കരിക്കകം സ്വദേശിനി ശിവപ്രിയയുടെ മരണത്തിൽ വിശദ അന്വേഷണത്തിന് ആരോഗ്യ വകുപ്പ്. തിരുവനന്തപുരം എസ്എടി (SAT) ആശുപത്രിയിൽ പ്രസവത്തിന് ശേഷം അണുബാധയെ തുടർന്നാണ് ശിവപ്രിയ മരിച്ചത്. ആശുപത്രിയിൽ നിന്നാണ് അണുബാധയേറ്റതെന്ന പരാതിയെ തുടർന്ന് വിദഗ്ധ സമിതിയുടെ അന്വേഷണത്തിന് ആരോഗ്യവകുപ്പ് ഉത്തരവിട്ടു.
തിരുവനന്തപുരം മെഡിക്കൽ കോളേജ് ആശുപത്രിക്ക് പുറത്തുള്ള വിദഗ്ധരായിരിക്കും സമിതിയിൽ ഉണ്ടായിരിക്കുക. ക്രിട്ടിക്കൽ കെയർ, ഇൻഫെക്ഷസ് ഡിസീസ്, ഗൈനക്കോളജി എന്നീ വിഭാഗങ്ങളിലെ മേധാവികൾ അന്വേഷണത്തിന് നേതൃത്വം നൽകും. ഒരു ത്വക് രോഗ വിദഗ്ധനും ഉൾപ്പെട്ടതാണ് സമിതി. രണ്ട് ദിവസത്തിനകം റിപ്പോർട്ട് സമർപ്പിക്കാനാണ് ആരോഗ്യ വകുപ്പ് മന്ത്രി വീണാ ജോർജ് മെഡിക്കൽ വിദ്യാഭ്യാസ ഡയറക്ടർ ഡോ. കെ. വി. വിശ്വനാഥന് നിർദ്ദേശം നൽകിയിരിക്കുന്നത്.
26 കാരിയായ ശിവപ്രിയയുടെ മരണം ആരോഗ്യ വകുപ്പിന്റയെ അനാസ്ഥയാണെന്ന് ആരോപിച്ച് വ്യാപക പ്രതിഷേധം നടക്കുന്നതിനിടെയാണ് സമിതിയെ നിയമിക്കാനുള്ള ആരോഗ്യ വകുപ്പിന്റെ തീരുമാനം.
ഒക്ടോബർ 22 നാണ് ശിവപ്രിയ ഒരാൺകുഞ്ഞിന് ജന്മം നൽകിയത്. ഒക്ടോബർ 25 ന് അവരെ ഡിസ്ചാർജ് ചെയ്യുകയും ചെയ്തു. എന്നാൽ, അടുത്ത ദിവസം തന്നെ കടുത്ത പനിയെ തുടർന്ന് ശിവപ്രിയയെ വീണ്ടും ആശുപത്രിയിൽ പ്രവേശിപ്പിച്ചു.
രോഗനില വഷളായതിനെ തുടർന്ന് പത്ത് ദിവസത്തോളം ശിവപ്രിയ വെൻ്റിലേറ്ററിലായിരുന്നു. തുടർന്നാണ് മരണം സംഭവിച്ചത്. രക്തപരിശോധനയിൽ ആശുപത്രിയിൽ നിന്ന് പകരുന്ന ഒരുതരം ബാക്ടീരിയയായ അസിനെറ്റോബാക്റ്ററിന്റെ (Acinetobacter) സാന്നിധ്യം കണ്ടെത്തി.
കുടുംബത്തിൻ്റെ ആരോപണവും പ്രതിഷേധവും
ശിവപ്രിയയുടെ മരണത്തിന് പിന്നാലെ, ചികിത്സാപ്പിഴവ് ആരോപിച്ച് കുടുംബം പ്രതിഷേധമാരംഭിച്ചു. മൃതദേഹം ഏറ്റുവാങ്ങാൻ വിസമ്മതിച്ച അവർ, ശിവപ്രിയയുടെ രണ്ടു വയസ്സുകാരിയായ മകളേയും നവജാതശിശുവിനേയും കൊണ്ടാണ് ആശുപത്രിക്ക് പുറത്ത് കുത്തിയിരുന്ന് പ്രതിഷേധിച്ചത്. ചികിത്സയ്ക്കിടെയുണ്ടായ അണുബാധയാണ് മരണകാരണമെന്ന് ഡോക്ടർമാർ സ്ഥിരീകരിച്ചതായി യുവതിയുടെ സഹോദരൻ ശിവപ്രസാദ് ആരോപിച്ചു.
കോൺഗ്രസും ബിജെപിയും ആശുപത്രിക്ക് പുറത്ത് പ്രതിഷേധിച്ചിരുന്നു.
