്പിനടുത്തുള്ള പട്ടുവത്തിൽ വച്ചാണ് ആക്രമണം നടന്നത്. തുടർന്ന് ചെറുകുന്ന് കീഴറയിൽ വച്ച് ഷുക്കൂർ കൊല്ലപ്പെടുകയായിരുന്നു.
ഷുക്കൂറിനെ കണ്ണപുരം കീഴറയിലെ വള്ളുവൻകടവിനടുത്ത് വച്ച് രണ്ടര മണിക്കൂറോളം ബന്ദിയാക്കിയ ശേഷമാണ് കൊലപാതകം നടത്തിയതെന്നാണ് കേസ്. കേസിൽ ആകെ 33 പ്രതികളാണുള്ളത്. സിപിഎം നേതാക്കളായ പി. ജയരാജനെയും ടി.വി. രാജേഷിനെയും സിബിഐ (CBI) പ്രതിചേർത്തിരുന്നു.
കേസിൻ്റെ വിചാരണ നടപടികൾ അടുത്തിടെയാണ് ആരംഭിച്ചത്.
കൊലപാതക കേസിലെ പ്രതിയെ യുവജന സംഘടനയുടെ സുപ്രധാന സ്ഥാനത്തേക്ക് തിരഞ്ഞെടുത്ത നടപടി രാഷ്ട്രീയ കേന്ദ്രങ്ങളിൽ ചർച്ചയായിട്ടുണ്ട്.
