കോഴിക്കോട് ബേബി മെമ്മോറിയല്‍ ആശുപത്രിയില്‍ തീപിടിത്തം. പുതിയ കെട്ടിടമായ സി ബ്ലോക്കിന്‍റെ എ സി പ്ലാന്‍റിലാണ് ഇന്ന് രാവിലെ പത്ത് മണിയോടെ തീപിടിത്തമുണ്ടായത്. വാര്‍ഡുകള്‍ പ്രവര്‍ത്തിക്കുന്ന ഭാഗത്തല്ല തീപിടുത്തമുണ്ടായത്. അതിനാൽ ആളപായമില്ല.
ഫയർഫോഴ്സ് തീ അണയ്ക്കാനുള്ള ശ്രമം ആരംഭിച്ചു. ഈ ഭാഗത്തേക്ക് രോഗികൾ പോകാറില്ലെന്നും ആശങ്കപ്പെടേണ്ടതില്ലെന്നും ആശുപത്രി അധികൃതർ അറിയിച്ചു.
തീപിടിത്തം നിയന്ത്രണ വിധേയമാക്കാൻ കഴിഞ്ഞിട്ടുണ്ട്. തീപിടിത്തം ശ്രദ്ധയിൽപ്പെട്ട ഉടനെ കൂടുതൽ നിയന്ത്രണ നടപടികൾ തുടങ്ങിയത് മറ്റിടങ്ങളിലേക്ക് തീ പടരാതിരിക്കാൻ സഹായിച്ചു. രോഗികളില്ലാത്ത സ്ഥലത്താണ് തീപിടിച്ചതെന്നും ആശുപത്രി അധികൃതർ വ്യക്തമാക്കി.
ഒമ്പതാം നിലയിലാണ് എ സി പ്ലാൻ്റിൻ്റെ പണി നടക്കുന്നത്. ജീവനക്കാരുൾപ്പെടെ അവിടെ ഉണ്ടായിരുന്നു. എന്നാൽ ഈ ഭഗാത്ത് രോഗികൾ ഇല്ലായിരുന്നു. ആശുപത്രിയുടെ പുറത്തുണ്ടായിരുന്നവരാണ് സംഭവം ശ്രദ്ധയിൽ പെടുത്തിയത്. ഉടൻ തന്നെ അടുത്ത നിലയിലെ രോഗികളെ പുറത്തേക്ക് മാറ്റുകയായിരുന്നു.
കോഴിക്കോട് ബസ് സ്റ്റാൻ്റിനടുത്താണ് ബേബി മെമ്മോറിയൽ ആശുപത്രി സ്ഥിതി ചെയ്യുന്നത്.
