സംസ്ഥാനം അതിദാരിദ്ര്യമുക്തമായി പ്രഖ്യാപിച്ച സാഹചര്യത്തില്‍ ഇനി സര്‍ക്കാറിന്റെ കണ്ണില്‍ അത്തരക്കാര്‍ ഉണ്ടാവില്ല. ഇതുമൂലം അവശജന വിഭാഗങ്ങള്‍ക്കുള്ള ആനുകൂല്യങ്ങളും ക്ഷേമപദ്ധതികളും സര്‍ക്കാര്‍ നിര്‍ത്തുമോ എന്ന ആശങ്കയിലാണ് വലിയൊരു വിഭാഗം. അതിദരിദ്രരെന്ന കണക്കില്‍ പെടാത്ത ആയിരക്കണക്കിനാളുകള്‍ സംസ്ഥാനത്തിന്റെ വിവിധ ഭാഗങ്ങളില്‍ ഇപ്പോഴും ദുരിതത്തില്‍ കാണിക്കുന്നുണ്ടെന്നാണ് റിപ്പോര്‍ട്ട്.
ഇനി മുതല്‍ വികസന പദ്ധതികള്‍ വിഭാവനം ചെയ്യുമ്പോള്‍ ദുര്‍ബല വിഭാഗങ്ങളെ പരിഗണിക്കുകയേ വേണ്ടെന്ന സന്ദേശമാണോ സര്‍ക്കാര്‍ നല്‍കുന്നതെന്ന് പൊതു നയരൂപീകരണ വിദഗ്ധര്‍ ചോദിക്കുന്നു. സര്‍ക്കാര്‍ കൊട്ടിഘോഷിച്ച് ഒരു പ്രഖ്യാപനം നടത്തിയ സാഹചര്യത്തില്‍, ഇനി ഔദ്യോഗിക രേഖകളില്‍ അതിദരിദ്രര്‍ ഉണ്ടാവുകയില്ല. അവര്‍ക്കായുള്ള പദ്ധതികളുമുണ്ടാവില്ലെന്ന് ചുരുക്കം.
പാര്‍ശ്വവല്‍കൃത സമൂഹങ്ങളെ പൂര്‍ണമായി അവഗണിക്കാനുള്ള, ദീര്‍ഘവീക്ഷണം ഇല്ലാത്ത ചുവടുവെപ്പാണ് പണറായി സര്‍ക്കാര്‍ മുന്നോട്ട് വച്ചിരിക്കുന്നതെന്ന വിമര്‍ശനം ശക്തമാണ്. സാമൂഹ്യക്ഷേമ പദ്ധതികളുടെ അന്ത്യം കുറിക്കുന്ന പ്രഖ്യാപനമാണ് പിണറായി വിജയന്‍ ഇന്ന് നടത്തിയത്. ഈ വിമര്‍ശനങ്ങള്‍ക്ക് സര്‍ക്കാര്‍ കൃത്യമായ മറുപടി നല്‍കുമെന്നാണ് സര്‍ക്കാരിന്റെ പുതിയ നീക്കത്തെ ആശങ്കയോടെ നോക്കിക്കാണുന്നവരുടെ പ്രതീക്ഷ. കേരളത്തിലെ ദരിദ്രജനവിഭാഗങ്ങളുടെ യഥാര്‍ത്ഥ ജീവിതസാഹചര്യങ്ങളെ മറച്ചുവെക്കുന്നതും സാമൂഹ്യസുരക്ഷാ പദ്ധതികളുടെ പരിമിതികളും തൊഴില്‍രാഹിത്യവും പോഷകാഹാരക്കുറവും പോലുള്ള അടിസ്ഥാന പ്രശ്‌നങ്ങളെ അവഗണിക്കുന്നതായുമാണ് പുതിയ പ്രഖ്യാപനം എന്ന് പ്രതിപക്ഷവും കുറ്റപ്പെടുത്തുന്നു.
സംസ്ഥാനത്ത് അതിദുര്‍ബല ജനവിഭാഗങ്ങളായി 64,000 കുടുംബങ്ങളെയാണ് സര്‍ക്കാര്‍ കണ്ടെത്തിയിട്ടുള്ളത്. ഇവരില്‍ വെറും അഞ്ച് ശതമാനം ആദിവാസികളും 20 ശതമാനം ദലിതരും 75 ശതമാനം ഇതര വിഭാഗക്കാരുമാണെന്ന് കണക്കുകള്‍ പറയുന്നു. ഈ കണക്കുകള്‍ യാഥാര്‍ത്ഥ്യവിരുദ്ധമാണെന്നും അതിദാരിദ്ര്യത്തില്‍ കഴിയുന്ന ഗോത്രവര്‍ഗ വിഭാഗങ്ങളുടെ അവസ്ഥ ഇതിലൂടെ മറച്ചുവെക്കുന്നതാണെന്നും വിമര്‍ശനമുയരുന്നു.
വയനാട്, ഇടുക്കി ജില്ലകളിലെ പണിയ, അടിയ, കാട്ടുനായ്ക്ക, വേട്ടക്കുറുമ തുടങ്ങിയ ഗോത്രവര്‍ഗങ്ങള്‍ ഭൂരിഭാഗവും ഭൂരഹിതരും ഭവനരഹിതരുമാണ്. ഇവരില്‍ വലിയൊരു വിഭാഗം ഇപ്പോഴും പുഴയോരങ്ങളിലും പുറമ്പോക്കുകളിലും വനാതിര്‍ത്തികളിലും കൂരകളിലും താമസിക്കുന്നു. 2020-ല്‍ നടത്തിയ ഒരു പഠനമനുസരിച്ച്, പണിയ-കുറിച്ച്യ വിഭാഗങ്ങളിലെ 59 ശതമാനം കുട്ടികള്‍ ശരീരഭാരക്കുറവുള്ള നിലയാണെന്നും, 52.3 ശതമാനം കുട്ടികള്‍ വളര്‍ച്ചമുരടിച്ചവരാണെന്നും കണ്ടെത്തിയിരുന്നു. 2022-ല്‍ ഇന്റര്‍നാഷണല്‍ ജേണല്‍ ഓഫ് കമ്മ്യൂണിറ്റി മെഡിസിന്‍ ആന്റ് പബ്ലിക് ഹെല്‍ത്ത് പ്രസിദ്ധീകരിച്ച പഠനത്തില്‍ വയനാട്ടിലെ അഞ്ച് വയസിന് താഴെയുള്ള 54.8 ശതമാനം കുട്ടികളിലും പോഷകാഹാരക്കുറവാണെന്ന് രേഖപ്പെടുത്തി.
അട്ടപ്പാടിയിലെയും അവസ്ഥ ഗുരുതരമാണ്. നാഷണല്‍ ഇന്‍സ്റ്റിറ്റ്യൂട്ട് ഓഫ് ന്യൂട്രീഷന്‍ നടത്തിയ പഠനമനുസരിച്ച്, അവിടുത്തെ 48 ശതമാനം കുട്ടികള്‍ ഭാരക്കുറവുള്ളവരും 40 ശതമാനം കുട്ടികള്‍ വളര്‍ച്ചമുരടിച്ചവരുമാണ്. 91 ശതമാനം കുട്ടികള്‍ക്കും 96 ശതമാനം കൗമാര പെണ്‍കുട്ടികള്‍ക്കും 80 ശതമാനം ഗര്‍ഭിണികള്‍ക്കും രക്തക്കുറവുണ്ട്. ഇവരില്‍ 30 ശതമാനം പേര്‍ ഭൂരഹിതരാണെന്നും പഠനം ചൂണ്ടിക്കാണിക്കുന്നു. ആദിവാസി മേഖലകളോടൊപ്പം ദളിതര്‍, മത്സ്യതൊഴിലാളികള്‍, തോട്ടംതൊഴിലാളികള്‍, ആശാവര്‍ക്കര്‍മാര്‍ തുടങ്ങിയ നിരവധി തൊഴില്‍ വിഭാഗങ്ങളും അതിദാരിദ്ര്യത്തിന്റെ പിടിയിലാണ്. ഈ യാഥാര്‍ത്ഥ്യങ്ങളെല്ലാം നിലനില്‍ക്കുമ്പോഴാണ് പുതിയ പ്രഖ്യാപനം. തങ്ങളെ സര്‍ക്കാര്‍ ഇനി ഏത് വിധത്തിലാകും പരിഗണിക്കുകയെന്ന ചോദ്യമാണ് ഈ ജനവിഭാഗം ഉയര്‍ത്തുന്നത്.
റിപ്പോര്‍ട്ട്: അനില ജോര്‍ജ്
